އަންޗެލޮޓީ އަލުން އަނބުރާ ރެއާލަށް

އެވަޓަން ދޫކޮށްލައި އަލުން އަނބުރާ ރެއާލް މެޑްރިޑާ ހަވާލުވާން އިޓަލީގެ ތަޖުރިބާކާރު ކޯޗު ކާލޯ އަންޗެލޮޓީ ނިންމައިފިއެވެ.

އުމުރުން 61 އަހަރުގެ އަންޗެލޮޓީ އެވަޓަނުގެ ކޯޗުގެ މަގާމާ ހަވާލުވީ 2019 ވަނަ އަހަރުގެ ޑިސެމްބަރު މަހު، ހަތަރު އަހަރާ ބައިގެ އެއްބަސްވުމެއްގެ ދަށުންނެވެ. އެކަމަކު އަންގާރަ ދުވަހުގެ ވަގުތެއްގައި އޭނާ ވަނީ އެވަޓަނުގެ އެއްބަސްވުން އުވާލައި، ތިން އަހަރުގެ އެއްބަސްވުމެއްގެ ދަށުން ރެއާލަށް ބަދަލުވާން ނިންމާފައެވެ.

ރެއާލުގެ ކޯޗުގެ މަގާމަށް އަންޗެލޮޓީ ހަމަޖެއްސީ، އެ ޓީމުގެ ކޯޗުގެ މަގާމުން ވަކިވާން މިދިޔަ ހަފުތާގެ ބުދަ ދުވަހު ޒިނެދިން ޒިދާން ނިންމުމާ ގުޅިގެންނެވެ. ރެއާލް ދޫކޮށްލަން ދެވަނަ ފަހަރަށް ޒިދާން ނިންމިއިރު، އެ ޓީމުން މި ސީޒަން ނިންމާލީ ކާމިޔާބީއެއް ނެތިއެވެ. މިއީ މިދިޔަ 10 އަހަރު ތެރޭ ކާމިޔާބީއެއް ނެތި ރެއާލުން ސީޒަނެއް ނިންމާލި ފުރަތަމަ ފަހަރެވެ.

އެވަޓަން ދޫކޮށް ރެއާލުގެ ކޮޗުގެ މަގާމާ ހަވާލުވުމަށްފަހު އަންޗެލޮޓީ ވަނީ އެވަޓަނުގެ މެނޭޖްމަންޓަށް ޝުކުރުއަދާ ކޮށްފައެވެ. އޭނާ ބުނީ އެ ޓީމު ދޫކޮށް ރެއާލާ ގުޅެން ނިންމީ، މިއީ މި ވަގުތަށް ބަލާއިރު ދޫކޮށްލެވެން ނެތް ފުރުސަތަކަށް ވާތީ ކަމަށެވެ. ރެއާލުގެ ކޯޗުގެ މަގާމާ އެންޗެލޮޓީ ހަވާލުވިއިރު، އޭނާ ވަނީ މީގެ ކުރިން 2013 ވަނަ އަހަރުން ފެށިގެން 2015 ވަނަ އަހަރުގެ ނިޔަލަށް އެ ޓީމަށް ކޯޗުކޮށްދީފައެވެ. އަދި މި މުއްދަތުގައި ރެއާލުން ވަނީ ސްޕެނިޝް ކަޕާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބުކޮށްފައެވެ.

ރެއާލުގެ ކޯޗަކަށް އަންޗެލޮޓީ ހަމަޖެއްސިއިރު، ރިޕޯޓުތައް ބުނާ ގޮތުން އެ ޓީމުން އެންމެ ފުރަތަމަ މަސައްކަތް ކުރީ މަސިމިލިއާނޯ އެލެގްރީ ހޯދުމަށެވެ. އެކަމަކު އުމުރުން 53 އަހަރުގެ އެލެގްރީ ވަނީ އަލުން އަނބުރާ ޔުވެންޓަސްގެ ކޯޗުގެ މަގާމާ ދާދި ފަހުން ހަވާލުވެފައެވެ.