ކުޅުދުއްފުށި ސިޓީއިން ޒުވާނަކު ރަހީނުކޮށްގެން ގެންގޮސް އަނިޔާކުރި މައްސަލައިގައި ހައްޔަރު ކުރި ދެ މީހުންގެ ބަންދުގެ މުއްދަތު އިތުރުކޮށްފިއެވެ.

ފުލުހުން ބުނީ މި މައްސަލައިގައި ހިމެނޭ 2 މީހުންގެ ބަންދުގެ މުއްދަތު އިތުރުކުރުމަށް ކުޅުދުއްފުށި މެޖިސްޓްރޭޓް ކޯޓަށް ގެންދިއުމުން، ހޯމް މިނިސްޓްރީން ކަނޑައަޅާ ތަނެއްގައި 15 ދުވަހަށް ބަންދުކުރުމުގެ މުއްދަތެއް ދެއްވާފައިވާކަމަށެވެ. މިކަމާ ގުޅޭގޮތުން ފުލުހުން ބުނީ މި މައްސަލަ ފުލުހުން ތަހުގީގުކުރަމުން ގެންދާކަމަށާއި މި މައްސަލައާ ގުޅިގެން 1 ޖޫންގައި ދެ މީހަކު ހައްޔަރުކޮށްފައިވާކަމަށެވެ. ކޯޓު އަމުރެއްގެ ދަށުން ހައްޔަރުކޮށްފައިވަނީ 24 އަހަރާއި 25 އަހަރުގެ ދިވެހި 2 ފިރިހެނުންކަމަށް ފުލުހުން މަޢުލޫމާތުދެއެވެ. މީގެ އިތުރުން ޒުވާނާ ރަހީނުކޮށްގެން ގެންދިޔަކަމަށް ބެލެވޭ ކާރު ވެސް ކޯޓު އަމުރެއްގެ ދަށުން ފުލުހުންގެ ބެލުމެގެ ދަށަށް ވަނީ ގެންގޮސްފައެވެ.

މިކަމާ ގުޅިގެން ފުލުހުން މީގެ ކުރިން ބުނީ, ކުޅުދުއްފުށީގައި މޫނު ނިވާކޮށްގެން ތިބި ބަޔަކު 29 އަހަރުގެ ޒުވާނަކު ކާރަކަށް އަރުވައިގެން ގެންގޮސް އަނިޔާކޮށްފައި ވާކަމަށެވެ. މިކަން ފުލުހުންނަށް ރިޕޯޓު ކޮށްފައިވަނީ މެއި 29 ވަނަ ދުވަހުގެ ރޭ 20:48 ހާއިރު ކަމަށް ފުލުހުން މައުލޫމާތު ދެއެވެ.

ރާއްޖެ އެމްވީއާ ވާހަކަދެއްކި ކުޅުދުއްފުށި ރައްޔިތަކު ބުނީ ޒުވާނާއަށް އަނިޔާކުރީ ވައްކަން ކުރާތީކަމަށް ބުނެއެވެ. އޭނާ އެތައް ތަނަކުން ވައްކަން ކުރާ ވީޑިއޯއެއް ކަމަށް ބުނާ ވީޑިއޯއެއް މިފަހަކުން އާންމު ވިކަމަށެވެ. ހަމަލާ ދިނީ އޭނާ ވައްކަން ކުރާތީ އެކަމާ ރުޅިގަދަވެގެން ކަމަށް ވެސް މި މީހާ ކިޔައިދިނެވެ.

ޒުވާނާއަށް ލިބުނު އަނިޔާއަށް އެންމެ ފުރަތަމަ ފަރުވާ ދީފައިވަނީ ކުޅުދުއްފުށީ ރީޖަނަލް ހޮސްޕިޓަލުގައެވެ. އަދި އޭނާގެ ހާލު ދެރަވެ އިތުރު ފަރުވާއަށް މާލެ ގެނެސް މިހާރު އަންނީ އޭޑީކޭގައި ފަރުވާދެމުންނެވެ. މި ޒުވާނާގެ ބޮލުގެ ނާށިގަނޑުގެ ދެ ފަރާތުން ފަޅައިގެން ގޮސް ސިކުނޑިއަށް ގިނަ އަދަދަކަށް ލޭ އެޅިފައިވާތީ، ބޮލުގެ އޮޕަރޭޝަނެއް ވެސް ކޮށްފައިވާކަމަށް މަޢުލޫމާތުލިބެއެވެ.