އެކުއެޑޯ ބަލިކޮށް ބްރެޒިލަށް ހަތަރު ޕޮއިންޓުގެ ލީޑެއް

ދެކުނު އެމެރިކާގެ ފީފާ ވޯލްޑް ކަޕް ކޮލިފައިން ބުރުގައި ހޮނިހިރު ދުވަހުގެ ފަތިހު ކުޅުނު މެޗުން އެކުއެޑޯ ބަލިކޮށް ބްރެޒިލުން އެއްވަނައިގައި ލީޑު ފުޅާކޮށްފިއެވެ.

އަމިއްލަ ގައުމުގައި ކުޅުނު މެޗުން ބްރެޒިލް މޮޅުވީ 2-0 ގެ ނަތީޖާއަކުންނެވެ.

ބްރެޒިލުން މި މެޗުގައި ގިނަ ހަމަލާތަކެއް އުފެއްދި ނަމަވެސް، މެޗުގެ ފުރަތަމަ ހާފުގައި ލަނޑެއް ފެނިފައެއް ނުވެއެވެ. އެކަމަކު ދެވަނަ ހާފު ފަށައިގެން 20 ވަނަ މިނެޓުގައި ބްރެޒިލުން ލީޑު ނެގިއިރު، ނޭމާ ދިން ބޯޅައަކުން މި ލަނޑު އެ ގައުމަށް ކާމިޔާބުކޮށްދިނީ ރިޗާލިސަންއެވެ. އަދި މެޗުގެ އިތުރު ވަގުތުގައި ނޭމާ ވަނީ ލިބުނު ޕެނަލްޓީއަކުން ބްރެޒިލުގެ ލީޑު ފުޅާކޮށްދީފައެވެ.

މި މެޗުން މޮޅުވެ ބްރެޒިލުން ވަނީ ކޮލިފައިންގެ އެއްވަނައިގައި ހަތަރު ޕޮއިންޓުގެ ލީޑެއް ނަގާފައެވެ. ތާވަލުގެ އެއްވަނައިގައި ބްރެޒިލް އޮތީ ސައްތައިން ސައްތަ ރިކޯޑަކާއެކު ކުޅުނު ފަސް މެޗުންވެސް މޮޅުވެ 15 ޕޮއިންޓް ހޯދައިގެންނެވެ. ބުރާސްފަތި ދުވަހުގެރޭ ޗިލީއާ އެއްވަރުވި އާޖެންޓީނާ ދެވަނައިގައި އޮތީ ފަސް މެޗުން 11 ޕޮއިންޓާއެކުއެވެ. އަދި ތިންވަނައިގައި އޮތް އެކުއެޑޯއަށް ފަސް މެޗުން ލިބިފައިވަނީ ނުވަ ޕޮއިންޓެވެ.

ކޮލިފައިންގައި ދެން ބްރެޒިލް ކުޅޭ މެޗު އޮންނާނީ އަންގާރަ ދުވަހުގެރޭ ރަށުން ބޭރުގައި ޕެރަގުއޭއާ ދެކޮޅަށެވެ.