ލޯކަލް ގަވަރމަންޓް އޮތޯރިޓީގެ ބޯޑަށް، ކައުންސިލަރުންގެ ތެރެއިން އިންތިޚާބުކުރާ މެންބަރުން ހޮވުމަށް ބާއްވާ އިންތިޚާބު ފަސްކޮށްފިއެވެ.

މި އިންތިޚާބު ބާއްވަނީ އިލެކްޝަންސް ކޮމިޝަން (އީސީ) އިންނެވެ. އިލެކްޝަންސް ކޮމިޝަނުން ބުރާސްފަތި ދުވަހު އާންމުކުރި އިއުލާނެއްގައި ބުނެފައިވަނީ، ވޯޓުލުމަށް ކުރިން އިޢުލާންކޮށްފައިވާ ގަޑިއަށް ބަދަލު ގެނައުމަށް ނިންމާފައިވާ ކަމަށެވެ. އެގޮތުން ލޯކަލް ގަވަރމަންޓް އޮތޯރިޓީގެ ބޯޑަށް ކައުންސިލަރުންގެ ތެރެއިން މެންބަރުން ހޮވުމަށް ބާއްވާ އިންތިޚާބުގެ އުސޫލުގެ 24 ވަނަ މާއްދާގައިވާ ގޮތުގެ މަތިން، މި އިންތިޚާބުގައި ދިވެހިރާއްޖޭގެ މީހުން ދިރިއުޅޭ ހުރިހާ ރަށެއްގައި ވޯޓުފޮށި ބެހެއްޓުމަށް ނިންމާފައިވާ ކަމަށެވެ.

އަދި ކޮވިޑް-19ގެ ހާލަތާ ގުޅިގެން ރައްކާތެރިކަމުގެ ފިޔަވަޅު އެޅުމުގެ ގޮތުން، އަންނަ މަހުގެ 12 ވަނަ ދުވަހު އިންތިޚާބު ބޭއްވުމަށް ހަމަޖައްސާފައިވީ ނަމަވެސް، އިންތިޚާބުގެ ވޯޓުލުން ކުރިޔަށްދާނީ ޖޫން 12 ވާ ހޮނިހިރު ދުވަހުގެ ހެނދުނު 10:00 އިން 11:00 އަށް ކަމަށެވެ.

އަދި ވޯޓު ގުނަން ފަށާނީ ވޯޓު ނަގާ ނިމޭތާ 30 މިނެޓުގެ ހުސްވަގުތުކޮޅަކަށް ފަހުގައި ކަމަށެވެ.

ގާނޫނަށް ގެނެވުނު އިސްލާހާއެކު އެލްޖީއޭގެ ބޯޑުގައި ސިޓީ ކައުންސިލަރުންގެ ތެރެއިން މެންބަރަކާއި ރަށު ކައުންސިލަރުންގެ ތެރެއިން މެންބަރެއް އަދި، އަތޮޅު ކައުންސިލް ރައީސުންގެ ތެރެއިން މެންބަރެއް އިންނަވަން ޖެހެއެވެ. އެލްޖީއޭގެ ބޯޑުގެ ރަށު ކައުންސިލަރުންގެ ގޮނޑިއަށް ކޮމިޝަނުން އާންމުކޮށްފައިވާ ގޮތުން، ހަތް ކައުންސިލަރަކު ވާދަކުރެއެވެ. އެއީ، އެމްޑީޕީގެ ފަސް ކައުންސިލަރުންނާއި، ޕީޕީއެމްގެ ކައުންސިލަރަކާއި، އަދި އަމިއްލަ ގޮތުން އިންތިޚާބުވެފައިވާ ކައުންސިލަރެކެވެ.

އިލެކްޝަން ކޮމިޝަނުން ހާމަކޮށްފައިވާ ގޮތުގައި، އަތޮޅު ރައީސްގެ ގޮނޑިއަށް އިންތިޚާބަކާ ނުލައި، ޕީޕީއެމްއަށް ނިސްބަތްވާ ކ. އަތޮޅުގެ ރައީސް އަހުމަދު ނިމާލު ވަނީ ހޮވިފައެވެ. އެއީ، އެ ގޮނޑިއަށް އެމްޑީޕީގެ ފަރާތުން ވާދަކުރައްވާ ނ. އަތޮޅުގެ ރައީސް މުހައްމަދު ބަޝީރު، ވަގުތު ހަމަވިފަހުން ފޯމް ހުށަހަޅުއްވާފައިވާ ކަމަށް ބުނެ އެ ފޯމް ބަލައިނުގަތުމަށް އީސީން ވަނީ ނިންމުމާ ގުޅިގެންނެވެ.

އެހެންނަމަވެސް، ބަޝީރު ވަނީ ގަޑި ޖެހުމުގެ ކުރިން އޭނާ ފޯމް މެއިލްކުރެއްވި ކަމަށް ވިދާޅުވެ، އިލެކްޝަން ކޮމިޝަންގެ ނިންމުން ހައިކޯޓުގައި އިސްތިއުނާފު ކުރުމަށް ނިންމާފައެވެ. ބަޝީރު ފޯމް މެއިލް ކުރީ ގަޑި ޖެހުމުގެ 1 މިނެޓް ކުރިން ކަމަށް ވަނީ ބުނެފައެވެ. ފޯމް ހުށަހެޅުން ލަސްވީ ސާވަރގެ ލަސްކަމެއް ހުރުމުން ދިމާވި ކަމެއް ކަމަށް ބަޝީރުވަނީ ބުނެފައެވެ. އެވާހަކައަށް ރައްދުދެއްވައި އީސީގެ ރައީސް ވިދާޅުވީ، އީސީގެ ސާވަރގައި އެކަހަލަ އެއްވެސް މައްސަލައެއް ދިމާ ނުވާނެ ކަމަށެވެ.