އެމްބިއުލާންސް އަށް ވިހޭ މާބަނޑުމީހާ، ގުޅިތާ ހަތް މިނެޓު ތެރޭގައި ބަލައި ފޮނުވިން- އައިޖީއެމްއެޗް
ކޮވިޑް ޕޭޝަންޓަކަށް ވީނަމަވެސް ހޮސްޕިޓަލުގައި އަވަސްފަރުވާ ދީފައިވޭ
އިންދިރާގާނދީ މެމޯރިއަލް ހޮސްޕިޓަލް
އެމްބިއުލާންސް ތެރެއަށް ވިހެއި މާބަނޑު މީހާ، ހޮސްޕިޓަލަށް ގުޅިތާ ހަތް މިނެޓު ތެރޭގައި، އޭނާ ބަލާ ފޮނުވާފައިވާނެ ކަމަށް އައިޖީއެމްއެޗުން ބުނެފިއެވެ.
"ރާއްޖެއެމްވީ" އަށް މައުލޫމާތު ދެއްވަމުން އައިޖީއެމްއެޗް އިން ބުނީ، މާބަނޑު މީހާ ގުޅީ ބުރާސްފަތި ދުވަހުގެ މެންދުރު 11:55ގައި ކަމަށެވެ. އެދުނީ ވަރަށް ބޮޑަށް ބަނޑުގައި ރިއްސާތީ އެމްބިއުލާންސް ފޮނުވައިދިނުމަށް ކަމަށެވެ.
އެހެންކަމާއެކު، އޮންނަ އުސޫލުގެ ތެރެއިން ކުރަން ޖެހޭ ސުވާލުތައް ކުރި ކަމަށެވެ. އޭގެ ތެރޭގައި، ކޮވިޑް-19ގެ އާލާމާތެއް ހުރިތޯއާއި، ނުވަތަ ޕޮޒިޓިވް ފަރާތެއްތޯއާއި، ނުވަތަ އޭނާ ދިރިއުޅޭ ގެއަކީ މޮނިޓަރިންގގައި ހުރި ގެއެއްތޯ ވެސް ބެލި ކަމަށެވެ. ނަަމަވެސް އެއީ ކޮވިޑް ޕޭޝަންޓެއް ނޫން ކަމަށް ބުނެފައިވާ ކަމަށް ވެސް އައިޖީއެމްއެޗުން ބުނެފައިވެއެވެ. އަދި އެހުރިހާ މައުލޫމާތެއް ސާފުކުރުމަށް ފަހު 12:03ގައި އެމްބިއުލާންސް ޑިސްޕެޗްކޮށްފައިވާނެ ކަމަށެވެ.
އަންހެން މީހާގެ ބަނޑަށް 8 މަސް ކަމަށާއި، އަދި އޭނާ އެމްބިއުލާންސް ތެރެއަށް ވިހޭއިރު، އެމްބިއުލާންސްގައި ޕެރެމެޑިކް ޓީމު އޮތް ކަމަށާއި، ކަންކަން ދިޔައީ ރަނގަޅަށް ކަމަށެވެ.
އެކަމަކު ހޮސްޕިޓަލަށް ގެންދިއުމާ ދޭތެރޭގައި ބައިގަޑިއެއްހާއިރު ހޭދަ ވެފައިވާ ކަމަށާއި، އެކަން ވީގޮތް ސާފުކުރި އިރު ބަލި މީހާ އުޅުނު ގެއިން ސްޓްރެޗަރގައި އޭނާ ނެރުމުގައި ދިމާވި ދަތިތަކަކާއި، އެފަދަ ބައެއް ކަންކަމުގެ ސަބަބުން ލަސްވީ ކަމަށެވެ.
ހޮސްޕިޓަލަށް ގެންދިއުމަށް ފަހު ތުއްތު ކުއްޖާ އަށާއި އަންހެން މީހާއަށް އެމަރޖެންސީގައި ފަރުވާދިން ކަމަށާއި، އެކަމަކު ކުއްޖާ ސަލާމަތް ނުވި ކަމަށެވެ.
އުމުރުން 29 އަހަރުގެ އަންހެން މީހާ އަކީ ކޮވިޑް-19 ޕޭޝަންޓެއްކަން އެނގުނީ ވެސް ހޮސްޕިޓަލަށް ގެންގޮސް އިތުރު ފަރުވާއަށް ޕޭޝަންޓް ހިސްޓްރީ ބެލުމުން ކަމަށާއި، ނަމަވެސް އެއްވެސް ފަރުވާއެއް ދިނުމުގައި ލަސްކޮށް ފަރުވާކުޑަކޮށްފައި ނުވާނެ ކަމުގެ ޔަގީންކަން އެރުވިއެވެ. އައިޖީއެމްއެޗުން ބުނީ ޕޭޝަންޓް ސްޓޭބަލްވުމުން އަންހެނުންގެ ބަލިތަކަށް ހާއްސަ އެމަޖަންސީ ރޫމަށް ބަދަލުކުރި ކަމަށާއި، މިހާރު ބަލި މީހާ އަށް ފަރުވާދެމުން އަންނަނީ ދަރުމަވަންތަ ހޮސްޕިޓަލުގެ ޑީއެޗް-16ގައި ކަމަށެވެ.
އެ ހޮސްޕިޓަލުން އިތުރަށް ބުނީ ގެނައި މާބަނޑު މީހާ އަކީ ކޮވިޑް ޕޭޝަންޓަކަށްވީ ނަމަވެސް އޭގެ ސަބަބުން އެހެން ބަޔަކަށް ބަލި ފެތުރުމުގެ ފުރުސަތު ނެތްކަމަށެވެ. އެގޮތުން ހުރިހާ ޑޮކްޓަރުންނާއި ނަރުހުން ވެސް ތިބީ ފުލް ޕީޕީއީ ކިޓްގައި ކަމަށާއި، ބަލި މީހާ ގެންދިއުމަށް ފަހުވެސް އަޅަން ޖެހޭ ރައްކާތެރިކަމުގެ ހުރިހާ ފިޔަވަޅެއް އަޅާފައިވާނެ ކަމަށެވެ.
