މި އަހަރުގެ ހޫނު މޫސުމުގައި ޔޫރޯ ފުޓްބޯޅަ މުބާރާތް ބާއްވާއިރު، މި މުބާރާތަކީ މިދިޔަ އަހަރުގެ ހޫނު މޫސުމުގައި ބާއްވަން ތާވަލުކުރި މުބާރާތެކެވެ. އެގޮތުން މީގެ ކުރިން މި މުބާރާތް ބޭއްވުމަށް ތާވަލުކޮށްފައި އޮތީ މިދިޔަ އަހަރުގެ ޖޫން މަހުގެ 12 ވަނަ ދުވަހުން ފެށިގެން ޖުލައި މަހުގެ 12 ވަނަ ދުވަހުގެ ނިޔަލަށެވެ.

އެކަމަކު ކޮވިޑް-19 ގެ ބަލިމަޑުކަމާ ގުޅިގެން މިދިޔަ އަހަރުގެ މާޗު މަހުގެ ތެރޭގައި ވަނީ މި މުބާރާތް މި އަހަރަށް ފަސްކޮށްފައެވެ. އެ ނިންމުން ޔުއެފާއިން ނިންމާފައިވަނީ އެ ޖަމުއިއްޔާގެ 55 މެންބަރު ގައުމުންނާއި، ޔޫރަޕުގެ ލީގުތަކުންނާއި، ޔޫރަޕުގެ ކުލަބު އެސޯސިއޭޝަނުންނާއި، ދުނިޔޭގެ ކުޅުންތެރިންގެ ޔޫނިއަން (ފިފްޕްރޯ) ގެ މަންދޫބުންނާއެކު ބޭއްވި ވީޑިއޯ ކޮންފަރެންސް ބައްދަލުވުމެއްގައެވެ.

ޔޫރޯ ފަސްކުރަން ޔުއެފާއިން ނިންމީ ޔޫރަޕުގެ ފުޓްބޯޅަ ލީގުތަކާއި ޔުއެފާގެ ކުލަބު މުބާރާތްތައް ފުރިހަމަކުރަން ވަގުތު ދިނުމަށެވެ. ކޮވިޑާ ގުޅިގެން މިދިޔަ ސީޒަނުގެ ލީގުތައް މެދުކަނޑާލަން ޖެހުމުން، މިދިޔަ އަހަރުގެ ހޫނު މޫސުމުގައި ޔޫރަޕުގެ ވަރުގަދަ ލީގުތަކުގެ ކުޅުން ވަނީ ކުރިއަށް ގެންގޮސްފައެވެ.

އެއާއެކު ޔުއެފާއިން މިހާރު ވަނީ މި މުބާރާތް މި އަހަރުގެ ޖޫން މަހުގެ 11 ވަނަ ދުވަހުން ފެށިގެން ޖުލައި މަހުގެ 11 ވަނަ ދުވަހުގެ ނިޔަލަށް ބޭއްވުމަށް ތާވަލުކޮށްފައެވެ. އަދި މިދިޔަ އަހަރުގެ މުބާރާތް މި އަހަރު ބޭއްވުމަށް ނިންމި ނަމަވެސް، މި މުބާރާތް މި އަހަރުވެސް ކުރިއަށްދާނީ "ޔޫރޯ 2020" ގެ ނަމުގައެވެ.

މުޅިއެކު 24 ގައުމު ވާދަކުރާ މި މުބާރާތް ކުރިއަށްދާނީ ޔޫރަޕުގެ ތަފާތު 11 ގައުމެއްގެ 11 ސިޓީއެއްގައެވެ. އެގޮތުން ޔޫރޯގެ މެޗުތައް މިފަހަރު ކުޅޭނެ އެގާރަ ސިޓީއަކީ އަޒަބައިޖާނުގެ ބާކޫ، ރަޝިއާގެ ސެއިންޓް ޕީޓަސްބާގް، ރުމޭނިޔާގެ ބުކަރެސްޓް، ހަންގޭރީގެ ބުޑަޕެސްޓް، ޖަރުމަނުގެ މިއުނިކް، ޑެންމާކުގެ ކޯޕަންހޭގަން، ހޮލެންޑުގެ އެމްސްޓެޑަމް، އިޓަލީގެ ރޯމް، ސްޕެއިނުގެ ސެވިއްޔާ، ސްކޮޓްލެންޑުގެ ގްލާސްގޯ އަދި އިންގްލެންޑުގެ ލަންޑަނެވެ.

މި ފަހަރުގެ މުބާރާތް ހުޅުވާ މެޗު އިޓަލީގެ ރޯމުގެ އޮލިމްޕިކް ސްޓޭޑިއަމުގައި ކުޅޭއިރު، ސެމީ ފައިނަލް މެޗުތަކާއި، މުބާރާތުގެ ފައިނަލް މެޗު ކުޅުމަށް ނިންމާފައިވަނީ ލަންޑަނުގެ ވެމްބްލީ ސްޓޭޑިއަމްގައެވެ. އެގޮތަށް ކުރިއަށްގެންދަން ޔުއެފާއިން ނިންމީ، ޔޫރޯ މުބާރާތް ބާއްވާތާ 60 އަހަރު އަހަރު ފުރޭ މުނާސަބަތު ކުލަގަދަކޮށް ފާހަގަކުރުމުގެ ގޮތުންނެވެ.