ދިއްފުއްޓަށް އުދައަރައި މުޅި ރަށް ލޮނުގެ އަޑީގައި
27 މެއި 2021 | ބުރާސްފަތި 13:08އާންމު ދިރިއުޅުމުގެ ކަންކަމަށް ހުރަސްއެޅި، ފިހާރަތަކާއި ވޯކްޝޮޕްތައް ވަނީ ހުއްޓިފައި
ދިއްފުއްޓަށް އުދައަރައި، ރައްޔިތުންނަށް ވަނީ ބޮޑެތި ދަތިތަކެއް ކުރިމަތިވެފައި
ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން އުދައަރައި މާލެ އަތޮޅު ދިއްފުއްޓަށް ބޮޑެތި ގެއްލުންތަކެއް ވެއްޖެއެވެ.
އުދައިގެ ސަބަބުން ކުރި އަސަރުތަކުގެ މަޢުލޫމާތު ރާއްޖެއެމްވީއާއި ހިއްސާކުރައްވަމުން ދިއްފުށީ ކައުންސިލުގެ ރައީސް އިބުރާހިމް ސުނިލް ވިދާޅުވީ، ދިޔަވަރު ބޮޑުވާ ވަގުތުތަކުގައި މުޅި ރަށުތެރެއަށް ރާޅު އަރާފައިވާކަމަށެވެ. ބުރާސްފަތި ދުވަހު އެންމެ ދިޔަވަރު ބޮޑުވީ މެންދުރުފަހު 2:00 ހާއިރުކަން ފާހަގަ ކުރައްވަމުން ސުނިލް ވިދާޅުވީ މިހާރުވެސް މުޅި ދިއްފުށީގައި ލޮނުގަނޑު ހެދިފައިވާކަމަށެވެ. ލޮނުގަނޑުގެ ސަބަބުން އާންމު ދިރިއުޅުމުގެ ކަންކަން ކުރަން ހުރަސްއެޅި، ގެއްލުންތައް ލިބެމުންދާކަމަށް ވިދާޅުވިއެވެ. އުދައިގެ އަސަރު ރަށުގެ 85 އިންސައްތަ ގޭބީސީއަށް ކޮށްފައިވާކަމަށް އަންދާޒާކުރެވޭއިރު، ރަށުގެ ވޯކްޝޮޕްތަކާއި، ބައެއް ފިހާރަތަކުގެ މަސައްކަތް ވަނީ ހުއްޓިފައެވެ. އަދި ލޮނުގަނޑު ބޮޑުވުމުގެ ސަބަބުން ރަށުގައި ހެދިފައިވާ ގަސްގަހާ ގެއްސަށާއި، ބައެއް ހިފާގެންގުޅޭތަކެއްޗަށް ގެއްލުންވެފައިވާކަމަށް ކައުންސިލުގެ ރައީސް އިބުރާހިމް ސުނިލް ހާމަކުރެއްވިއެވެ. ލޮނުގަނޑު ހިންދުމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން ފޯރުކޮށްދިން ޕަމްޕަކާއި، އާންމު ރައްޔިތުންގެ ފެންހިންދާ ޕަމްޕްތައް ދަނީ ބޭނުން ކުރަމުންނެވެ.
ރާއްޖެއެމްވީއާއި ވާހަކަދައްކަވަމުން ގދ. ވ ވާދޫ ކައުންސިލުގެ ރައީސް ހަސަން އަބްދުﷲ ވަނީ ވާދޫގެ އެކި ސަރަހައްދުތައް ގިރަމުންދިއުމުން ހޭޅިފަށް ވަރަށް ތިރިވެފައިވާކަމަށް ވިދާޅުވެފައެވެ. މި ސަބަބައްޓަކައި ދިޔަވަރު ބޮޑުވާ ގަޑިތަކުގައި ވަރަށް ގިނައިން އުދައަރާ ގެއްލުންވާކަމަށް ވިދާޅުވިއެވެ. މިފަހަރުގެ އުދައިގެ ސަބަބުން އެރި ރާޅު އެރަށުގެ މީހުން ދިރިއުޅެމުންދާ ސަރަހައްދުތަކަށް ކޮށްފައި ނުވާއިރު، އެ ރަށު ގޮނޑުދޮށުގައި ތަރައްޤީކޮށްފައިވާ ޕާކްތަކާއި ބައެއް ފިނި މައިޒާންތަކަށް ގެއްލުންތަކެއް ވަނީ ލިބިފައެވެ. ރަށް ގިރުމުގެ މައްސަލަ ހައްލުކުރުމަށް ސަރުކާރުގެ މުއައްސަސާތަކާއި ގުޅިގެން މަސައްކަތް ކުރަމުންދާ ކަމަށް ހަސަން އަބްދުﷲ ވިދާޅުވިއެވެ.
ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގެ ސަބަބުން ކުރަމުންދާ އަސަރުތަކުގެ މައުލޫމާތު ރާއްޖެއެމްވީއާއި ހިއްސާކުރައްވަމުން އެންޑީއެމްއޭގެ ޑެޕިއުޓީ ޗީފް އެގްޒެކެޓިވް އުމަރު ފިކުރީ ވަނީ މިހާތަނަށް އައިރު ނ. ކެނދިކުޅުދޫ، ކ. ދިއްފުށި އަދި އއ. ރަސްދޫ އަދި ގދ. ވާދޫއަށް އުދައަރައިގެން ރިޕޯޓްކޮށްފައިވާކަމަށް ވިދާޅުވެފައެވެ. މި ރަށްރަށުގެ ޙާލަތު ގާތުން ބަލަމުންދާއިރު، އެމްއެންޑީއެފްއާއި ޒިންމާވާ އިދާރާތަކާއި ގުޅިގެން އެރަށްރަށުގެ ޙާލަތު ގާތުން މޮނީޓަރކޮށް އެހީ ފޯރުކޮށްދެމުންދާކަމަށް އުމަރު ވިދާޅުވިއެވެ. ގޭތެރޭގައި ފެންބޮޑުވެއްޖެ ހިނދެއްގައި ގެއްލުންވާނެފަދަ މުދާ ފެން ނުޖެހޭ ފަދަ އުސްތަންތަނަށް ބަދަލުކުރުމަށާއި، އުސް ތަންތަނަށް ބަދަލު ނުކުރެވޭ ތަކެތި ފެނުގެ އަސަރު ނުފޯރާނެ ތަނަކަށް ބަދަލުކުރުމަށް އުމަރު ވަނީ އިލްތިމާސްކުރައްވާފައެވެ. އަދި ގަދަވައިގެ ސަބަބުން ގޭގެ ފުރާޅު އެއްލާލަފާނެ ކަމަށް ލަފާ ކުރެވޭނަމަ ދުރާލާ ވައު ފަދަ އެއްޗެއް ބޭނުންކޮށް ފުރާޅު އެއްލާނުލާނެފަދަ ގޮތަކަށް ހައްޔަރުކުރުމަށާއި، ގަދަވައިގެ ސަބަބުން އެއްލާލަފާނެ ތަކެތި ބަނދެ ރައްކާތެރިކުރުމަށް އަދި ބޭނުންނުކުރާނަމަ އިލެކްޓްރިކް ތަކެތި ނިއްވާލާފައި ބެހެއްޓުމަށްވެސް ވަނީ ގޮވާލައްވާފައެވެ.
މޫސުމާއި ބެހޭ ގައުމީ އިދާރާއިން ބުނެފައިވަނީ ކ. އަތޮޅުން އައްޑޫ ސިޓީއަށް ގަޑިއަކު 19 މޭލާއި 24 މޭލާއި ދެމެދުގެ ބާރު މިނުގައި ވައި ޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައި ގަދަވާނެ ކަމަށެވެ. މީގެ އިތުރުން ކަނޑުގަދަވެ އުދަ އަރާނެ ކަމަށް ލަފާ ކުރެވޭ ކަމަށް ވެސް މޫސުމާއި ބެހޭ ގައުމީ އިދާރާއިން ބުނެއެވެ. އަދި ހުޅަނގުދެކުނާއި ހުޅަނގުން، އުތުރާއި މެދުރާއްޖޭގެ އަތޮޅުތަކަށް ގަޑިއަކު 18 މޭލާއި 28 މޭލާ ދެމެދުގެ ބާރުމިނުގައި ވައިޖެހޭނެކަމަށާއި ދެކުނުގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެ ކަމަށެވެ. އަދި ވިލާ ގަނޑުގައި ގަޑިއަކު ގާތްގަނޑަކަށް 45 މޭލާއި 55 މޭލާ ދެމެދުގެ ބާރުމިނަށް ވައި ގަދަވުން އެކަށީގެންވާ ކަމަށް މޫސުމާއި ބެހޭ ގައުމީ އިދާރާއިން ބުނެއެވެ.
އުތުރާއި މެދުރާއްޖޭގެ ކަނޑުތައް އާންމު ގޮތެއްގައި ގަދަ ވާނެ ކަމަށާއި، ދެކުނުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަ ވާނެ ކަމަށް ވެސް މޫސުމާއިބެހޭ ގައުމީ އިދާރާއިން ބުނެއެވެ. މެޓް އޮފީހުން ބުނީ ރާޅުގެ އުސްމިން ހުންނާނީ 4 - 8 ފޫޓުގައި ކަމަށާއި، ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރުކުރުން އެކަށީގެންވާ ކަމަށެވެ. އަދި މޫސުން ގޯސްވާނެތީ ހުރިހައި ފަރާތްތަކުން، ޚާއްސަކޮށް ކަނޑުދަތުރުކުރައްވާ ފަރާތްތަކުން މޫސުމަށް ސަމާލުވުމަށް އެދިފައިވެއެވެ.
