ހޯމަ ދުވަހު މާލެ ސަރަހައްދުން ޕޮޒިޓިވްވީ 488 މީހުން
31 މެއި 2021 | ހޯމަ 18:12އަތޮޅު ތެރެއިން ޕޮޒިޓިވް ވެފައިވަނީ 202 މީހުން
ފުލުހުން މަގުމަތީގައި ހަރަކާތްތެރި ވަނީ
ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން ކޮވިޑް-19އަށް ޕޮޒިޓިވްވެފައި ވަނީ 710 މީހުން ކަމަށް ހެލްތު ޕޮރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން ހާމަކޮށްފައިވާ އެންމެ ފަހުގެ ތަފާސް ހިސާބުތަކުން ދައްކާ ގޮތުގައި، ފާއިތުވެދިޔަ 24 ގަޑިއިރުގެ ތެރޭގައި 5،310 މީހުން ކޮވިޑަށް ޓެސްޓު ކޮށްފައިވާއިރު، އޭގެ ތެރެއިން ޕޮޒިޓިވްވެފައިވަނީ 710 މީހުންނެވެ. އެއީ މާލެ ސަރަހައްދުން ޕޮޒިޓިވްވި 488 މީހުންނާއި، އަތޮޅު ތެރެއިން ޕޮޒިޓިވްވި 202 މީހުންގެ އިތުރުން، ހަދަމުން އަންނަ ރިސޯޓުތަކުން ޕޮޒިޓިވްވި 15 މީހުންނެވެ.
އިތުރަށް ޕޮޒިޓިވްވީ 710 މީހުންނާއެކު، އެކްޓިވް ކޭސްތަކުގެ އަދަދު ވަނީ 24،109 ށް އަރާފައެވެ. އަދި މިހާރު ހޮސްޕިޓަލުތަކުގައި އެޑްމިޓްކޮށްގެން ފަރުވާ ދެމުން ދަނީ 204 މީހުންނަށެވެ. ރާއްޖެއިން މި ބަލީގައި 161 މީހުން ނިޔާވެފައިވާއިރު، 40،117 މީހުން ވަނީ ބަލިން ފަސޭހަވެފައެވެ.
އެޗްޕީއޭއިން އެންމެ ފަހުން އާންމު ކުރި މައުލޫމާތުތައް ދައްކާ ގޮތުން، މިއަހަރުގެ ޖެނުއަރީ މަހުން ފެށިގެން، ޕޮޒިޓިވްވާ މީހުންގެ ތެރޭގައި ގިނައީ އުމުރުން 18 އަހަރާއި 49 އަހަރާ ދެމެދުގެ މީހުންނެވެ. މި އުމުރު ފުރައިގެ 50 އިންސައްތަ މީހުން ޕޮޒިޓިވްވެފައި ވެއެވެ.
މާލެ ސަރަހައްދުގައި ޓެސްޓް ކުރެވޭނެ ސެންޓަރުތަކާއި ފްލޫ ކްލިނިކްތައް ހަމަޖައްސައި، ވަކި ގަޑިތަކެއް މިހާރު ވަނީ ކަނޑައަޅާފައެވެ. އެގޮތުން މާލޭގައި ސާމްޕަލް ނަގާ ސެންޓަރުތަކުގެ ތެރެއިން ހ. މުނިއުފާއާއި، ސޯޝަލް ސެންޓަރުގައި ހޮނިހިރު ދުވަހުން ފެށިގެން ބުރާސްފަތި ދުވަހަށް، ކޮންމެ ދުވަހަކު ވެސް ހެނދުނު 9:00އިން މެންދުރުފަހު 3:30އަށް ސާމްޕަލް ނަގާނެއެވެ. ހުކުރު ދުވަހު ސާމްޕަލް ނަގާނީ ހެނދުނު 10:00އިން 11:30އަށް، އަދި މެންދުރު 1:30އިން ހަވީރު 4:00އަށެވެ.
ހުޅުމާލޭގައި ސާމްޕަލް ނަގަން ހަމަޖެހިފައި ވަނީ މެންދުރު 1:00އިން ހަވީރު 4:00އަށެވެ. އަދި ވިލިމާލޭގައި ސާމްޕަލް ނަގާނީ މެންދުރު 2:30އިން ހަވީރު 4.00އަށެވެ.
