މެއި މަހު ރާއްޖެ އައީ 64،613 ފަތުރުވެރިން
ފުރަތަމަ ފަސް މަހު ރާއްޖެ އައިސްފައި ވަނީ 454،383 ފަތުރުވެރިން
ރާއްޖެ އައި ފަތުރުވެރިންތަކެއް ވެލާނާ އިންޓަނެޝަނަލް އެއާޕޯޓްގައި
މި ނިމިގެންދިޔަ މެއި މަހު ރާއްޖެ އަންނަ ފަތުރުވެރިންގެ އަދަދު ދަށްވާން ފަށައި, މަސް ނިމުނު އިރު ރާއްޖެ އައިސްފައި ވަނީ 64،613 ފަތުރުވެރިންނެވެ.
ކޮވިޑް-19ގެ ސަބަބުން ފަތުރުވެރިކަމުގެ ސިނާޢަތަށް ގިނަ ގޮންޖެހުންތަކަކާ ކުރިމަތިލަމުންދާއިރު، މެއި މަހު ދުވާލެއްގެ މައްޗަށް އެވްރެޖްކޮށް ރާއްޖެ އައިސްފައި ވަނީ 2،084 ފަތުރުވެރިންނެވެ. މެއި މަސް ނިމުނު އިރު، 3،000ށް ވުރެ ގިނަ ފަތުރުވެރިން އައިސްފައި ވަނީ އެންމެ ތިން ދުވަހުއެވެ. އެއީ މެއި އެއް ވަނަ ދުވަހު އައި 3,815 ފަތުރުވެރިންނާއި ދެ ވަނަ ދުވަހު އައި 3,397 ފަތުރުވެރިންގެ އިތުރުން 11 ވަނަ ދުވަހު އައި 3,164 ފަތުރުވެރިންނެވެ.
މެއި މަހުގެ ފަހު ހަފްތާ ނިމުނު އިރު ދުވާލެއްގެ މައްޗަށް އައި ފަތުުވެރިންގެ އަދަދު 2،000ން މައްޗަށް ގޮސްފައެއް ނުވެއެވެ. އެގޮތުން 26 ވަނަ ދުވަހު 1،251 ފަތުރުވެރިން، 27 ވަނަ ދުވަހު 1،342 ފަތުރުވެރިން، 28 ވަނަ ދުވަހު 1،284 ފަތުރުވެރިން، 29 ވަނަ ދުވަހު 1،958 ފަތުރުވެރިން އަދި 30 ވަނަަ ދުވަހު 1،793 ފަތުރުވެރިންނާއި 31 ވަނަ ދުވަހު 1،195 ފަތުރުވެރިންނެވެ. މެއި މަހު އެންމެ މަދުން ފަތުރުވެރިން ރާއްޖެ އައިސްފައި މިވަނީ މަހުގެ އެންމެ ފަހު ދުވަހުއެވެ.
މިއަހަރުގެ ފުރަތަމަ ހަތަރު މަހު ރާއްޖެ އައި ފަތުރުވެރިންގެ އަދަދުތަކަށް ބަލާއިރު، ޖެނުއަރީ މަހު 92,103 ފަތުރުވެރިން ވަނީ ރާއްޖެ އައިސްފައެވެ. އަދި ފެބްރުއަރީ މަހު 96,882 ފަތުރުވެރިން ރާއްޖެ އައިސްފައިވާއިރު، މާޗް މަހު ރާއްޖެ އައިސްފައިވަނީ 109,585 ފަތުރުވެރިންނެވެ. އޭޕްރިލް މަހު 91,200 ފަތުރުވެރިން ވަނީ ރާއްޖެ އައިސްފައެވެ.
މިއަހަރު ފެށުނު އިރު ރާއްޖެ އަންނަ ފަތުރުވެރިންގެ އަދަދު އިތުރުވަމުން ދިޔަ ނަމަވެސް ރާއްޖޭގެ ކޮވިޑް ކޭސްތައް އިތުރުވާން ފެށުމާއެކު އޭގެ އަސަރު ދަނީ ފަތުރުވެރިކަމުގެ ސިނާއަތަށް ކުރަމުންނެވެ. ރާއްޖޭގެ ގިނަ މާކެޓްތަކަކުން ކޮވިޑްގެ ސަބަބުން ދަތުރުނުކުރެވޭ އިރު، ރާއްޖޭގައި ކޭސްތައް އިތުރުވަމުންދާތީ ގައުމުތަކުން ދަނީ ރާއްޖެއަށް ދަތުރުކުރަން ފަސްޖެހެމުންނެވެ. ރާއްޖޭގެ ކޮވިޑް ކޭސްތައް އިތުރުވުމުން ފަތުރުވެރިކަމަށް ކުރާނެ އަސަރާމެދު ކަންބޮޑުވާކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވަނީ އެކިފަހަރުމަތިން ވިދާޅުވެފައެވެ.
އަހަރުގެ ފުރަތަމަ ފަސް މަސް ނިމުނު އިރު ރާއްޖެއަށް 454،383 ފަތުރުވެރިން އައިސްފައިވާއިރު، މިއީ 2020 ވަަނަ އަހަރާ އަޅާބަލާއިރު 18 އިންސައްތައިގެ ކުރިއެރުމެކެވެ. ނަމަވެސް 2019 ވަނަ އަހަރު ރާއްޖޭގެ ފަތުރުވެރިކަމާއި އަޅާބަލާއިރު، އަދިވެސް ރާއްޖޭގެ ފަތުރުވެރިކަން އުޅެނީ 39 އިންސައްތަ ދަށުގައެވެ. ކޮވިޑާއެކު ރއްޖޭގައި ފަތުރުވެރިން ހޭދަކުރާ މުއްދަތު ވަނީ އިތުރުވެފައެވެ. އެގޮތުން ފަތުރުވެރިން ދަނީ އެވްރެޖްކޮށް ނުވަ ދުވަސް މިހާރު ރާއްޖޭގައި ހޭދަކުރަމުންނެވެ.
