މިލާން ދޫކޮށްލަން ޑޮންނަރުއްމާ ނިންމައިފި

މި ސީޒަނަށްފަހު އޭސީ މިލާން ދޫކޮށްލަން އިޓަލީގެ ޒުވާން ގޯލްކީޕަރު ޖިއަންލުއިޖީ ޑޮންނަރުއްމާ ނިންމައިފިއެވެ.

ޑޮންނަރުއްމާ އޭނާގެ ކެރިއަރު ފަށާފައިވަނީ އުމުރުން އެންމެ 16 އަހަރުގައި 2015 ވަނަ އަހަރު މިލާނުންނެވެ. އޭގެ ފަހުން މިލާނުގެ ފުރަތަމަ އެގާރައިން އޭނާއަށް ޖާގަ ގެއްލިފައެއް ނުވެއެވެ. އެކަމަކު މިހާރު އުމުރުން 22 އަހަރުގެ ގޯލްކީޕަރު މިލާނާއެކު ހަދާފައިވާ އެއްބަސްވުން އަންނަ ޖޫން މަހު ހަމަވާނެއެވެ.

ދާދި ފަހުން މިލާނުގެ ޓެކްނިކަލް ޑިރެކްޓަރު ޕައުލޯ މަލްޑިނީ ވަނީ ޑޮންނަރުއްމާގެ އެއްބަސްވުން އާނުކުރާމެ ކަމަށް ބުނެފައެވެ. އެހެންކަމުން ކުރިއަށް އޮތް ހޫނު މޫސުމުގެ ޓްރާންސްފާގައި ހިލޭ ޓްރާންސްފާއެއްގެ ދަށުން ޑޮންނަރުއްމާއަށް ކުލަބު ބަދަލުކުރެވޭނެއެވެ.

ރިޕޯޓުތައް ބުނާ ގޮތުން ޑޮންނަރުއްމާ ހޯދަން ޗެލްސީ، ޓޮޓެންހަމް ހޮޓްސްޕާ، ބާސެލޯނާ އަދި ޔުވެންޓަސްއިން އަންނަނީ މަސައްކަތް ކުރަމުންނެވެ. އަދި ޑޮންނަރުއްމާގެ ބަދަލުގައި ލިލްގެ ގޯލްކީޕަރު މައިކް މައިގްނަން ހޯދުމަށް މިލާނުން މަސައްކަތް ކުރަމުން އަންނަ ކަމަށްވެސް އިޓަލީގެ މީޑިއާ ރިޕޯޓުތައް ބުނެއެވެ.

މިލާނުން ކެރިއަރު ފެށި ޑޮންނަރުއްމާ ވަނީ އެ ޓީމަށް މިހާތަނަށް 251 މެޗު ކުޅެދީ، އެ ޓީމާއެކު އިޓާލިއަން ސުޕަ ކަޕް ކާމިޔާބުކޮށްފައެވެ. އަދި އިޓަލީގެ ގައުމީ ޓީމަށް ޑޮންނަރުއްމާ މިހާތަނަށް 25 މެޗު ކުޅެދީފައިވާއިރު، އޭނާއަކީ އިޓަލީ ގައުމީ ފުޓްބޯޅަ ޓީމުގެ ފުރަތަމަ އެގާރައިގައި ހިމެނިގެން ކުޅުނު އެންމެ ޒުވާން ގޯލްކީޕަރެވެ.

ޑޮންނަރުއްމާ މިލާން ދޫކޮށްލާއިރު، އެ ޓީމުން ވަނީ އަންނަ ސީޒަނުގެ ޔުއެފާ ޗެމްޕިއަންސް ލީގުގެ ޖާގައެއް ހޯދާފައެވެ. މިއީ 2013-2014 ވަނަ އަހަރުގެ ސީޒަނަށްފަހު މިލާން ޗެމްޕިއަންސް ލީގުން ޖާގައެއް ހޯދި ފުރަތަމަ ފަހަރެވެ.