މިދިޔަ ހަފްތާއާ ހަމައަށް އެމްޑަބްލިޔުއެސްސީގެ 75 މުވައްޒަފުން ކޮވިޑަށް ޕޮޒިޓިވް

މިދިޔަ ހަފްތާއާ ހަމައަށް މާލޭ ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް (އެމްޑަބްލިޔުއެސްސީ) ގެ 75 މުވައްޒަފުން ކޮވިޑަށް ޕޮޒިޓިވްވެފައިވާ ކަމަށް އެ ކުންފުނިން ހާމަކޮށްފިއެވެ.

ރާއްޖެޓީވީއަށް ދެއްވި އިންޓަވިއުއެއްގައި އެމްޑަބްލިޔުއެސްސީގެ މެނޭޖިންގ ޑިރެކްޓަރ ހަސަން ޝާހް ވިދާޅުވީ ކޮވިޑަށް ޕޮޒިޓިވްވި މުވައްޒަފުންގެ ތެރޭގައި ޑިޕާޓްމަންޓުންގެ ހެޑުން ހިމެނޭ ކަމަށެވެ. ކުންފުނީގެ އެންމެ މުހިންމު އެއް ޑިވިޝަންކަމުގައިވާ އިންޖީނިއަރިންގ ޑިވިޝަންގެ އެކި ޑިޕާޓްމަންޓްތަކުގެ ވެރިން ކޮވިޑަށް ޕޮޒިޓިވްވެފައިވާ ކަމަށާއި އެ މީހުންނާއި ކޮންްޓެކްޓްވި މީހުން، އައިސޮލޭޝަންގައި ތިބެން ޖެހުނު ކަމަށް ޝާހު ވިދާޅުވިއެވެ.

އެކަމުގެ ސަބަބުން މަސައްކަތްތަކަށް ބުރޫ އަރާކަން ފާހަގަކުރައްވައި ޝާހު ވިދާޅުވީ މަސައްކަތް ކުރިއަށްދާ ކޮންމެ ރަށެއްގައި ވެސް ސައިޓް އިންޖީނިއަރަކު ހުންނަ ޖެހޭ ކަމަށެވެ. އަދި އެ ސައިޓް އިންޖީނިއަރަކީ ފަސް އަހަރުގެ ތަޖުރިބާ ހުރި އެ ދާއިރާއިން ޑިގްރީ އޮންނަ މީހަކަށްވާން ޖެހޭ ކަމަށެވެ. އެހެންކަމުން މި ޝަރުތައް ހަމަވާ މީހުން ރާއްޖެއިންނާއި ބޭރު ޤައުމުތަކުން ވެސް ހޯދަން އުނދަގޫވާ ކަމަށެވެ. އެހެންކަމުން އެމްޑަބްލިޔުއެސްސީން ކުރިއަށް ގެންދާ މަސައްކަތްތަކަށް މަޑުޖެހުމެއް ނުވަތަ ލަސްކަމެއް އައިސްފައިވާ ކަމަށް ޝާހު ވިދާޅުވިއެވެ.

ސަރުކާރުގެ ކުންފުނިތަކުން މިހާރު ޚިދުމަތް ފޯރުކޮށްދެމުންދަނީ އޮންލައިންކޮށެވެ. ސަރުކާރުން ވަނީ ޖޫން 8 ވަނަ ދުވަހާ ހަމައަށް ސަރުކާރު އޮފީސްތައް ހުޅުވައިގެން މަސައްކަތް ނުކުރާ ގޮތަށް ހަމަޖައްސާފައެވެ.

