ވޯލްޑް ކަޕަށްފަހު ޗުއްޓީ ހޭދަކުރުމަށް މޮޑްރިޗް ރާއްޖެ އަށް

ކްރޮއޭޝިއާގެ ކެޕްޓަން ލޫކާ މޮޑްރިޗް ޗުއްޓީ ހޭދަކުރުމަށް ރާއްޖެ އަތުވެއްޖެ އެވެ.

ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި މޮޑްރިޗް ރާއްޖެ އައިސްފައިވަނީ އަންގާރަ ދުވަހުގެ ވަގުތެއްގަ އެވެ. މޮޑްރިޗާއެކު އޭނާގެ އާއިލާ ވެސް ވަނީ ރާއްޖެ އައިސްފަ އެވެ. މޮޑްރިޗް ޗުއްޓީ ހޭދަކުރަމުން ދަނީ ވޯލް ޑްރޮފް އެސްތޯރިއާގައެވެ.

ދާދި ފަހުން ޤަތަރުގައި ނިމުނު ފީފާ ވޯލްޑް ކަޕް މުބާރާތުގައި މޮޑްރިޗް ވަނީ ކުޅެފަ އެވެ. މޮޑްރިޗްގެ ކެޕްޓަންކަމުގެ ދަށުން ކްރޮއޭޝިއާ ވަނީ މޮރޮކޯ ބަލިކޮށް މުބާރާތުގެ ތިން ވަނަ ހޯދާފަ އެވެ. މުބާރާތުގެ ސެމީ ފައިނަލްގައި ކްރޮއޭޝިއާ ނިކުތީ އާޖެންޓީނާއާ ދެކޮޅަށެވެ. އެ މެޗުން ކްރޮއޭޝިއާ ބަލިވީ 3-0 އިންނެވެ. މިއަހަރުގެ ވޯލްޑް ކަޕް މުބާރާތުގައި ވެސް މޮޑްރިޗް ވަނީ މޮޅު ކުޅުމެއް ދައްކާފަ އެވެ. މިއަހަރުގެ ވޯލްޑް ކަޕް މުބާރާތަކީ މޮޑްރިޗްގެ ފަހު ވޯލްޑް ކަޕެވެ. މީގެ ހަތަރު އަހަރު ފަހުން 2026 ވަނަ އަހަރު އޮންނަ ވޯލްޑް ކަޕުން އޭނާ ނުފެންނާނެ އެވެ.

ރަޝިޔާގައި 2018 ވަނަ އަހަރު ބޭއްވި މުބާރާތުގެ ފައިނަލްގައި މޮޑްރިޗް ވަނީ ކުޅެފަ އެވެ. އެއަހަރުގެ މުބާރާތުގެ އެންމެ މޮޅު ކުޅުންތެރިޔާ އަކަށް ހޮވުނީ ވެސް އޭނާ އެވެ. ނަމަވެސް މިއަހަރުގެ މުބާރާތަށް ފަހު މޮޑްރިޗް ބުނީ ޤައުމީ ޓީމަށް ކުޅުން ހުއްޓާލުމުގެ ވިސްނުން ނުގެންގުޅޭ ކަަމަށެވެ. އެގޮތުން އަންނަ އަހަރު އޮންނަ ޔުއެފާ ނޭޝަން ލީގު ކުޅެ، ކްރޮއޭޝިއާ އާއެކު އެ މުބާރާތް ކާމިޔާބުކުރަން މަސައްކަތް ކުރާނެ ކަމަށް 37 އަހަރުގެ މޮޑްރިޗް ވަނީ ބުނެފަ އެވެ. ނޭޝަންސް ލީގުގެ ފައިނަލް ބުރުން ކްރޮއޭޝިއާ އަށް ޖާގަ ލިބުނެވެ. ކްރޮއޭޝިއާގެ އިތުރުން މި ބުރުގައި ކުޅޭނީ، ނެދަލެންޑްސް، އިޓަލީ އަދި ސްޕެއިން އެވެ.

މީގެ އިތުރުން މޮޑްރިޗަކީ އާޖެންޓީނާގެ ލިއޮނަލް މެސީ އާއި ޕޯޗުގަލްގެ ކްރިސްޓިއާނޯ ރޮނާލްޑޯ ފަހަތަށް ޖައްސާލުމަށްފަހު ބެލެންޑޯ އެވޯޑު ހޯދި ފުރަތަމަ ކުޅުންތެރިޔާ އެވެ. މޮޑްރިޗް ބެލެންޑޯ އެވޯޑު ހޯދާފައި ވަނީ 2018 ވަނަ އަހަރު އެވެ.

ކްރޮއޭޝިއާ އިން ވަނީ ވޯލްޑް ކަޕްގައި ތިން މެޑަލެއް ހޯދާފަ އެވެ. އެއީ 1998 ވަނަ އަހަރުގެ މުބާރާތުގައި ލޯ މެޑަލް، 2018 ވަނަ އަހަރުގެ މުބާރާތުގައި ރިހި މެޑަލް، އަދި މިއަހަރުގެ މުބާރާތުގައި ލޯ މެޑަލެވެ.