މިލާނުގެ ފުރަތަމަ ބަލި، ޔުވެންޓަސްއަށް މޮޅެއް

އިޓާލިއަން ލީގުގައި ހޮނިހިރު ދުވަހުގެރޭ ކުޅުނު މެޗުން ފިއޮރެންޓީނާ އަތުން އޭސީ މިލާން ބަލިވިއިރު، ލާޒިއޯ އަތުން ޔުވެންޓަސް މުހިންމު މޮޅެއް ހޯދައިފިއެވެ.

ރަށުން ބޭރުގައި ކުޅުނު މެޗުން މިލާން ބަލިވީ ފިއޮރެންޓީނާ އަތުން 4-3 ގެ ނަތީޖާއަކުންނެވެ. މިއީ މި ސީޒަނުގެ ލީގުގައި މިލާން ބަލިވި ފުރަތަމަ މެޗެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ފިއޮރެންޓީނާއިން ވަނީ ދެ ލަނޑުގެ ލީޑެއް ނަގާފައެވެ. މި ލަނޑުތައް އެ ޓީމަށް ކާމިޔާބުކޮށްދިނީ އަލްފްރެޑް ޑަންކަން އާއި ރިކާޑޯ ސަޕޯނާރާއެވެ. އަދި މެޗުގެ 60 ވަނަ މިނެޓުގައި ޑޫސަން ވުލަހޮވިޗް ވަނީ ފިއޮރެންޓީނާގެ ތިންވަނަ ލަނޑު ޖަހައިދީފައެވެ.

އޭގެ ފަހުން މިލާނުން ކުޅުން ރަނގަޅުކުރިއިރު، އެ ޓީމުގެ އިތުބާރު ފޯވާޑް ޒްލަޓާން އިބްރަހިމޮވިޗް ވަނީ ގާތްގާތުގައި ދެ ލަނޑު ޖަހައި މިލާނަށް ފަރަގު ކުޑަކޮށްދީފައެވެ. އެކަމަކު މެޗު ނިމެން ފަސް މިނެޓަށް ވެފައި ވަނިކޮށް ފިއޮރެންޓީނާއަށް އަލުން ލީޑު ފުޅާކޮށްދިނީ ވުލަހޮވިޗެވެ. އޭގެ ފަހުން މެޗުގެ އިތުރު ވަގުތުގައި މިލާނުން އަލުން ފަރަގު ކުޑަކުރިއިރު، މި ލަނޑަކީ ފިއޮރެންޓީނާގެ ލޮރެންޒޯ ވެނޫޓީ އަތުން ބައިކޮޅަށް ވަން ލަނޑެކެވެ.

މި މެޗުން ބަލިވުމާއެކު މިލާނަށް ވަނީ ތާވަލުގެ އެއްވަނައަށް އަރަން ލިބުނު ފުރުސަތު ގެއްލިފައެވެ. ތާވަލުގެ އެއްވަނައިގައި އޮތް ނާޕޮލީ އާއި ދެވަނައިގައި އޮތް މިލާނަށް 32 ޕޮއިންޓް ލިބިފައިވާއިރު، މިލާން ވަނީ ނާޕޮލީއަށް އިތުރަށް މެޗެއް ކުޅެފައެވެ. އެހެންކަމުން ލީގުގައި އާދީއްތަ ދުވަހުގެރޭ ކުޅޭ މެޗުން އިންޓަ މިލާން ބަލިކޮށް، ނާޕޮލީއަށް އެއްވަނައިގައި ތިން ޕޮއިންޓުގެ ލީޑެއް ނެގުމުގެ ފުރުސަތު އެބައޮތެވެ.

މީގެ އިތުރުން ލީގުގައި ހޮނިހިރު ދުވަހުގެރޭ ކުޅުނު މެޗުން ޔުވެންޓަސް މޮޅުވީ ރަށުން ބޭރުގައި ކުޅެ ލާޒިއޯ އަތުން 2-0 ގެ ނަތީޖާއަކުންނެވެ.

މި މެޗުގައި ޔުވެންޓަސްއިން މޮޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. މެޗުގެ 23 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން ލެއޮނާޑޯ ބޮނޫޗީއެވެ. މިއީ އޭރިއާ ތެރެއިން ޔުވެންޓަސްގެ އަލްވާރޯ މޮރާޓާއަށް ލާޒިއޯގެ ޑަނީލޯ ކަޓަލްޑީ ކުރި ފައުލަކަށް ދިން ޕެނަލްޓީއެކެވެ.

އޭގެ ފަހުން މި މެޗުގައި ޔުވެންޓަސްއިން ލީޑު ފުޅާކޮށްފައިވަނީ މެޗު ނިމެން ހަތް މިނެޓަށް ވެފައި ވަނިކޮށެވެ. ލިބުނު އިތުރު ޕެނަލްޓީއަކުން މި ލަނޑުވެސް އެ ޓީމަށް ޖަހައިދިނީ ބޮނޫޗީއެވެ. މިއީ އޭރިއާ ތެރެއިން ޔުވެންޓަސްގެ ފެޑެރީކޯ ކިއޭސާއަށް ލާޒިއޯގެ ގޯލްކީޕަރު ޕެޕޭ ރެއިނާ ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މޮޅާއެކު ޔުވެންޓަސް އޮތީ ތާވަލުގެ ހަތްވަނައިގައި 13 މެޗުން 21 ޕޮއިންޓާއެކުއެވެ. ތާވަލުގެ ހަވަނައިގައި ފިއޮރެންޓީނާ އޮތްއިރު، އެ ޓީމަށްވެސް ވަނީ 13 މެޗުން 21 ޕޮއިންޓް ލިބިފައެވެ.