އާދީއްތަ ދުވަހު 753 މީހަކު ބަލިން ރަނގަޅުވެ، 412 މީހުން ޕޮޒިޓިވްވެފައިވޭ
މާލެ ސަރަހައްދުން ޕޮޒިޓިވްވީ 239 މީހުން
ކޮވިޑް-19އަށް ޕޮޒިޓިވްވެފައިވާ ފަރާތްތައް އެކަހެރިކުރުމުގެ މަސައްކަތް ކުރަނީ
ކޮވިޑަށް އިތުރު 412 މީހުން ޕޮޒިޓިވްވެއްޖެއެވެ.
ހޮނިހިރު ދުވަހުގެ އިރުއޮއްސި 6:00ން އާދީއްތަ ދުވަހުގެ އިރުއޮއްސި 6:00 އާއި ހަމައަށް ނެގުނު 4732 ސާމްޕަލާއި، ބެކް ލޮގްގައި ހުރި ސާމްޕަލްތަކުގެ ތެރެއިން 5 ޖޫންގެ 273 ސާމްޕަލާއި، 4 ޖޫންގެ 77 ސާމްޕަލްގެ ތެރެއިން ޕޮޒިޓިވްވެފައިވަނީ 412 މީހުންނެވެ.
ޕޮޒިޓިވްވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 239 މީހުންނާއި، ރަށްރަށުން ޕޮޒިޓިވްވި 162 މީހުންގެ އިތުރުން ރިސޯޓްތަކުން ޕޮޒިޓިވްވި 11 މީހުންނެވެ.
އާދީއްތަ ދުވަހުގެ އަދަދާއެކު މިހާތަނަށް 67،950 މީހަކު ވަނީ ޕޮޒިޓިވްވެފައެވެ. އަދި 48،086 މީހަކު ވަނީ ބަލިން ފަސޭހަވެފައެވެ.
އެކްޓިވް ކޭސްގެ ގޮތުގައި ހިމެނެނީ 19،670 މީހުންނެވެ. އަދި މީގެ ތެރެއިން 166 މީހަކަށް ދަނީ އެޑްމިޓް ކޮށްގެން ފަރުވާ ދެމުންނެވެ.
އާދީއްތަ ދުވަހުގެ އިރު އޮއްސި 6:00ން ހޯމަ ދުވަހުގެ އިރުއޮއްސި 6:00 އާއި ދެމެދު 3 މީހަކު ވަނީ ބަލީގައި ނިޔާވެފައެވެ. މިއާއެކު ރާއްޖޭގައި ނިޔާވި މީހުންގެ އަދަދު ވަނީ 185ށް އަރާފައެވެ.
އެޗްޕީއޭއިން އާންމުކޮށްފައިވާ މައުލޫމާތުތަކަށް ބަލާ އިރު، ނިޔާވި މީހުންގެ ތެރެއިން 93 އިންސައްތަ މީހުންނަކީ ދެވަނަ ޑޯޒް ފުރިހަމަކޮށްފައި ނުވާ މީހުންނެވެ.
މީގެ އިތުރުން، 77 ރަށެއް މޮނިޓަރިންގެ ހާލަތަށް ލެވިފައިވާ އިރު، އާދީއްތަ ދުވަހު އިތުރު ދެ ރަށެއް ވަނީ މޮނިޓަރިންގެ ހާލަތަށް ގެނެސްފައެވެ. އެއީ ހދ. މަކުނުދޫ އަދި ރ. ފައިނެވެ.
