ކޮވިޑް-19ން ރައްކާތެރިވުމަށް ރާއްޖޭގައި އަޅާފައިވާ ފިޔަވަޅުތައް މިވަގުތައް ދިގުދަންމާލި ނަމަވެސް ބޮޑު އީދަށް ވާއިރަށް ފިޔަވަޅުތަކަށް ލުއި ދެވޭނެ ކަމުގެ އުންމީދު އެބައޮތް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު ވިދާޅުވެއްޖެއެވެ.

ކޮވިޑް-19 އާ ގުޅޭ މައުލޫމާތުތައް އާންމުކުރުމުގެ ގޮތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ޞާލިޙު ވަނީ މާލެ ސަރަހައްދުގައި ކޮވިޑް-19އާ ގުޅިގެން އަޅާފައިވާ ފިޔަވަޅުތައް އިތުރު އެ ހަފްތާއަށް ދިގުދަންމާލިކަން އިއުލާންކުރައްވާފައެވެ. ކުރިއަށް ސްކޫލް ބަންދެއް އޮތުމާ ގުޅިގެން ގިނަ ބަޔަކު ރަށްރަށަށް ދާން ބޭނުންވެފައިވާ މި ހާލަތުގައި ކޮވިޑް-19އާ ގުޅިގެން މި ވަނީ މާލެއިން ބޭރަށް ޒަރޫރީ ބޭނުމަކަށް ނޫނީ ދަތުރު ނުކުރެވޭ ގޮތަށް ވެސް ކަނޑައަޅާފައެވެ.

ރައީސް ވިދާޅުވީ މިފަދަ ހަރުކަށި ފިޔަވަޅުތަކެއްގައި ގޭގައި ބަންދުވެފައި ތިބުމަކީ ފަސޭހަ ކަމެއް ނޫން ކަން ގަބޫލުކުރައްވާ ކަމަށެވެ. އެހެންނަމަވެސް މިހެން ތިބެގެން ފަހުން ވާނެ ފައިދާ ބޮޑުކަން އެމަނިކުފާނު ފާހަގަކުރެއްވިއެވެ. އެގޮތުން ޖުލައި މަހުގެ ތެރޭގައި ޖުލައި 26 އާއި ބޮޑު އީދު ބަންދާ އެކު 14 ދުވަހަށް ވުރެ ގިނަ ދުވަހުގެ ބަންދެއް ލިބޭކަން ފާހަގަކުރައްވައި ރައީސް ވިދާޅުވީ މިހާރު މި ލިބޭ ޗުއްޓީގައި ގޭގައި މަޑުކޮށްލައިގެން ބޮޑު އީދު ބަންދުގައި ބޭރަށް ދިއުމުގެ ފުރުސަތު ލިބިދާނެ ކަމަށެވެ. އަދި އެހެން ވިސްނައި އެކަމަށް ތައްޔާރުވުން މާ ރަނގަޅު ކަމުގައި ވެސް ވިދާޅުވިއެވެ.

ރައީސް ވިދާޅުވީ ކޮވިޑް-19ގެ ހާލަތު ގޯސްވުމުން އަޅާ ފިޔަވަޅުތަކަށް ކުއްލިއަކަށް ބޮޑެތި ލުއިތަކެއް ދިނުމުގެ ވިސްނުންފުޅު ނުގެންގުޅުއްވާ ކަމަށެވެ. އެގޮތަށް ކަންތައްކުރުމުން ވާ ގޮތް މިދިޔަ އޭޕްރިލް މަސް ތެރޭގައި ވެސް ފެނިފައިވާ ކަމަށާއި މިހާރުގެ ވިސްނުމަކީ މަޑުމަޑުން ލުއިތައް ދެމުން ދިއުން ކަމަށެވެ. އެހެންވެ މިހާރު ކެތްތެރިވެ މަޑުކޮށްލައިފިނަމަ ޖުލައި މަސް ތެރޭގައި ނިއު ނޯމަލްއެއް ފެށި އެ ނޯމަލްގައި އެކީއެކައްޗަކަށް އުޅުމުގެ މަގުފަހިވެގެންދާނެ ކަމަށް ވެސް ވިދާޅުވިއެވެ.

މެއި މަހުގެ ކުރީކޮޅުން ފެށިގެން މާލެ ސަރަހައްދާއި މުޅި ރާއްޖޭގެ ކޭސްތައް ވެސް އިތުރުވެފައިވާއިރު މެއި މަހުގެ ފަހު ހަފުތާއާ ޖެހެންދެން ވެސް 1،000ން މަތިން ކޮންމެ ދުވަހަކު ވެސް ކޭސްތައް ރިޕޯޓުކުރިއެވެ. އޭގެ ސަބަބުން މާލެ ސަރަހައްދުގެ ރައްކާތެރިކަމުގެ ފިޔަވަޅުތައް ވަރުގަދަ ކުރީ މެއި މަހުގެ 26 ވަނަ ދުވަހުއެވެ.

އެޗްޕީއޭއިން މިހާރު އަޅާފައިވާ ފިޔަވަޅުތަކަށް ބަލާއިރު، ސަރުކާރު އޮފީސްތައް ބަންދުކުރުމާއި، ސްކޫލްތައް ބަންދުކުރުމާއި، ޕާކު ތަކާއި މައިޒާންތައް އަދި ކުޅިވަރު ކުޅޭ ތަންތަން ބަންދުކުރުމުގެ އިތުރަށް ޖިމްތަކާއި ސެލޫންތައް ވެސް ވަނީ ބަންދުކޮށްފައެވެ. އަދި ކެފޭ ރެސްޓޯރަންޓުތަކުން ވެސް ޑައިންއިން ޚިދުމަތް ދިނުން ވަނީ މަނާކޮށްފައެވެ.

މީގެ އިތުރަށް ހަވީރު ހަތަރަކުން ފެށިގެން އަނެއް ދުވަހުގެ ހެނދުނު އަށަކާ ހަމައަށް ކާފިއު އިއުލާންކޮށްފައިވާއިރު، ކާފިއު ނޫން ގަޑިތަކުގައި ވެސް ބޭރުގައި އުޅެވެނީ ފުލުހުން ދޫކުރާ ވަކި ހުއްދައަކާއި، ވަޒީފާގެ ގޮތުންނާއި މަސައްކަތުގެ ގޮތުން ލިބޭ ވަކި ހާއްސަ ހުއްދައެއްގެ ދަށުންނެވެ. އެގޮތުން ކާފިއު ނޫން ގަޑިތަކުގައި ވެސް ބޭރުގައި އުޅުމުގެ ހުއްދަ އޮންނަނީ ކޮންމެ ގޭބީސީއަކުން ދެމީހަކަށެވެ. އެއީ ވެސް މީހަކަށް ހަތަރު ގަޑި އިރުގެ އުސޫލުން ދެމީހުން ވެސް ދެ ދަންފަޅިއަކަށް ބަހައިގެންނެވެ. އެ ހުއްދައިގައި ވެސް ޒަރޫރީ ބޭނުންތަކަށް ނޫނީ ނުނިކުތުމަށް ވަނީ އިލްތިމާސްކޮށްފައެވެ.