އެކްޓިވް ކޭހުގެ އަދަދު 24،000ން މައްޗަށް
ހޯމަ ދުވަހު ރެކޯޑު މިންވަރަކަށް މީހުން ވަނީ ނިޔާވެފައި
ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ތަންފީޒު ކުރުމުގެ މަސައްކަތުގައި
ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން 1،417 މީހުން ކޮވިޑަށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސް ހިސާބުތަކުން ދައްކައިފިއެވެ.
އެޗްޕީއޭއިން އެންމެ ފަހުން އާންމުކުރި ތަފާސް ހިސާބުތައް ދައްކާ ގޮތުން ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން 5،581 މީހުން ކޮވިޑަށް ޓެސްޓު ކޮށްފައިވާއިރު، އޭގެ ތެރެއިން ޕޮޒިޓިވްވެފައިވަނީ 1،417 މީހުންނެވެ. އެއީ މާލެ ސަރަހައްދުން ޕޮޒިޓިވްވި 1،097 މީހުންނާއި، އަތޮޅު ތެރެއިން ޕޮޒިޓިވްވި 303 މީހުންނާއި، ރިސޯޓުތަކުން ޕޮޒިޓިވްވި، 17 މީހުންނެވެ.
އިތުރު 1،417 މީހުން ކޮވިޑަށް ޕޮޒިޓިވްވުމާއިއެކު ރާއްޖެއިން ބައްޔަށް ޕޮޒިޓިވްވި މީހުންގެ އަދަދު ވަނީ 57،341ށް އަރައިފައެވެ. އަދި އެކްޓިވް ކޭސްތަކުގެ އަދަދު 24،057ށް އަރާފައިވާއިރު، އޭގެ ތެރެއިން 282 މީހަކަށް ހޮސްޕިޓަލުގައި އެޑްމިޓް ކޮށްގެން އަންނަނީ ފަރުވާ ދެމުންނެވެ. މިބަލިން 33،136 މީހުން ފަސޭހަ ވެފައިވާއިރު، ބަލީގައި ނިޔާވާ މީހުންގެ އަދަދު ދުވަހެއް ދުވަހަކަށް އަންނަނީ އިތުރު ވަމުންނެވެ. އެގޮތުން ހޯމަ ދުވަހަކީ ބަލީގައި ނިޔާވި މީހުންގެ އަދަދު ރެކޯޑު މިންވަރަކަށް އިތުރުވި ދުވަހެކެވެ. ހޯމަ ދުވަހު އެކަނި ވެސް 10 މީހުން ވަނީ ނިޔާވެފައެވެ. އެއާއިއެކު ރާއްޖެއިން މި ބަލީގައި ނިޔާވި މީހުންގެ އަދަދު ވަނީ 139ށް އަރާފައެވެ.
މި މަހުގެ އަށް ވަނަ ދުވަހުން ފެށިގެން ދުވާލެއްގެ މައްޗަށް 1،000ށް ވުރެ ގިނަ ކޮވިޑް ކޭސްތައް ރިޕޯޓްކުރަމުން އަންނަ އިރު އެވްރެޖްކޮށް ފަސް މީހުން ދަނީީ ދުވާލެއްގެ މައްޗަށް ނިޔާވަމުންނެވެ. ބައްޔަށް ފަރުވާދޭ ފެސިލިޓީތަކުގެ ބެޑް ކެޕޭސިޓީ ފުރެން ކައިރިވެފައިވާ އިރު، ބަލިމީހުންނަށް އެކަށީގެންވާ ވަރަށް ފަރުވާދެވޭނެ މިންވަރަށް ސިއްހީ އެހީތެރިން ނެތްކަމަށް އަންނަނީ ބުނަމުންނެވެ. އަނެއްކޮޅުން ބަލިން ސަލާމަތް ވުމަށް އަޅާފައިވާ ފިޔަވަޅުތައް އިތުރަށް ވަރުގަދަ ކޮށްފައިވެއެވެ. ކާފިއު ހިންގާ ވަގުތު އިތުރު ކޮށްފައިވެއެވެ.
