ކުޅުދުއްފުށީގައި ރަހީނުކޮށްގެން އަނިޔާކުރި ޒުވާނާ އިތުރު ފަރުވާއަށް މާލެ ގެންނަނީ
30 މެއި 2021 | އާދީއްތަ 05:29ޒުވާނާއަށް އަނިޔާކޮށްފައިވަނީ މޫނު ނިވާކޮށްގެން ތިބި ބައެއް
ކުޅުދުއްފުށި ހޮސްޕިޓަލް
ހދ. ކުޅުދުއްފުށީގައި ޒުވާނަކު ރަހީނުކޮށްގެން ގެންގޮސް އަނިޔާކުރި މައްސަލައެއް ފެންމަތި ވެއްޖެއެވެ.
މިކަމާ ގުޅިގެން ފުލުހުން ބުނީ, ކުޅުދުއްފުށީގައި މޫނު ނިވާކޮށްގެން ތިބި ބަޔަކު 29 އަހަރުގެ ޒުވާނަކު ކާރަކަށް އަރުވައިގެން ގެންގޮސް އަނިޔާކޮށްފައި ވާކަމަށެވެ. މިކަން ފުލުހުންނަށް ރިޕޯޓު ކޮށްފައިވަނީ ރޭ 20:48 ހާއިރު ކަމަށް ފުލުހުން މައުލޫމާތު ދެއެވެ.
ޒުވާނާއަށް ލިބުނު އަނިޔާއަށް ކުޅުދުއްފުށީ ރީޖަނަލް ހޮސްޕިޓަލުގައި ގެންދަނީ ފަރުވާ ދެމުންނެވެ. އަދި އޭނާގެ ހާލު ދެރަވެ އިތުރު ފަރުވާއަށް މާލެ ގެނައުމުގެ މަސައްކަތް މިހާރު ގެންދަނީ ކުރަމުންނެވެ.
މިކަމާ ގުޅިގެން އެއްވެސް މީހަކު މިހާތަނަށް ހައްޔަރުކޮށްފައި ވާކަމުގެ މައުލޫމާތު ފުލުހުން އަދި ދީފައެއް ނުވެއެވެ.
މި މައްސަލަ ފުލުހުން މިހާރު ގެންދަނީ ތަހުގީގު ކުރަމުންނެވެ.
