ބުޅާ ގެންގުޅުމަށް ޚާއްސަ ފެސިލިޓީއެއް!
8 ޖޫން 2021 | އަންގާރަ 12:24ފެސިލިޓީއަށް ގެންދިއުމަށްފަހު ބުޅާތަކަށް ވެކްސިންޖަހައި ފަރުވާ ދޭނެ
ބުޅާތަކަށް ކާން އަޅާފައި
ހުޅުމާލޭގެ މަގުމަތީގައި އުޅެމުންދާ ބުޅާތައް ބަލަހައްޓައި ގެންގުޅުމަށް ޚާއްސަ ފެސިލިޓީއެއް ގާއިމުކުރަން ހައުސިން ޑިވެލޮޕްމެންޓް ކޯޕަރޭޝަނުން ނިންމައިފިއެވެ.
އެޗްޑީސީން އިސްނައިގެން ގާއިމުކުރަން ނިންމި މި ފެސިލިޓީ ހިންގުމަށް ހަމަޖެހިފައި ވަނީ މާލެ ސިޓީ ކައުންސިލާއި ގުޅިގެންނެވެ. އެގޮތުން ހުޅުމާލެ ފޭސްޓޫގެ ފަރުކޮޅުފުށީގައި ގާއިމުކުރާ މި ފެސިލިޓީގައި 3،000 ބުޅާ ބަލަހައްޓާނެ ކަމަށް އެޗްޑީސީން ބުނެއެވެ. އަދި އެ ފެސިލިޓީގައި މަސައްކަތް ކުރާނެ މުވައްޒަފުންވެސް އެޗްޑީސީން ހަމަޖައްސާނެއެވެ.
ހުޅުމާލޭގައި ގާއިމުކުރެވޭ މިފެސިލިޓީގައި ގެންގުޅޭ ބުޅާތައް، ޕެޓްގެ ގޮތުގައި ބުޅާ ގެންގުޅުމަށް ބޭނުންވާ ފަރާތްތަކަށް އެފުރުސަތު ދިނުމަށް ވަނީ ނިންމާފައެވެ.
މެލޭޝިއާގެ ޓްރެޕް ނިއުޓާ ރިލީޒް މެނޭޖް (ޓީއެންއާރުއެމް) ގެ ކޮންސެޕްޓަށް ބުޅާތައް ގެންގުޅެން ނިންމާފައިވާއިރު، ބުޅާތައް ފެސިލިޓީއަށް ގެންދިއުމަށް ފަހު އެ ބުޅާތަކަށް ވެކްސިން ޖަހައި ފަރުވާ ދޭނެއެވެ. އަދި ބުޅާތައް އުޅޭތަނެއް އެނގޭނެ ޓްރެކިން ޑިވައިސްއެއް ކޮންމެ ބުޅަލެއްގައި ހަރުކުރާނެއެވެ.
މަގުމަތީގައި އުޅޭ ބުޅާތައް ގިނަވެ، ބުޅަލުގެ ސަބަބުން ގިނަ ދަތިތަކަކާ ކުރިމަތިވާކަމުގެ ޝަކުވާ އާންމުވެފައިވާއިރު ހުޅުމާލޭގެ ރައްޔިތުންގެ ފަރާތުން އެކަނިވެސް 2019 ވަނަ އަހަރު ބުޅަލާ ގުޅޭ 50 ޝަކުވާ ހުށަހަޅާފައިވާ ކަމަށާއި، 2020 ވަނަ އަހަރު 117 ޝަކުވާއެއް ހުށަހަޅާފައިވާ ކަމަށް އެޗްޑީސީން ބުނެއެވެ. އެޗްޑީސީން ބުނީ އެކުންފުނިން އަންނަނީ މިދިޔަ އަހަރުން ފެށިގެން ބުޅަލުގެ މައްސަލަ ހައްލުކުރުމަށް މަސައްކަތްކުރަމުން ކަމަށެވެ.
ހުޅުމާލެ މަގުމަތީގައި އުޅޭ 3،000 ބުޅާ ބެލެހެއްޓުމަށް ގާއިމުކުރުމަށް ނިންމާފައިވާ ފެސިލިޓީގެ މަސައްކަތްތައް ވީހާވެސް އަވަހަށް ފެށުމަށް އެޗްޑީސީ އާއި ސިޓީ ކައުންސިލުން ނިންމައިފައިވާއިރު، މާލެ އާއި ހުޅުމާލޭގައި ބުޅާ ގިނަވެ، ކުނި ކޮތަޅުތައް ހޭވުމާއި ބުޅަލުގެ ސަބަބުން މަގުމަތި ހަޑިވާކަމުގެ ޝަކުވާތައް ވަނީ އާންމުވެފައެވެ.
