ކޮވިޑްގެ ސަބަބުން ކުރި އިޤްތިޞާދީ ގެއްލުމުން އަރައިގަތުމަށް އޯޕެކް ފަންޑު ފޯރ އިންޓަރނޭޝަނަލް ޑިވެލޮޕްމަންޓުން 10 މިލިއަން ޑޮލަރުގެ ލޯނު އެހީއެއް ދޭން އެއްބަސްވެއްޖެއެވެ.

އޯޕެކް ފަންޑު ފޯރ އިންޓަރނޭޝަނަލް ޑިވެލޮޕްމަންޓް އިން ބޭންކް އޮފް މޯލްޑިވްސްއާ އެކު 10 މިލިއަން ޑޮލަރުގެ ލޯނު އެއްބަސްވުމެއްގައި ވަނީ ސޮއިކޮށްފައެވެ. ބޭންކް އޮފް މޯލްޑިވްސް، (ބީ.އެމް.އެލް) އިން ބުނީ، މި ލޯނު ދޫކުރެވޭނީ ކޮވިޑް-19 ގެ ބަލިމަޑުކަމުގެ ސަބަބުން ގެއްލުންވެފައިވާ ފަތުރުވެރިކަމުގެ ސިނާއަތާއި، އެ ސިނާއަތާ ގުޅުންހުރި ދާއިރާތަކުގައި ހަރަކާތްތެރިވާ ކުދި އަދި މެދު ފަންތީގެ ވިޔަފާރިތަކަށް ކަމަށެވެ. ބީއެމްއެލްއިން މިހާރު ވެސް ކޮވިޑްގެ ސަބަބުން ގެއްލުންވި ވިޔަފާރިތަކަށް އެހީވުމަށް އިކޮނޮމިކް ރިލީފް ޕެކޭޖެއް ވެސް ވަނީ ތަޢާރަފުކޮށްފައެވެ. އަދި ކޮވިޑްގެ 4 ވަނަ ރާޅާއެކު އިތުރު އެހީ މިވަނީ ހަމަޖައްސާފައެވެ.

އޯޕެކް ފަންޑާއެކު މި ވެވުނު އެއްބަސްވުމުގެ ދަށުން ފަތުރުވެރިކަމުގެ ސިނާއަތާއި އެ ސިނާއަތާ ގުޅުން ހުރި ވިޔަފާރިތައް ހިންގުމަށް ބޭނުންވާ ފައިސާ ދޫކުރާނެކަމަށް ބީ.އެމް.އެލްއިން ބުނެއެވެ. މިލޯނަކީ ޕާޓްނަރ ޤައުމުތަކަށް ކޮށްފައިވާ ނޭދެވޭ އަސަރުން އަރައިގަތުމަށް އެހީތެރިވުމަށް މިދިޔަ އަހަރު ފާސްކުރި އޯޕެކް ފަންޑުގެ ކޮވިޑް-19 ރެސްޕޯންސް ޕެކޭޖްގެ ދަށުން ދޫކުރެވޭ ލޯނެކެވެ. ނަމަވެސް މި ލޯނާގުޅޭ އިތުރު ތަފްޞީލު ފަހުން ހާމަކުރައްވާނެކަމަށް ވެސް އެ ބޭންކުން ބުނެއެވެ.

ބީ.އެމް.އެލްގެ ސީ.އީ.އޯ ޓިމް ސޯޔަރ ވިދާޅުވީ، މި ލޯނު އެހީ ހަމަޖެހިގެން މި ދިޔައީ ކޮވިޑް-19ގެ ސަބަބުން ފަތުރުވެރިކަމަށާއި، ވިޔަފާރީގެ އެކި ދާއިރާތަކަށް ލިބިފައިވާ ގެއްލުމުން އަރައިގަތުމަށް މަސައްކަތް ކުރަމުންދާ ނުހަނު ހައްސާސް ދަނޑިވަޅެއްގައިކަމަށެވެ. ކޮވިޑް-19ގެ ސަބަބުން ވިޔަފާރިތަކަށް ކުރަމުންދާ ނޭދެވޭ އަސަރު ކުޑަކުރުމުގެ ގޮތުން މި ހާލަތު ފެށުނީއްސުރެ ބީ.އެމް.އެލްއިން އިސްނަގައިގެން މަސައްކަތްތަކެއް ކޮށްފައިވާކަން އޭނާ ފާހަގަކުރެއްވިއެވެ. އަދި އޯޕެކް ފަންޑުން ލިބިގެންދާ މި އެހީތެރިކަމަކީ ޤައުމަށް ލިބިފައިވާ ގެއްލުމުން އަރައިގަތުމަށް ކުރަމުންދާ މަސައްކަތްތަކަށް ލިބިގެންދާނެ އެހީއެއްކަމަށް ވެސް އޭނާ ވިދާޅުވިއެވެ.

މި ލޯނު އެހީއާގުޅޭ ގޮތުން އޯޕެކް ފަންޑުގެ ޑިރެކްޓަރ ޖެނެރަލް ޑރ. ޢަބްދުލްހާމިދު އަލްޚަލީފާ ވިދާޅުވީ ކޮވިޑް-19ގެ ބަލިމަޑުކަމުން އަރައިގަނެ އިޤްތިޞާދު އަލުން ކޮޅަށް ޖެހުމަށް ދިވެހިރާއްޖެއިން ކުރަމުންދާ މަސައްކަތްތަކަށް އެހީތެރިކަން ފޯރުކޮށްދެވޭ ކަމީ ލިބޭ އުފަލެއްކަމަށެވެ. އަދި މި ޕްރައިވެޓް ސެކްޓަރ ފަންޑިންގ އާއެކު ރާއްޖެއާއެކު އެ ފަންޑުން ޤާއިމުކޮށްފައިވާ ގުޅުން އިތުރަށް ހަރުދަނާވެގެންދާނެކަމަށް އޭނާ ވިދާޅުވިއެވެ.

ކޮވިޑް-19އިން އަރައިގަތުމަށް ސަރުކާރުން މިހާތަނަށް 3.4 ބިލިއަނަށްވުރެ ގިނަ ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީން ޢާންމުކޮށްފައިވާ ތަފާސްހިސާބުތަކުން ދައްކައެވެ. އިކޮނޮމިކް ރެސްޕޮންސް ސްޕެންޑިންގެ ދަށުން ކޮވިޑް ރިކަވަރީ ލޯން ސްކީމްއަށް މިހާތަނަށް ވަނީ 1.2 ބިލިއަން ރުފިޔާ ހޭދަކޮށްފައެވެ. އަދި އިންކަމް ސަޕޯޓު އެލަވަންސްގެ ގޮތުގައި 421 މިލިއަން ރުފިޔާ ދީފައިވާއިރު، ކަރަންޓު ބިލްތަކަށް ޑިސްކައުންޓުގެ ގޮތުގައި 117.7 މިލިއަން ރުފިޔާ ޙަރަދުކޮށްފައިވާކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައެވެ.