ނާޕޮލީން ވަކިވި ގަޓޫސޯ ފިއޮރެންޓީނާގެ ކޯޗަކަށް

ނާޕޮލީގެ ކޯޗުގެ މަގާމުން އިސްތިއުފާދިނުމަށް ފަހު ފިއޮރެންޓީނާގެ ކޯޗުގެ މަގާމާ ހަވާލުވާން ކުރީގެ މަޝްހޫރު މިޑްފީލްޑަރު ޖެނާރޫ ގަޓޫސޯ ނިންމައިފިއެވެ.

އަންނަ ސީޒަނުގެ ޔޫއެފާ ޗެމްޕިއަންސް ލީގަށް ނާޕޮލީ ކޮލިފައިކޮށް ނުދެވުމުން އުމުރުން 43 އަހަރުގެ ގަޓޫސޯ ވަނީ މިދިޔަ އާދިއްތަ ދުވަހު އެ ޓީމުގެ ކޯޗުކަމުން ވަކިވެފައެވެ. ލީގުގެ ފަހު މެޗާ ކުރިމަތިލިއިރު ގަދަ ހަތަރެއްގެ ތެރޭގައި ނާޕޮލީ އޮތް ނަމަވެސް، ފަހު މެޗުން ވެރޯނާއާ 1-1 ގެ ނަތީޖާއަކުން އެއްވަރުވުމާ ގުޅިގެން ނާޕޮލީ ވަނީ ފަސްވަނައަށް ވެއްޓިފައެވެ.

ނާޕޮލީން ވަކިވިތާ 48 ގަޑިއިރުވެސް ނުވަނީސް އަންގާރަ ދުވަހު ފިއޮރެންޓީނާއިން ވަނީ އެ ޓީމުގެ ކޯޗަކަށް ގަޓޫސޯ ހަމަޖެއްސިކަން އިއުލާން ކޮށްފައެވެ. ރިޕޯޓުތައް ބުނާ ގޮތުން ފިއޮރެންޓީނާއާ ހަވާލުވާން ގަޓޫސޯ ނިންމިއިރު، އޭނާ ހޯދަން ލާޒިއޯއިންވެސް ވަނީ މަސައްކަތް ކޮށްފައެވެ.

މި ސީޒަނަށްފަހު ގަޓޫސޯ ނާޕޮލީ ދޫކޮށްލިއިރު، އޭނާ އެ ޓީމާ ހަވާލުވެފައިވަނީ 2019 ވަނަ އަހަރުގެ ޑިސެމްބަރު މަހުގެ ތެރޭގައެވެ. އެ ފަހަރު ނާޕޮލީގެ ކޯޗަކަށް ގަޓޫސޯ ހަމަޖެއްސީ އޭރު އެ ޓީމުގެ ކޯޗަކަށް ހުރި ކާލޯ އަންޗެލޮޓީ ވަކިކުރުމަށްފަހުއެވެ.

މިހާތަނަށް ކޯޗިން ކެރިއަރުގައި ގަޓޫސޯއަށް ހޯދިފައިވާ ހަމައެކަނި ކާމިޔާބީއަކީ ނާޕޮލީއާއެކު މިދިޔަ ސީޒަނުގެ އިޓާލިއަން ކަޕެވެ. އަދި މީގެ ކުރިން އޭނާ ވަނީ އޭސީ މިލާނަށްވެސް ކޯޗުކަން ކޮށްދީފައެވެ. ގަޓޫސޯ މިލާނަށް ކޯޗުކޮށްދިން ދޮޅު އަހަރުގެ ތެރެއިން 2018-2019 ވަނަ އަހަރުގެ ސީޒަނުގައި އެ ޓީމު ގަދަ ހަތަރަކާ އެއް ޕޮއިންޓް ގާތަށް ގެންގޮސްދިނެވެ. އެކަމަކު ގަދަ ހަތަރެއް ކަށަވަރުނުވެ ޗެމްޕިއަންސް ލީގުން ފުރުސަތު ނުލިބުމުން، އެ ފަހަރުވެސް އޭނާ ވަނީ މިލާނުގެ ކޯޗުގެ މަގާމުން ވަކިވެފައެވެ.