ކޮވިޑް-19ގެ ކޮންޓްރޯލް ރާއްޖޭގައި ގެއްލިފައިވާ ކަމަށާއި، ހުރިހާ ރައްޔިތުންގެ އެއްބާރުލުން ބޭނުންވާ ކަމަށް އައިޖީއެމްއެޗްގެ ޑރ. މުހައްމަދު އަލީ ވިދާޅުވެއްޖެއެވެ.

ކޮވިޑް-19ގެ މަސައްކަތުގައި އިސް ސަފުގައި ހަރަކާތްތެރިވަމުންދާ ޑރ. މުހައްމަދު ވިދާޅުވީ ކޮވިޑް-19ގެ ހާލަތު ގޯސްވެ، ކޮންޓްރޯލުން މިހާރު ނެއްޓިފައިވާ ކަމަށެވެ. ނަމަވެސް ބަލި ކޮންޓްރޯލް ކުރުމަށް ގުޅިގެން މަސައްކަތް ކުރުމުގެ ބަދަލުގައި މިހާރު ފެންނަނީ އެއްބަޔަކު އަނެއް ބައެއްގެ ބޮލުގައި ތުހުމަތު އަޅުވަމުންދާ މަންޒަރު ކަމަށެވެ.

ބަލި ކޮންޓްރޯލް ކުރުމަށް އެންމެން ގުޅިގެން މަސައްކަތް ކުރުން މުހިންމުކަން ފާހަގަކޮށް ޑރ. މުހައްމަދު ވިދާޅުވީ ބަލި ކޮންޓްރޯލް ކުރެވޭނީ، ބަލީގެ ކޮންޓްރޯލް އަތުން ދޫވެއްޖެކަން އަމިއްލައަށް ގަބޫލުކޮށްގެން ކަމަށެވެ.

ޑރ. މުހައްމަދު ޢަލީ ވިދާޅުވީ ވޭތުވެދިޔަ ދޮޅު އަހަރުގެ ތެރޭގައި ބަލި ކޮންޓްރޯލްކުރުމުގެ މަސައްކަތުގައި ހަރަކާތްތެރިވީ އެއްޓީމެއް ކަމަށާއި، އެޓީމު މިހާރު މާބޮޑަށް ރަނގަޅުވާނެ ކަމަށެވެ. އަދި ތަޖުރިބާއެކު މާ ރަނގަޅަށް މަސައްކަތް ކުރާކަން ޑޮކްޓަރ ފާހަގަކުރެއްވިއެވެ. ނަމަވެސް ބަލި ފެތުރޭ މިންވަރަށް ބަދަލެއް ނާންނަ ނަމަ ނުވަތަ ބައިބައި ވެގެން މަސައްކަތް ކުރާނަމަ ސިއްހީ ޚިދުމަތްތެރިންގެ މަސައްކަތްތައް ފެންނަ މިންވަރު ކުޑަވާނެ ކަމަށް ޑރ. މުހައްމަދު ޢަލީ ވިދާޅުވިއެވެ.

ބަލީގެ ކޮންޓްރޯލް އަތުން ދޫވެއްޖެކަން އަމިއްލައަށް ގަބޫލުކޮށް ގުޅިގެން މަސައްކަތް ކުރުމަށް ސިއްހީ ޚިދުމަތްތެރިން ގޮވާލަމުންދާއިރު، ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ އޭޕްރީލް މަހުގެ 10 ވަނަ ދުވަހު ބޭއްވި ލޯކަލް ކައުންސިލް އިންތިޚާބާ ދިމާކޮށް ބޮޑެތި ލުއިތަކެއް ދީފައެވެ. މާލެސިޓީގެ އިތުރުން އަތޮޅުތެރޭގެ ރަށްތަކަށް ވޯޓުލުމަށް ދިއުމުގެ ހުއްދަ ދިނުމާއެކު ވެސް ގިނަ ބަޔަކު ކަންބޮޑުވުންފާޅު ކުރިއެވެ. ޚާއްސަ ގައިޑްލައިންތަކެއްގެ ދަށުން ވޯޓުލާން ރަށަށް ދިޔަ ނަމަވެސް ގަވާއިދާ ޚިލާފަށް ރަށުގެ ތެރޭގައި އެމީހުން އުޅުނު ކަމުގެ ޝަކުވާ ބައެއް ރަށްތަކުގެ ކައުންސިލްގެ ސަމާލުކަމަށް އައުމާއެކު އެ ރަށްރަށުން ކަންބޮޑުވުންފާޅުކޮށްފައިވެއެވެ. އެކަމާ ގުޅިގެން ގިނަ ބައެއް ފާޑުކިޔުން ސަރުކާރަށް އަމާޒުވިއެވެ. އޭގެފަހުން ކޭސްތައް އިންތިހާއަށް އިތުރުވެފާއިރު، މިފަހުން ކޮންމެ ދުވަހަކު ވެސް 1000ށް ވުރެ މަތިން މީހުން ޕޮޒިޓިވްވަމުންދެއެވެ. ކޮވިޑްގެ ކޭސްތައް ފެނި 60ށް ވުރެ ގިނަ ރަށްތައް މިހާރު އޮތީ މޮނިޓަރިންގެ ހާލަތުގައެވެ. މީގެ އިތުރުން ބަލީގައި ނިޔާވި މީހުންގެ އަދަދުތައް އިތުރުވެ މެއި މަހުގެ މިހާތަނަށް 61 މީހަކު ވަނީ ނިޔާވެފައެވެ.

ކޮވިޑް-19ގެ ހަތަރުވަނަ ރާޅާއެކު އެނދުގެ ކެޕޭސިޓީ ފުލް ވެދާނެކަމުގެ އިންޒާރު ވެސް ވަނީ ދީފައެވެ. އަދި ބަލި ކޮންޓްރޯލް ކުރުމަށް ގިނަ ފިޔަވަޅުތަކެއް ވެސް ވަނީ އަޅާފައެވެ. އެގޮތުން ސްކޫލުތަކާއި، ސަރުކާރުގެ އޮފީސްތައް ވަނީ ބަންދުކޮށްފައެވެ. މާލެސިޓީގައި ހަވީރު 4:00ން ފަތިހު 4:00ށް ދަނީ ކާފިއު ހިންގަމުންނެވެ. ނަމަވެސް މީހުންގެ މޫވްމަންޓަށް މާ ބޮޑު ބަދަލެއް ނާންނަ ކަމަށް ކަމާ ބެހޭ ފަރާތްތަކުން ދަނީ ބުނަމުންނެވެ. އެހެންކަމުން މިހުގެ 26 ވާ ބުދަ ދުވަހު އަޅާފައިވާ ފިޔަވަޅުތައް އިތުރަށް ހަރުކަށި ކުރުމަށް ސަރުކާރުން ވަނީ ނިންމާފައެވެ. ނަމަވެސް އަޅަނީ ކޮން ފިޔަވަޅެއްކަމެއް އަދި ހާމަކޮށްފައެއް ނުވެއެވެ. ނަމަވެސް މާލެ ސިޓީ ފުލް ލޮކްޑައުންއަކަށް ނުދާނެ ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ވަނީ ވިދާޅުވެފައެވެ.