ކޮވިޑަށް ފަރުވާ ހޯދަމުން ދިޔަ އިތުރު މީހަކު ނިޔާވެއްޖެ
4 ޖޫން 2021 | ހުކުރު 16:31ނިޔާވެފައިވަނީ އުމުރުން 77 އަހަރުގެ ދިވެހި އަންހެނެއް
ކޮވިޑް-19ގައި ނިޔާވި މީހަކު ވަޅުލަނީ
ކޮވިޑް-19އަށް ފަރުވާ ހޯދަމުން ދިޔަ އިތުރު މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ ނިޔާވެފައިވަނީ އުމުރުން 77 އަހަރުގެ ދިވެހި އަންހެނެއް ކަމަށާއި، އޭނާ ނިޔާވެފައިވަނީ ހުކުރު ދުވަހުގެ ހަވީރު 04:30 ގައި ވިލިމާލެ ހޮސްޕިޓަލު ގައި ކަަމަށެވެ. މިއީ ރާއްޖެއިން ކޮވިޑު ޖެހިގެން ނިޔާވި 177 ވަނަ މީހާއެވެ.
މީގެ އިތުރުން ހުކުރު ދުވަހު ވަނީ އިތުރު ދެމީހަކު ވެސް ނިޔާވެފައެވެ. މި ދެ މީހުންނަކީވެސް ކޮވިޑް-19އަށް ފަރުވާ ހޯދަމުން ދިޔަ ދެ މީހުންނެވެ.
މީގެ ތެރޭގައި ހިމެނެނީ، ދ.ބަނޑިދޫގައި ކޮވިޑަށް ފަރުވާ ހޯދަމުން ދިޔަ 77 އަހަރުގެ ދިވެހި ފިރިހެނަކާއި، އައިޖީއެމްއެޗްގެ އިމަރޖެންސީއަށް ގެންދެވުނު 37 އަހަރުގެ ލަންކާ ރައްޔިތެކެވެ.
ރާއްޖޭގައި ފެންނަ ކޮވިޑުގެ ކޭސްތަކުގެ އަދަދު އިތުރުވެފައިވާއިރު، މި ބަލި ޖެހިގެން ނިޔާވާ މީހުންގެ އަދަދު ވެސް އަންނަނީ އިތުރުވަމުންނެވެ.
ކޮވިޑް-19ގެ ކޭސްތަކުގެ އަދަދު ކޮންޓްރޯލް ކުރުމަށްޓަކައި އާންމު ރައްޔިތުންގެ އެއްބާރުލުން ބޭނުންވާ ކަމަށް ސިއްހީ މާހިރުން އަންނަނީ ތަކުރާރުކޮށް ބުނަމުންނެވެ.
