އަޅުގަނޑުގެ އިހުމާލެއް އޮތްތޯ ބަލާފައި އިސްތިއުފާދިނުމުގެ ކަންތަކުގައި ގޮތް ނިންމާނީ - ހެލްތު މިނިސްޓަރ
2 ޖޫން 2021 | ބުދަ 17:52މިޝްކާ ނިޔާވުމުގައި ކަމާބެހޭ ފަރާތްތަކުގެ އިހުމާލު އެބައޮތް
ހެލްތު މިނިސްޓަރ އަހުމަދު ނަސީމް
ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުދަ ދުވަހުގެ ރޭ ކުރިޔަށް ގެންދިޔަ ނޫސްވެރިންގެ ބައްދަލުވުމުގައި ނޫސްވެރިން ތަކުރާރުކުރި އެއް ސުވާލަކީ މިމައްސަލާގައި މިނިސްޓަރ އިސްތިއުފާ ދެއްވާނަންތޯ އެވެ. އެސުވާލަށް ޖަވާބު ދެއްވަމުން މިނިސްޓަރ ވިދާޅުވީ މިޝްކާގެ މަރުގެ މައްސަލައިގައި ކަން ހިނގާދިޔަ ގޮތް މިހާރު ބައްލަވަމުން ގެންދަވާކަމަށެވެ. އަދި އެރިޕޯޓް ބުދަ ދުވަހުގެ ރޭ ލިބިވަޑައިގަންނަވާނެކަމަށެވެ.
މީގެއިތުރުން މިނިސްޓަރުކަމުގައި ހުންނަވާ އަމިއްލަފުޅަށް އިހުމާލެއް އޮތްކަމަށް ބެލިދާނެކަމަށް ގަބޫލުކުރައްވަންތޯ ކުރެވުނު ސުވާލަށް ޖަވާބު ދެއްވަމުން މިނިސްޓަރ ވިދާޅުވީ އެކަން އަމިއްލަފުޅަށް ބެއްލެވޭނެކަމަށް ގަބޫލުކުރައްވާކަމަށެވެ.
މިޝްކާ ހޮސްޕިޓަލަށް ގެންދިޔުމުގައި ލަސްތަކެއްވެފައިވާކަމަށާއި އެކަމުގައި އިހުމާލުވެފައިވާކަމަށް ގަބޫލުކުރައްވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އެމްބިޔުލަންސް ދިޔުމުގައި ލަސްތަކެއް ދިމާވުމުގެ ސަބަބުން އެކަމާއި ގުޅިގެން މިޝްކާ ނިޔާވުމުގެ ކުރިން މިޝްކާގެ އާއިލާއާ މިނިސްޓަރ ފޯނުއް ގުޅުއްވާ ވާހަކަދެއްކެވި ކަމަށެވެ. އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުވެސް އެއާއިލާއަށް ގުޅުއްވާ ތައުޒިޔާ ވިދާޅުވެފައިވާކަމުގެ މައުލޫމާތު ލިބިވަޑައިގަންނަވާފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ހެލްތު މިނިސްޓްރީއަކީ 8000އްހާ މުވައްޒަފުން މަސައްކަތްކުރަމުން އަންނަ މިނިސްޓްރީއެއް ކަމަށެވެ. މަސައްކަތްތައް ކުރަމުން އަންނަނީ އެކި މީހުންނަށް ޒިންމާތައް ހަވާލުވެގެން ކަމަށްވާއިރު ސީދާ މިނިސްޓަރު އިހުމާލުވެފައިވަނީ ކޮން ހިސާބަކުންތޯ ބަލަންޖެހޭ ކަމަށް ދެކެވަޑައިގަންނަވާކަމަށް މިނިސްޓަރ ވިދާޅުވިއެވެ.
މިޝްކާގެ ކުއްލި މަރާ ގުޅިގެން ގިނަ ބަޔަކު އަންނަނީ މިނިސްޓަރުގެ އިސްތިއުފާއަށް ގޮވާލަމުންނެވެ.
