ފިނޮޅެއް ނައްތާލަން އުޅުނު މައްސަލައިގައި ގިލިލަންކަންފުށި ޖޫރިމަނާކޮށްފި

ކ. ހިންމަފުށި ކައިރީގައި އޮންނަ ފިނޮޅަކަށް ގިލިލަންކަންފުށި މޯލްޑިވްސް ރިސޯޓުގެ މުވައްޒަފުންތަކެއް އަރައި އެ ފިނޮޅުގައި ކޯރު ކެނޑި މައްސަލައިގައި ފަސްލައްކަ ރުފިޔާއަށްވުރެ ބޮޑު އަދަދަކުން އެ ރިސޯޓު ޖޫރިމަނާކޮށްފިއެވެ.

ހިންމަފުއްޓާއި ގިލިލަންކަންފުއްޓާ ދެމެދު އޮންނަ ފިނޮޅަށް ގިލިލަންކަންފުށި ރިސޯޓުގެ ކުރީގެ ޖެނެރަލް މެނޭޖަރު ޑޭވިޑް ސްޓެޕޮޓިކް އާއި އެހެން މުވައްޒަފުންތަކެއް އަރައި, އެ ފިނޮޅުގެ ހުރަހަށް ފެން ދައުރުވާ ގޮތަށް ކޯރު ކެނޑި މައްސަލަ ފެންމަތިވީ ޖެނުއަރީ މަހުގެ ފަހުކޮޅުގައެވެ. އެކަމާ ގުޅިގެން ހިންމަފުށީ ކައުންސިލުންނާއި ތިމާވެށި ހިމާޔަތްކުރުމަށް މަސައްކަތްކުރާ އެތައް ޖަމްޢިއްޔާއަކުންނާއި އާންމު ރައްޔިތުން ވަނީ އެކަން ކުށްވެރިކޮށް، އެކަން ކުރި ފަރާތްތަކާ ދެކޮޅަށް ފިޔަވަޅު އެޅުމަށް ސަރުކާރަށް ގޮވާލާފައެވެ.

އެ މައްސަލައިގައި އަމާޒުވި ފާޑުކިޔުންތަކާއެކު, އެ ރިސޯޓުގެ ޖެނެރަލް މެނޭޖަރު ވަނީ މަގާމުން އިސްތިއުފާދީފައެވެ.

ފިނޮޅު ނައްތާލަން އުޅުނު މައްސަލަ އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އާއި ފުލުހުން ވެސް ތަހުގީގުކޮށްފައިވެއެވެ.

ތަހުގީގަށްފަހު އީޕީއޭއިން އާދީއްތަ ދުވަހު ނެރުނު ނޫސްބަޔާނުގައި ބުނެފައިވަނީ 21 ޖެނުއަރީ ގައި ގިލިލަންކަންފުށީގެ މުވައްޒަފުންތަކެއް އަރައި, ފިނޮޅުގެ ހުރަހަށް ފެން ދައުރުވާނެ ގޮތަށް ފަސްގަނޑު ކޮނެ, އެ ފިނޮޅުގެ ވެލިގަނޑު ގިރައިގެން ދާނެ ގޮތަށް ކޯރު ކެނޑި މައްސަލައިގައި ފުލުހުންނާއި ގުޅިގެން ކުރިތަހުގީގަށް އެކަން ހިނގިކަން ޔަގީން ކުރެވިފައި ވާކަމަށެވެ. އަދި އެ ފިނޮޅިގެ ތިން ސަރަހައްދަކުން ކޯރު ކަނޑާފައިވާކަން ފާހަގަކުރެވިފައި ވާކަމަށް އީޕީއޭގެ ބަޔާނުގައި ބުނެފައި ވެއެވެ.

މި މައްސަލައާއި ގުޅިގެން, ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ ދަށުން ކަނޑައެޅިފައިވާ ޖޫރިމަނާގެ ޖުމްލަ އަދަދުކަމަށްވާ 562,980 (ފަސްލައްކަ ފަސްދޮޅަސް ދެހާސް ނުވަސަތޭކަ އަށްޑިހަ) ރުފިޔާއިން ޖޫރިމަނާ ކޮށްފައި ވާކަމަށް އީޕީއޭއިން ބުނެއެވެ.

ޖޫރިމަނާގެ ފައިސާ 30 ދުވަހުގެ ތެރޭގައި ދެއްކުމަށް ބުރާސްފަތި ދުވަހު ގިލިލަންކަންފުށި އޮޕަރޭޓްކުރާ ޕްރޯމަސް ޕްރައިވެޓް ލިމިޓެޑަށް އީޕީއޭއިން ވަނީ އަންގާފައެވެ.

ރޭގަނޑުގެ ވަގުތުގައި ހިންމަފުށި ކައިރީގައި އޮންނަ ފިނޮޅަށް އަރާ އެ ފިނޮޅުގައި ކޯރު ކެނޑުމުގެ މަސައްކަތުގައި އުޅެނިކޮށް އެކަން ހުއްޓުވީ ހިންމަފުށީ އާންމުންގެ ބަޔަކު އެތަނަށް ގޮހެވެ. އެކަން ކުރީ, ފިނޮޅު ނައްތާލަންކަމަށް ބުނެ އެފަރާތްތަކާ ދެކޮޅަށް އެޅޭނެ އެންމެ ހަރުކަށި ފިޔަވަޅު އަޅައި ދިނުމަށް ހިންމަފުށީ ކައުންސިލުން ވެސް ކަމާބެހޭ ފަރާތްތަކަށް އޭރު ގޮވާލާފައިވެއެވެ.