ކޮވިޑްގައި އިތުރު މަރެއް، ޖުމުލަ 157ށް
ނިޔާވެފައިވަނީ އުމުރުން 71 އަހަރުގެ ފިރިހެނެއް
ދަރުމަވަންތަ ހޮސްޕިޓަލް
ކޮވިޑް-19ށް ފަރުވާ ހޯދަމުން ދިޔަ އިތުރު މީހަކު ނިޔާވެއްޖެއެވެ.
ރާއްޖެއެމްވީއަށް އެނގިފައިވާ ގޮތުގައި ނިޔާވެފައިވަނީ އުމުރުން 71 އަހަރުގެ ފިރިހެނެކެވެ. މިއީ ރާއްޖެއިން މި ބަލީގައި ނިޔާވި 157 ވަނަ މީހާއެވެ.
ހުކުރު ދުވަހު އެކަނިވެސް 5 މީހަކު މި ބަލީގައި ނިޔާވެފައިވެއެވެ. އެއީ ހުކުރު ދުވަހުގެ ހެނދުނު 10:53 ގައި ޑީއެޗް-11 ގައި ނިޔާވި އުމުރުން 69 އަހަރުގެ ދިވެހި އަންހެނަކާއި، ހުޅުމާލެ މެޑިކަލް ފެސިލިޓީގައި ފަރުވާ ދެމުންދިޔަ އުމުރުން 54 އަހަރުގެ ފިރިހެނަކާއި 47 އަހަރުގެ ފިރިހެނެކެވެ. މީގެ އިތުރުން 61 އަހަރުގެ ފިރިހެނކާއި 84 އަހަރުގެ ފިރިހެނަކުވެސް ހުކުރު ދުވަހުގެ ރޭގެ ވަގުތެއްގައި ވަނީ ނިޔާވެފައެވެ.
ރާއްޖެއިން ފެންނަމުންދާ ކޮވިޑު ކޭސްތަކުގެ އަދަދުތައް އިތުރުވެފައިވާއިރު، ކޮންމެ ދުވަހަކުވެސް ހާހަކަށްވުރެ ގިނަ މީހުން އެވްރެޖްކޮށް ބަލި ޖެހިގެން ދަނީ ރިޕޯޓު ކުރަމުންނެވެެ. އަދި ކޮންމެ ދުވަހަކުވެސް ގިނަ ބަޔަކު މި ބަލީގައި ނިޔާވަމުންދާއިރު، މި މަހުގެ 24 ވީ ހޯމަ ދުވަހު ޖުމްލަ 13 މީހަކު ވަނީ ނިޔާވެފައެވެ. މިއީ ވައިރަސް ޖެހިގެން އެއްދުވަހާ އެންމެ ގިނަ އަދަދެއްގެ މީހުން ނިޔާވި ދުވަހެވެ.
ބަލީގެ ހާލަތު އިންތިހާއަށް ގޯސްވެފައިވާއިރު، އައިސީޔޫގައި ފަރުވާ ދޭން ޖެހޭ ޒުވާނުންގެ ނިސްބަތް ގިނަކަން އެޗްއީއޯސީގެ ޑޮކްޓަރުން ފާހަގަކުރައްވާފައިވެއެވެ. ކުރިއާ ޚިލާފަށް މިހާރު އައިސީޔޫގައި އޮވެ އަލާމާތްތައް ފެންނަތާ 10 ދުވަހުގެ ތެރޭގައި ބަލިމީހާގެ ހާލު ސީރިއަސްވާކަމަށް އައިޖީއެމްއެޗްގެ ޑރ. މުހައްމަދު އިސްމާއިލް ވަނީ ދާދި ފަހުން ވިދާޅުވެފައެވެ.
