ސިޓީ ބަލިކޮށް ޗެމްޕިއަންކަން ޗެލްސީއަށް

ޔުއެފާ ޗެމްޕިއަންސް ލީގުގެ ފައިނަލް މެޗުގައި މެންޗެސްޓާ ސިޓީ ބަލިކޮށް، މުބާރާތުގެ ޗެމްޕިއަންކަން ދެވަނަ ފަހަރަށް ޗެލްސީން ހޯދައިފިއެވެ.

ޕޯޗުގަލުގެ ޕޯޓޯގައި ހޮނިހިރު ދުވަހުގެރޭ ކުޅުނު ފައިނަލް މެޗުން ޗެލްސީ މޮޅުވީ 1-0 ގެ ނަތީޖާއަކުންނެވެ. މިއީ މި އަހަރުގެ ޖެނުއަރީ މަހު ޗެލްސީގެ ކޯޗުގެ މަގާމާ ހަވާލުވި ތޯމަސް ޓުޗެލްގެ ފުރަތަމަ ކާމިޔާބީއެވެ. އަދި މިއީ ޓުޗެލްގެ ކޯޗިން ކެރިއަރުގައި ކާމިޔާބުކުރި ފުރަތަމަ ޗެމްޕިއަންސް ލީގެވެ. ޓުޗެލް ވަނީ މިދިޔަ ސީޒަނުގައި މުޅިން އަލަށް ޕީއެސްޖީއަށް ޗެމްޕިއަންސް ލީގުގެ ފައިނަލުން ފުރުސަތު ހޯދައިދީފައެވެ. އެކަމަކު އެ ފަހަރުގެ ފައިނަލުން ޕީއެސްޖީ ވަނީ ބަޔާން މިއުނިކް އަތުން 1-0 ގެ ނަތީޖާއަކުން ބަލިވެފައެވެ.

ޗެލްސީގެ ތާރީޚުގައި އެ ޓީމުން ދެވަނަ ފަހަރަށް ޗެމްޕިއަންސް ލީގު ކާމިޔާބުކުރިއިރު، އެ ޓީމުން މީގެ ކުރިން މި މުބާރާތް ކާމިޔާބުކޮށްފައިވަނީ 2011-2012 ވަނަ އަހަރުގެ ސީޒަނުގައެވެ. އެ ފަހަރު ޗެލްސީން ޗެމްޕިއަންސް ލީގު ކާމިޔާބުކުރިއިރު، ކޯޗަކަށް ހުރީ އެ ސީޒަނުގެ މެދުތެރެއިން ޓީމާ ހަވާލުވި އިޓަލީގެ ކޯޗު ރޮބާޓޯ ޑި މަޓެއޯއެވެ.

ޕޯޓޯގެ އެސްޓާޑިއޯ ޑޮ ޑްރާގޯ ސްޓޭޑިއަމުގައި ކުޅުނު ފައިނަލް މެޗުގެ ފުރަތަމަ ހާފުގައި ގިނަ ފުރުސަތުތަކެއް ތަނަވަސްކޮށްފައިވަނީ ޗެލްސީންނެވެ. އެގޮތުން މެޗުގެ 14 ވަނަ މިނެޓުގައި ޗެލްސީގެ ޓިމޯ ވާނާއަށް އޭރިއާ ތެރެއިން ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ސިޓީގެ ގޯލްކީޕަރު އެޑާސަން ވަނީ ދިފާއުކޮށްފައެވެ. އަދި މި ހާފުގައި ސިޓީގެ ފިލް ފޯޑެންއަށްވެސް ވަނީ ހުސް ފުރުސަތެއް ލިބި ބޭކާރުވެފައެވެ.

މި މެޗުގައި ފެނިގެންދިޔަ ހަމައެކަނި ލަނޑު ޗެލްސީން ކާމިޔާބުކޮށްފައިވަނީ ފުރަތަމަ ހާފު ނިމެން ތިން މިނެޓަށް ވެފައި ވަނިކޮށެވެ. މޭސަން މައުންޓް ދިން ރީތި ޕާހަކުން މި ލަނޑު އެ ޓީމަށް ކާމިޔާބުކޮށްދިނީ މިދިޔަ އަހަރުގެ ހޫނު މޫސުމުގައި އެ ޓީމާ ގުޅުނު ޖަރުމަނުގެ ފޯވާޑް ކައި ހަވާޓްޒްއެވެ. މި މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި ލީޑު ފުޅާކުރަން ޗެލްސީގެ ކްރިސްޓިއަން ޕުލިސިކަށް ވަނީ މުޅިން ހުސް ފުރުސަތެއް ލިބި ބޭކާރުވެފައެވެ.

ސިޓީ ބަލިކޮށް ޗެލްސީން ޗެމްޕިއަންސް ލީގު ކާމިޔާބުކުރިއިރު، ޗެލްސީގެ ކޯޗުގެ މަގާމާ ތޯމަސް ޓުޗެލް ހަވާލުވި ފަހުން ސިޓީއާ ދެކޮޅަށް ކުޅުނު ތިން މެޗުންވެސް ޗެލްސީ ވަނީ މޮޅުވެފައެވެ.

މި ފަހަރުގެ ފައިނަލަކީ މެންޗެސްޓާ ސިޓީގެ ތާރީޚުގައި އެ ޓީމުން ކުޅުނު ފުރަތަމަ ޗެމްޕިއަންސް ލީގެވެ. މިހާތަނަށް ސިޓީއަށް ޗެމްޕިއަންސް ލީގު ކާމިޔާބުކުރެވިފައި ނުވާއިރު، ސިޓީގެ ކޯޗު ޕެޕް ގާޑިއޯލާ އެންމެ ފަހުން ޗެމްޕިއަންސް ލީގު ކާމިޔާބުކޮށްފައިވަނީ 2011 ވަނަ އަަހަރު ބާސެލޯނާގައި ހުރެއެވެ.