އެލްޖީއޭ ބޯޑުގެ މޭޔަރުގެ ގޮނޑީގެ ވާދަވެރިކަން ބޮޑުވެއްޖެ
27 މެއި 2021 | ބުރާސްފަތި 04:56ކައުންސިލުން އިންތިޚާބުކުރާ ރައީސްގެ ގޮނޑި ކ. އަތޮޅުގެ ރައީސަށްވަނީ ލިބިފައި
މޭޔަރުގެ ގޮނޑިއަށް ވާދަ ކުރައްވަނީ މާލެ ސިޓީ މޭޔަރު މުއިއްޒު އާއި ފުވައްމުލައް ސިޓީ މޭޔަރު އިއްސެ
އެލްޖީއޭ ބޯޑުގެ މޭޔަރުގެ ގޮނޑިއަށް މާލޭ ސިޓީގެ މޭޔަރ ޑރ. މުއިއްޒާއި ފުވައްމުލައް ސިޓީގެ މޭޔަރ އިއްސެ ކުރިމަތިލައިފިއެވެ.
ލޯކަލް ގަވަމެންޓް އޮތޯރިޓީ (އެލްޖީއޭ)ގެ ބޯޑުގެ މޭޔަރުންގެ ގޮނޑިއަށް މާލޭ ސިޓީ މޭޔަރު ޑރ. މުހައްމަދު މުއިއްޒާއި ފުވައްމުލައް ސިޓީގެ މޭޔަރު އިސްމާއިލް ރަފީގު ކުރިމަތިލެއްވުމާއެކު މި ގޮނޑީގެ ވާދަވެރިކަން މިވަނީ ބޮޑުވެފައެވެ.
ގާނޫނަށް ގެނެވުނު އިސްލާހާއެކު އެލްޖީއޭގެ ބޯޑުގައި ސިޓީ ކައުންސިލަރުންގެ ތެރެއިން މެންބަރަކާއި ރަށު ކައުންސިލަރުންގެ ތެރެއިން މެންބަރެއް އަދި، އަތޮޅު ކައުންސިލް ރައީސުންގެ ތެރެއިން މެންބަރެއް އިންނަވަން ޖެހެއެވެ.
އެގޮތުގެ މަތިން، އެ މަގާމުތަކަށް ކުރިމަތިލާން އިލެކްޝަން ކޮމިޝަނުން ހުޅުވާލުމުން އެލްޖީއޭ ބޯޑުގެ ސިޓީ ކައުންސިލަރުންގެ ގޮނޑިއަށް ކުރިމަތިލައްވާފައިވަނީ ޕީޕީއެމްއަށް ނިސްބަތްވާ ޑރ. މުއިއްޒު އަދި އެމްޑީޕީއަށް ނިސްބަތްވާ އިއްސެއެވެ. މި ދެ ބޭފުޅުންގެ މެދުގައި އޮންނަ އިންތިޚާބުގައި ވޯޓުދޭނީ ސިޓީ ކައުންސިލުތަކުގެ މެންބަރުންނެވެ.
މިހާރު އޮތް ހަތަރު ސިޓީ ކައުންސިލުގެ ތެރެއިން މާލޭ ސިޓީ ކައުންސިލްގެ މެޖޯރިޓީ އޮތީ ޕީޕީއެމްއަށެވެ. އައްޑޫ ސިޓީގެ މެޖޯރިޓީ ވަކި ޕާޓީއަކަށް ނެތެވެ. ކުޅުދުއްފުށީ ސިޓީ އާއި ފުވައްމުލައް ސިޓީ ކައުންސިލްގެ މެޖޯރިޓީ އޮތީ އެމްޑީޕީއަށެވެ.
އިލެކްޝަން ކޮމިޝަނުން ބުދަ ދުވަހު، ކެންޑިޑޭޓުންގެ ނަންތައް އިއުލާންކޮށް، އަންނަ މަހުގެ 12 ވަނަ ދުވަހު އިންތިޚާބު ބާއްވާނެކަންވަނީ އިއުލާންކުރައްވާފައެވެ. އެލްޖީއޭގެ ބޯޑުގެ ރަށު ކައުންސިލަރުންގެ ގޮނޑިއަށް ކޮމިޝަނުން އާންމުކޮށްފައިވާ ގޮތުން ހަތް ކައުންސިލަރަކު ވާދަކުރެއެވެ. އެއީ، އެމްޑީޕީގެ ފަސް ކައުންސިލަރުންނާއި ޕީޕީއެމްގެ އެއް ކައުންސިލަރަކު އަދި އަމިއްލަ ގޮތުން އިންތިޚާބުވެފައިވާ އެއް ކައުންސިލަރެކެވެ.
އިލެކްޝަން ކޮމިޝަނުން ހާމަކޮށްފައިވާ ގޮތުގައި، އަތޮޅު ރައީސްގެ ގޮނޑިއަށް އިންތިޚާބަކާ ނުލައި، ޕީޕީއެމްއަށް ނިސްބަތްވާ ކ. އަތޮޅުގެ ރައީސް އަހުމަދު ނިމާލު ވަނީ ހޮވިފައެވެ. އެއީ، އެ ގޮނޑިއަށް އެމްޑީޕީގެ ފަރާތުން ވާދަކުރައްވާ ނ. އަތޮޅުގެ ރައީސް މުހައްމަދު ބަޝީރު، ވަގުތު ހަމަވިފަހުން ފޯމް ހުށަހަޅުއްވާފައިވާ ކަމަށް ބުނެ އެ ފޯމް ބަލައިނުގަތުމަށް އީސީން ވަނީ ނިންމުމާ ގުޅިގެންނެވެ.
އެހެންނަމަވެސް، ބަޝީރު ވަނީ ގަޑި ޖެހުމުގެ ކުރިން އޭނާ ފޯމް މެއިލްކުރެއްވި ކަމަށް ވިދާޅުވެ، އިލެކްޝަން ކޮމިޝަންގެ ނިންމުން ހައިކޯޓުގައި އިސްތިއުނާފު ކުރުމަށް ނިންމާފައެވެ. ބަޝީރު ފޯމް މެއިލް ކުރީ ގަޑި ޖެހުމުގެ 1 މިނެޓް ކުރިން ކަމަށް ވަނީ ބުނެފައެވެ. ފޯމް ހުށަހެޅުން ލަސްވީ ސާވަރގެ ލަސްކަމެއް ހުރުމުން ދިމާވި ކަމެއް ކަމަށް ބަޝީރުވަނީ ބުނެފައެވެ. އެވާހަކައަށް ރައްދުދެއްވައި އީސީގެ ރައީސް ވިދާޅުވީ، އީސީގެ ސާވަރގައި އެކަހަލަ އެއްވެސް މައްސަލައެއް ދިމާ ނުވާނެ ކަމަށެވެ.
