ފީފާ ވޯލްޑް ކަޕް މުބާރާތުގެ ތިން ވަނަ ހޮވާ މެޗުގައި މޮރޮކޯ ބަލިކޮށް ކްރޮއޭޝިއާ އިން މުބާރާތުގެ ތިން ވަނަ ހާސިލްކޮށްފިއެވެ.
ޚަލީފާ އިންޓަނޭޝަނަލް ސްޓޭޑިއަމްގައި ކުޅުނު މެޗު ކްރޮއޭޝިއާ އިން ކާމިޔާބުކުރީ 2-1 އިންނެވެ. މެޗުގައި ފުރަތަމަ ލަނޑު ޖަހާ ލީޑު ނެގީ ވެސް ކްރޮއޭޝިއާ އިންނެވެ. މެޗު ފަށައިގެން ހަތް ވަނަ މިނެޓުގައި އިވާން ޕެރިސިޗް ތަނަވަސްކޮށްދިން ފުރުސަތަކުން ކްރޮއޭޝިއާ އަށް ލީޑު ނަގައިދިނީ ޑިފެންޑަރު ޖޮސްކޯ ގްވާޑިއޯލްއެވެ. އޭނާ ވަނީ މިއަހަރުގެ މުބާރާތުގައި މޮޅު ކުޅުމެއް ވެސް ދައްކާފައެވެ. ނަމަވެސް އޭގެ ދެ މިނެޓު ފަހުން މޮރޮކޯ އިން ވަނީ ލަނޑެއް ޖަހައި މެޗުގެ ނަތީޖާ ހަމަހަމަކޮށްފައެވެ. އެ ޓީމަށް ނަތީޖާ ހަމަހަމަކޮށްދިނީ އަޝްރަފް ދާރީ އެވެ. އެއީ އެ ޓީމުގެ ހަކީމް ޒިޔެޗް ހުރަސްކޮށްދިން ބޯޅައެއް ބޮލުން ގޯލަށް ފޮނުވާލައިގެންނެވެ. މެޗުން ކްރޮއޭޝިއާ މޮޅުކޮށްދިން ލަނޑު ޖެހީ 42 ވަނަ މިނެޓުގައި މިސްލާވް އޮރިޝިޗްއެވެ.
މި މެޗު ޚާއްސަވީ ކްރޮއޭޝިއާގެ ކެޕްޓަން ލޫކާ މޮޑްރިޗަށެވެ. މި އަހަރުގެ މުބާރާތަކީ މޮޑްރިޗުގެ ފަހު ވޯލްޑް ކަޕަށްވުމުން މިއީ ވޯލްޑް ކަޕްގައި އޭނާގެ ފަހު މެޗެވެ. މެޗަށްފަހު ކްރޮއޭޝިއާ އަށް ވަނީ ލޯ މެޑަލް ހަވާލުކޯށްފައެވެ.
