ސްޓެލްކޯގެ ސަބްސްޓޭޝަން 47 ގައި ޓްރާންސްފޯމަރު ނަގައި އައު ޓްރާންސްފޯމަރެއް ބަހައްޓަނީ
5 ޖޫން 2021 | ހޮނިހިރު 09:01ކުރިއަށް އޮތް ދެ ގަޑިއިރުގެ ތެރޭގައި މަސައްކަތް ނިމޭނެ
ސަބްސްޓޭޝަން 47 ގައި ހުރި ޓްރާންސްފޯމަރު ނަގާ އައު ޓްރާންސްފޯމަރެއް ބެހެއްޓުމުގެ މަސައްކަތް ކުރިޔަށް ދަނީ
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ ސަބްސްޓޭޝަން 47 ގައި ޓްރާންސްފޯމަރު ނަގައި އައު ޓްރާންސްފޯމަރެއް ބެހެއްޓުމުގެ މަސައްކަތް ކުރިއަށް ދާ ކަމަށް އެ ކުންފުނިން ބުނެފިއެވެ.
ސްޓެލްކޯއިން ބުނީ އެ ކުންފުނީގެ ސަބްސްޓޭޝަން 47 ގައި ހުރި 630 ކިލޯ ވޮލްޓް އެމްޕަޔަރގެ ޓްރާންސްފޯމަރު ނަގައި 1500 ކިލޯ ވޮޓް އެމްޕަޔަރގެ އައު ޓްރާންސްފޯމަރެއް ބެހެއްޓުމުގެ މަސައްކަތް ކުރިޔަށް ދާ ކަމަށެވެ. އަދި ކުރިއަށް އޮތް ދެ ގަޑިއިރުގެ ތެރޭގައި މަސައްކަތް ނިމޭނެ ކަމަށާއި ދިމާވެދާނެ ދަތިތަކަށް މައާފަށް އެދޭކަމަށް ސްޓެލްކޯއިން ބުނެއެވެ.
ސްޓެލްކޯއިން ފާއިތުވި އަހަރުވެސް ގިނަ މަސައްކަތްތަކެއް ކޮށްފައިވާއިރު ތެލަށް ބަރޯސާވެ ކަރަންޓު އުފެއްދުން އެއީ ކުންފުނީގެ ހަމައެކަނި ވިޔަފާރިއަށް ހަދައިގެން ތިބުމުގެ ބަދަލުގައި އެހެން ވިޔަފާރިތަކަށް އިންވެސްޓްކޮށް ފުޅާކުރުމާއި ސޯލާގެ ވިޔަފާރި ފުޅާކުރުމަށް ކުރި މަސައްކަތް "ސްޓެލްކޯ ސޯލާ ޕޮޑް – ގްރީން ލައިފް" މިދިޔަ އަހަރުގެ އެންމެ ފަހު ދުވަހު ލޯންޗު ކުރުމަކީ ވެސް ކޮވިޑްގެ ސަބަބުން ކުންފުނީގެ މަސައްކަތް ނުހުއްޓޭކަން އަންގައިދޭ ކަމެއް ކަމަށް އެ ކުންފުނީގެ މެނޭޖިން ޑިރެކްޓަރ ހަސަން މުޣުނީ ވިދާޅުވެފައިވެއެވެ.
އަދި މިއީ މި ސިނާއަތަށް ކުންފުނިން ދޫކޮށްލި މުހިއްމު އުފެއްދުމެއް ކަމަށާއި ރައީސް އިބްރާހިމް މުހައްމަދު ސޯލިހު އިއުލާން ކުރައްވާފައިވާ ގޮތަށް އާ އަހަރަކީ ގައުމު އާރަސްތުކުރުމުގެ އަހަރު ކަމަށްވާތީ، ރާއްޖޭގެ ހަކަތައިގެ ސިނާއަތުގެ އެންމެ ބޮޑު ކުންފުނީގެ ހައިސިއްޔަތުން ސްޓެލްކޯގެ މި އަހަރުގެ އަމާޒަކީ ޚަރަދު ކުޑަކުރުމާއެކު، އާ ވަސީލަތްތައް ބޭނުންކޮށްގެން ކަރަންޓު އުފައްދައި، ފޯރުކޮށްދިނުމާއި ސްމާޓް މީޓަރު ފަދަ ޒަމާނީ ޓެކްނޮލޮޖީ ބޭނުންކޮށްގެން ރައްޔިތުންނަށް ލުއިފަސޭހަތަކެއް ހޯދައިދިނުން ކަމަށް މުޣުނީ ވިދާޅުވިއެވެ.
