ކޮވިޑް19ގެ ޢާލަމީ ބަލިމަޑުކަމުގެ ޚަބަރުތަކާއެކު އާދައިގެ މަތިން ހުރިހާ ކަމެއް އެނގޭ ރޯނު އެދުރުންގެ ބަސްތައް ފިސާރި އޮއްސަން ފެށިއެވެ.

މީއަރުވާ އަޑުތަކެއް ކަމާ، ހިސާބަށްވުރެ ކަންތައް ބޮޑުކުރަނީ ކަމާ، ކޮވިޑަކީ އެއްވެސް އެއްޗެއް ނޫންކަމަށް ބުނަން ފެށިއެވެ. މިއީ ހައްޖު ރޯގާ ފަދަ ކަމެއް ކަމާ، އާވި އަރުވާލާ ޕެނަޑޯލް ކާޑަކާ ކޯރާޑިތެޔޮ ފުޅިއަކުން މިކަން ނިންމާލެވޭނޭ ކިޔާ މޮޅުކަން ދައްކަން ފެށިއެވެ.

ރާއްޖެ އަށް މިރޯގާ ވާސިލުވެ، މީގެ ޚުތޫރަތްތެރިކަމާ މިކަމުން، ގައުމަށާ ރައްޔިތުންނަށް އޮވެދާނެ ނުރައްކަލުގެ ބޮޑުކަން ފުރަތަމަ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ތަސައްވުރު ކުރެވުނެވެ. ނުހަނު އަސަރާ ހިތާމައާއެކު އެމަނިކުފާނު އެވާހަކަ ވިދާޅުވުމުން އެކަމަށް މަލާމާތާ ފުރައްސާރަ ކުރި މީހުން މިއަދު އޮހޮރަން ޖެހޭ ކަރުނަ މިވަނީ އެތައް ގުނައަކުން އިތުރުވެފައެވެ.

ވެކްސިން ގެނެސް ޖަހަން ފެށުމާއެކު ތިޔައެއްޗެއް ތިމަން ގަޔަށް ޖަހަން ޖެހޭނީ ގާނޫނަކުން މަޖުބޫރު ކޮށްގެންނޭ، ހާހުން ޕޮޒިޓިވް ވިޔަސް މުޒާހަރާ ކުރާނަމޭ ބުނެ ބޮޑާ ބަސް ބުނި ފިޔާތޮށި ކްލަސްޓަރގެ އަހުލުވެރިން މެއަށްތަދުވެ، ނޭވާ ކުރުވެ ހުންގަދަވެ އެންމެ ފަހުން އެޑްމިޓް ކުރަންޖެހުނީއެވެ.

ކޮވިޑަކީ ވަކިގަޑިތަކެއްގައި ނުކުމެ އުޅޭ އެއްޗެއްހޭ؟ ކޮން ކާފިއު އަކާ ވެހިކަލް މަނާ ކުރުމެއްހޭ؟ ރައްޓެހިވެގެން އުޅޭ ކުއްޖާއާއެކު ބުރެއް ޖަހާލާ ކޮފީއެއް ބޯލެވޭކަށް ވެސް ނެތޭ ކިޔާ ހީވަނީ އެހެންކަމެއްހެންނެވެ.

މައްކާގެ ހަރަމުގައި ގައިދުރުކޮށް ނަމާދާ ތޮވާފް ކުރަމުންދާ މަންޒަރު ވަގުތުން ފެންނައިރު ވެސް، އެއީ ދޮގޭ، އޭތި ކަޑައޭ، އެންމެން ބޮނޑިވެ ފަޔަށް ފައިން އަރައިގެން މިސްކިތުގައި ގުޅާކެރުވޭށޭ ކިޔާ ވަރުހެސަ ބިލާދަރު ދީނީ ފަތުވާތައް މިގައުމުގެ ތެރޭން ނެރުނެވެ.

ތިޔަ މުބާރާތް އިހަށް ނުބާއްވާ މަޑުކޮއްލަ ދޭށޭ ބުނިކަމަށްޓަކާ ބޯޅަ ހިފައިގެންގޮސް ކުޅެން ފެށީ އެވާހަކަ ބުނި މީހާގެ ގޭދޮރުމަތީ ގައެވެ.

ދުނިޔެ އޮތްހާލާ، ތަކެތި ހޯދުމާ އުފެއްދުންތެރިކަމަށް ހުރަސް އެޅި މާބޮޑުދައްޗެއް ކުރިމަތިވެދާނެތީ އަވަހަށް ވެކްސިން ޖަހަން ސަރުކާރުން އިރުޝާދު ދިނެވެ. ވެކްސިން ސެންޓަރުތައް ހުހައްލާފައި އިހަށް ތިއްބެވީ ކޮފީ ހިއްޕެވުމާ ޓިކްޓޮކް ބެއްލެވުމާ ޗެޓް ކުރެއްވުމުގައެވެ.

އާދައިގެ މަތިން ފަހު ވަގުތު ދުވެސްގޮސް ކިޔުއަށް އަރާ ފުރަތަމަ ޑޯޒް ޖަހާލެވުނީ ކިރިޔާއެވެ. ޚާއްޞަކޮށް އަވަށްޓެރި އިންޑިއާގެ ހާލަތު އިންތިހާއަށް ނުރައްކާ ވެއްޖެ އެވެ. އެހެން ގިނަ ގައުމުތަކުގެ ހާލަތުވެސް ނުހަނު ދައްވެ ދެންވާ ދެނަކާ ދެނެއްނެތުނީ އެވެ.

ނުވެ ހުރި ހުރިހާ ކަމެއް އަނެކާގެ ބޮލުގައި އަޅުވަމުން ތިމާގެ އެއްވެސް މަސްއޫލިއްޔަތެއް ޒިންމާ އެއް ކުށެއް އަދި ގޯހެއް ނެތް ކަމަށްދެކި "މަށެއްނޫން" ވެ ނިމުނީއެވެ.