އައްޑޫ ސިޓީން އިތުރު 16 މީހަކު ޕޮޒިޓިވްވެ، 82 މީހުން ބަލިން ރަނގަޅުވެއްޖެ

ފާއިތުވި 24 ގަޑިއިރު އައްޑޫ ސިޓީން އިތުރު 16 މީހަކު ކޮވިޑަށް ޕޮޒިޓިވްވެއްޖެއެވެ.

އައްޑޫ އެކުއެޓޯރިއަލް ހޮސްޕިޓަލުން ބުނީ ބުދަ ދުވަހުގެ އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00ށް ނެގުނު 96 ސާމްޕަލްގެ ތެރެއިން އިތުރު 16 މީހަކު ޕޮޒިޓިވްވެފައިވާ ކަމަށެވެ. މިހާތަނަށް 260 މީހަކު ޕޮޒިޓިވްވެފައިވާއިރު، 176 އެކްޓިވް ކޭސް ހިމެނެއެވެ.

Advertisement

އެކުއެޓޯރިއަލް ހޮސްޕިޓަލުން ބުނީ 82 މީހަކު ބަލިން ރަނގަޅުވެފައިވާ ކަމަށާއި، 3600 ސާމްޕަލް ނަގާފައިވާ ކަމަށެވެ. އަދި ޚާއްސަ ސަމާލުކަމެއް ދީގެން ސާމްޕަލް ނެގުމުގެ މަސައްކަތްތައް ކުރިއަށްދާ ކަމަށް ވެސް އެ ހޮސްޕިޓަލުން ފާހަގަކޮށްފައިވެއެވެ.

ތަފާސްހިސާބުތަކަށް ބަލާއިރު، ފޭދޫއިން 10 މީހުން، މަރަދޫފޭދޫއިން އެކަކު، މަރަދޫއިން 10 މީހުން، ހިތަދޫއިން 111 މީހުން، ރިސޯޓުން 2 މީހުން، މީދޫއިން 8 މީހުން، ހުޅުދޫއިން 33 މީހުން، އަދި ގަމުން އެކަކު ޕޮޒިޓިވްވެފައިވާ ކަމަށެވެ.

އައްޑޫ ސިޓީން މިހާތަނަށް ދެމީހަކު މިބަލީގައި ނިޔާވެފައިވެއެވެ.

އައްޑޫ ސިޓީގައި ކޮވިޑް-19 ފެތުރެމުންދާތީ ރައްކާތެރިވުމުގެ ގޮތުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ކޮންމެހެން ނުކުންނަން ޖެހިގެން މެނުވީ ނުނިކުތުމަށް އިލްތިމާސްކޮށްފައިވާއިރު، އަސާސީ ޚިދުމަތްތައް ފޯރުކޮށްދިނުމުގައި ރައްޔިތުންނަށް ލުއި ފަސޭހަވާނެ ގޮތަށް ކަންކަން އިންތިޒާމް ކުރުމުގެ މަސައްކަތް އައްޑޫ ސިޓީ ކައުންސިލުން ދަނީ ކުރަމުންނެވެ. އައްޑޫ ސިޓީ ކައުންސިލްގެ އިދާރާއާއި، އެއިދާރާގެ ދަށުން ހިނގަމުންދާ އަވަށު އޮފީސްތަކުން ދެމުންގެންދާ އެންމެހާ ޚިދުމަތްތައް ދިނުންް ވަގުތީ ގޮތުން ވަނީ މެދުކަނޑާލާފައެވެ.

ޑެޕިއުޓީ މޭޔަރު މުހައްމަދު ޝުއާއު ބަލި ކޮންޓްރޯލް ކުރުމުގައި އާއްމު ރައްޔިތުންގެ ފުރިހަމަ އެއްބާރުލުން ބޭނުންވާ ކަމަށެވެ.

އައްޑޫ ސިޓީ ދެވަނަ ފަހަރަށް މޮނިޓަރިންގެ ހާލަތަށް ގެނައީ 1 މެއި ވީ ހޮނިހިރު ދުވަހުގެ ވަގުތެއްގައެވެ. މުޅި އައްޑޫ ސިޓީ މޮނިޓަރިންގެ ހާލަތަށް ގެންދިޔަ އިރު މިދިޔަ ފެބުރުއަރީ މަހުގެ 6 ވަނަ ދުވަހު ވެސް އައްޑޫ ސިޓީ މޮނީޓަރިން ހާލަތަށް ގެންދިޔައެވެ. އެ ފަހަރުގެ މޮނިޓަރިންގެ ހާލަތު އުވާލީ މާޗު މަހުގެ 13 ވަނަ ދުވަހު އެވެ.