ކޮވިޑް-19 އިން ރައްކާތެރިވުމަށް ހެލްތް ޕްރޮޓެކްޝަން އެޖެންސީ އިން މުޅި ރާއްޖޭގައި ޚާއްޞަ ފިޔަވަޅުތަކެއް އަޅަން އެންގުމާ ގުޅިގެން، މި ހިނގާ މޭ މަހުގެ 5 ވަނަ ދުވަހުން ފެށިގެން 25 ވަނަ ދުވަހުގެ ނިޔަލަށް މާލެ ސަރަޙައްދު (މާލެއާއި، ހުޅުމާލެއާއި، ވިލިނގިއްޔާއި، ތިލަފުށްޓާއި، ގުޅީފަޅު) ގައިވާ ސަރުކާރުގެ އޮފީސްތައް ހުޅުވައިގެން މަސައްކަތް ނުކުރާ ގޮތަށް ކުރިން ވަނީ ހަމަޖައްސާފައެވެ. މި މުއްދަތު، ޖޫން މަހުގެ 8 ގެ ނިޔަލަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިހާރު މިވަނީ އިތުރު ކުރައްވާފައެވެ.

އަންގާރަ ދުވަހު ރައީސުލްޖުމްހޫރިއްޔާގެ އޮފީހުން ނެރުއްވާފައިވާ ދެންނެވުމުގައި ވާގޮތުން މި މުއްދަތުގެ ތެރޭގައި މުވައްޒަފުން ގޭގައި ތިއްބަވައިގެން ކުރެއްވެން ހުރި މަސައްކަތްތައް ގޭގައި ތިއްބަވައިގެން ކުރައްވަމުން ގެންދެވުމަށާއި، ސަރުކާރުގެ އިދާރާތަކުން އޮންލައިންކޮށް ދެއްވެން ހުރި ހުރިހައި ޚިދުމަތްތަކެއް އޮންލައިންކޮށް ދެއްވަމުން ގެންދެވުމަށް ވަނީ އަންގަވާފައެވެ. އަދި އެމަނިކުފާނު ވަނީ ސަރުކާރުގެ އިދާރާތަކުން ދެއްވާ އަސާސީ ޚިދުމަތްތައް ދެއްވުމަށާއި، އިދާރާއަކުން ކޮންމެހެން ކުރަންޖެހޭ މަސައްކަތެއް ކުރުމަށްޓަކައި މުވައްޒަފުން ހާޒިރުވާން ޖެހިއްޖެނަމަ، އެ އިދާރާއެއްގެ ވަޒީރު ނުވަތަ އެންމެ އިސްވެރިޔަކު ކަނޑައަޅުއްވާ ގޮތެއްގެ މަތިން އެ އިދާރާއަކަށް މުވައްޒަފުން ހާޒިރުވެގެން، ހެލްތް ޕްރޮޓެކްޝަން އެޖެންސީން ކަނޑައަޅާފައިވާ މިންގަނޑުތަކާ އެއްގޮތަށް މަސައްކަތް ކުރެވިދާނެ ކަމުގައި ވެސް އަންގަވާފައެވެ.

ސަރުކާރުގެ އިދާރާތައް ހުޅުވައިގެން މަސައްކަތް ނުކުރާ ގޮތަށް ހަމަޖެއްސެވުމުގެ އެންމެ ބޮޑު ބޭނުމަކީ ކޮވިޑް-19 ކޮންޓްރޯލް ކުރުން ކަމަށްވާތީ، މި މުއްދަތުގެ ތެރޭގައި ހެލްތް ޕްރޮޓެކްޝަން އެޖެންސީން އަންގަވާ އެންގެވުންތަކަށް އެންމެހައި މުވައްޒަފުން ބޯލަނބައި ކިޔަމަންގަތުމަށާއި، އެ އެޖެންސީން ދެއްވާ އިރުޝާދުތަކާ އެއްގޮތަށް ޢަމަލު ކުރެއްވުމަށް ޚާއްޞަ ސަމާލުކަމެއް ދެއްވުމަށް ރައީސުލްޖުމްހޫރިއްޔާ ވަނީ އަންގަވާފައެވެ. ހަމަ އެއާއެކު މާލެ ސަރަޙައްދުގެ ސަރުކާރުގެ އޮފީސްތައް ހުޅުވައިގެން މަސައްކަތް ނުކުރާގޮތަށް ހަމަޖެއްސެވި މި ދުވަސްތަކަކީ ސަރުކާރު ބަންދު ދުވަސްތަކެއް ނޫންކަމުގައި ވެސް އެމަނިކުފާނު ވަނީ މި ދެންނެވުމުގައި އަންގަވާފައެވެ.