ރެއާލް މެޑްރިޑާއެކު ހަދާފައިވާ އެއްބަސްވުން ކްރޮއޭޝިއާގެ މިޑްފީލްޑަރު ލޫކާ މޮޑްރިޗް އާކޮށްފިއެވެ.

އުމުރުން 35 އަހަރުގެ މޮޑްރިޗް މީގެ ކުރިން ރެއާލާއެކު ހަދާފައި އޮތް އެއްބަސްވުން މި ސީޒަން ނިމުމުން ހަމަވާނެއެވެ. އެކަމަކު އަންގާރަ ދުވަހުގެ ވަގުތެއްގައި މޮޑްރިޗް ވަނީ ރެއާލުގެ އެއްބަސްވުން އިތުރު އެއް އަހަރަށް އާކޮށް، އަންނަ އަހަރުގެ ހޫނު މޫސުމުގެ ނިޔަލަށް އެ ޓީމުގައި މަޑުކުރަން ނިންމާާފައެވެ.

ރެއާލުގައި އިތުރު އެއް އަހަރު މަޑުކުރަން މޮޑްރިޗް ނިންމިއިރު، މީގެ ކުރިން ޓޮޓެންހަމް ހޮޓްސްޕާއިން ވިދާލި މޮޑްރިޗް ރެއާލަށް ބަދަލުވީ 2012 ވަނަ އަހަރު 30 މިލިޔަން ޔޫރޯއަށެވެ. އޭގެ ފަހުން ރެއާލުގެ މެދުތެރޭގައި މޮޑްރިޗް ތަފާތު މޮޅު ކުޅުމެއް ދައްކާފައިވާއިރު، އޭނާ ވަނީ މިހާތަނަށް އެ ޓީމަށް ކުޅެދިން 391 މެޗުގައި 28 ލަނޑު ޖަހާފައެވެ. އަދި އޭނާ ވަނީ ރެއާލާއެކު ސްޕެނިޝް ލީގު ދެ ފަހަރު އަދި ޔުއެފާ ޗެމްޕިއަންސް ލީގު ހަތަރު ފަހަރު ކާމިޔާބުކޮށްފައެވެ.

މީގެ އިތުރުން 2018 ވަނަ އަހަރު މޮޑްރިޗް ތަފާތު މޮޅު ކުޅުމެއް ދެއްކިއިރު، އެ އަހަރު އޭނާ ވަނީ ފޯފާ ވޯލްޑް ކަޕުގެ މޮޅު ކުޅުންތެރިޔާގެ މަގާމާއި، ޔޫރަޕުގެ މޮޅު ކުޅުންތެރިޔާއާގެ މަގާމާއި، ފީފާއިން ހޮވާ ދަ ބެސްޓް ފީފާ ފުޓްބޯލް އެވޯޑްސް އަދި ފްރާންސް ފުޓްބޯލް މަޖައްލާއިން ދޭ ބަލޮންޑޯ އެވޯޑުވެސް ހޯދާފައެވެ.

އެއާއެކު މޮޑްރިޗް ވެފައިވަނީ އެއް އަހަރު ތެރޭ މި އެވޯޑުތައް ހާސިލުކުރި ފުރަތަމަ ކުޅުންތެރިޔާއަށެވެ. އަދި މޮޑްރިޗަކީ މި ގަރުނުގައި ކްރިސްޓިއާނޯ ރޮނާލްޑޯ އާއި ލިއޮނަލް މެސީ ފިޔަވައި ބަލޮންޑޯ އެވޯޑު ހޯދި ފުރަތަމަ ކުޅުންތެރިޔާއެވެ.