17 މުވައްޒަފުންނާއެކު ރާއްޖެޓީވީ އަނެއްކާވެސް ލޮކްޑައުންއަކަށް!
ސްޓޭޝަންގައި ތިބޭ މުވައްޒަފުން ނޫން މުވައްޒަފުން މަސައްކަތް ކުރަމުންދާނީ ގޭގައި ތިބެގެން
ރާއްޖެޓީވީ މުވައްޒަފުން ސްޓޭޝަންގައި ލޮކްޑައުންވުން - ލޮކްޑައުންވެފައިވަނީ 14 ދުވަހުގެ މުއްދަތަށް
ކޮވިޑުގެ 4 ވަނަ ރާޅާއެކު މާލެ ސިޓީގައި ކޮވިޑް-19ގެ ކޭސްތައް ވަރަށް ބޮޑަށް އިތުރުވެފައިވާތީ ރާއްޖެޓީވީގެ 17 މުވައްޒަފުން ސްޓޭޝަންގައި ލޮކްޑައުންވެއްޖެއެވެ.
ލޮކްޑައުން ވެފައިވަނީ ބުދަ ދުވަހުގެ ރޭ 12:00 ގައި، 14 ދުވަހުގެ މުއްދަތަކަށެވެ.
ސްޓޭޝަންއަށް އާންމުކޮށް ވަދެ ނުކުތުން ވެސް މަނާކޮށްފައިވާއިރު، ބޭރުން ގެނެވޭ ކާބޯތަކެތި ވައްދާނީ ޑިސްއިންފެކްޓްކޮށް، ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކާއެކުއެވެ. 17 މުވައްޒަފުން ލޮކްޑައުންވުމާއެކު ސްޓޭޝަންގައި ތިބޭ މުވައްޒަފުން ނޫން މުވައްޒަފުން މަސައްކަތް ކުރަމުންދާނީ ގޭގައި ތިބެގެންނެވެ. އަދި މި މުއްދަތުގެ ތެރޭގައި ރާއްޖެޓީވީގެ އިމާރާތް އާއްމުކޮށް ބަންދުކޮށްފައި ބެހެއްޓުމަށް ވެސް ވަނީ ކަނޑައަޅާފައެވެ.
ރާއްޖެޓީވީގެ މުއައްޒަފުން ސްޓޭޝަންގައި ލޮކްޑައުންވާން ނިންމާފައިވާއިރު، މީގެ ކުރިން ވެސް ދެފަހަރެއްގެ މަތިން މުވައްޒަފުން ސްޓޭޝަންގައި ލޮކްޑައުންވެފައިވެއެވެ. އެގޮތުން ފުރަތަމަ ފަހަރު 30 ދުވަހުގެ މުއްދަތަށް ލޮކްޑައުންވެފައިވާއިރު، ދެވަނަ ލޮކްޑައުންގައި ދެމަހަށްވުރެ ގިނަ ދުވަހު މުވައްޒަފުން ތިބެފައިވެއެވެ.
ކޮވިޑް-19 ކޭސްތައް އިންތިހާއަށް އިތުރުވެފައިވާއިރު، ފަރުވާދޭނެ ސިއްހީ ހިދުމަތްތެރިން ވެސް މަދުވެ ބެޑް ކެޕޭސިޓީ ވެސް އަންނަނީ ފުލްވަމުންނެވެ. އޭގެ ސަބަބުން ރާއްޖެ މި ބަލީގެ ބޮޑު އަނދަވަޅަކަށް ވެއްޓިދާނެކަމުގެ ބިރު މިހާރު ވަނީ ހީވެފައެވެ. އެކަމަށްޓަކާ ފިޔަވަޅުތަކެއް ވެސް އަޅާފައިވާއިރު، ކާފިއު ވެސް ވަނީ އިއުލާންކޮށްފައެވެ.
ރާއްޖޭގައި މި ބަލީގައި ނިޔާވާ މީހުންގެ އަދަދު އިންތިހާއަށް އިތުރުވެފައިވާއިރު ކޮންމެ ދުވަހަކު ވެސް މަދުވެގެން ތިން މީހަކު ނިޔާވެގެން ރިޕޯޓު ނުކުރާ ދުވަހެއް މިހާރު ނުދެއެވެ. ކޮންމެ ދުވަހެއްގެ މަރުތައް ވެސް ރިޕޯޓުކުރަނީ ވަރަށް ކައިރިކައިރީގައެވެ. އެގޮތުން ގިނަ ފަހަރު ދެމީހެއްގެ މަރުގެ ވަގުތުގެ ދެމެދުގައި ގަޑި އިރެއް ވެސް ހަމަނުވެއެވެ. ގިނަ މީހުން މަރުވަނީ ހުޅުމާލެ މެޑިކަލް ފެސިލިޓީންނެވެ. އެ ފެސިލިޓީ ވެސް ފުރިފައިވާއިރު އެތަނުގައި އެކަށީގެންވާ ޚިދުމަތްދެވޭ ވަރަށް ސިއްހީ ޚިދުމަތްތެރިން ނެތް ކަމަށް އެޗްޕީއޭއިން ބުނެފައިވެއެވެ.
މިދިޔަ އަހަރުގެ ތެރޭގައި ކޮވިޑްގެ 52 މަރު ރިޕޯޓް ކުރި އިރު، މި މަހުގެ ތެރޭގައި އެކަނި ވެސް 73 މީހުން ވަނީ ނިޔާވެފައެވެ.
