މޫސުން ގޯސްވެ ފެންބޮޑުވުމާއި ގުޅިގެން ސިއްހީ ގޮތުން ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކޮށްފި

މޫސުން ގޯސްވެ ފެންބޮޑުވުމާއި ގުޅިގެން ސިއްހީ ގޮތުން ރައްކާތެރިކަމުގެ ފިޔަވަޅުތައް އަޅަންޖެހޭ ކަމަށާއި، ދޮވެ ޑިސްއިންފެކްޓް ނުކުރެވޭ ތަކެއްޗަށް ފެނުގެ އަސަރުކޮށްފައިވާނަމަ އެތަކެތި އުކާލުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އިލްތިމާސްކޮށްފިއެވެ.

އެޗްޕީއޭއިން މި އިލްތިމާސްކޮށްފައިވަނީ ރާއްޖެއަށް މިހާރު ކުރަމުންދާ ވިއްސާރާގައި މާލެސިޓީ އަދި އަތޮޅުތެރޭގެ ބައެއް ރައްޔިތުން ދިރިއުޅޭ ގެތަކަށް ފެންވަދެ، ބޮޑެތި ގެއްލުންތަކެއް ލިބިފައިވާ ދަނޑިވަޅެއްގައެވެ. ބައެއް ގެތަކަށް ފެންވަނުމާއި ގުޅިގެން ބައެއް އާއިލާތައް ވަނީ ވަގުތީ ހިޔާތަކަށް ބަދަލުކޮށްފައެވެ.

ވިއްސާރަވުމާއި ގުޅިގެން ސިއްހީ ގޮތުން ރައްކާތެރިކަމުގެ ފިޔަވަޅުއެޅުމަށް އިލްތިމާސްކޮށް އެޗްޕީއޭއިން ބުނީ ދޮވެ ޑިސްއިންފެކްޓް ނުކުރެވޭ ތަކެއްޗަށް ފެނުގެ އަސަރުކޮށްފައިވާނަމަ (މިސާލަކަށް ގޮދަޑި، ސޯފާގެ ފޮތި / ސްޕަންޖް ބައި، ބާލީސް، ފޮތް އަދި އެހެނިހެން ކަރުދާސްތަކެތި) އުކާލަންޖެހޭ ކަމަށެވެ. އަދި ކުޑަކުދިން ކުޅޭ ތަކެއްޗަށް ފެނުގެ އަސަރު ކޮށްފައިވާނަމަ އެތަކެތި ވެސް އުކާލުމަށް އިލްތިމާސްކޮށްފައިވެއެވެ.

އެޗްޕީއޭއިން ބުނީ ފެން ހިންދާ، ކުންޏާއި ތަގައްޔަރުވެފައިވާ ތަކެތި އުކާލުމަށްފަހު ފެނުގެ އަސަރުކޮށްފައިވާ ފާރާއި ތަޅުންގަނޑު އަދި ފަރުނީޗަރުފަދަ އަލާތްތައް އޯމާ ނުވަތަ ބްލީޗް ލައިގެން ރަނގަޅަށް ދޮންނަންޖެހޭ ކަމަށެވެ. އަދި ސާފުކުރުމުގެ މަސައްކަތުގައި ލައިގެން ހުރި އަންނައުނު އެހެން އަންނައުނާއި ވަކިން ދޮވުމަށް އެޗްޕީއޭއިން އެދިފައިވެއެވެ.

މީގެ އިތުރުން އެތެރެހަށީގެ ބަލިތަކަށް ޚާއްސަ ޑރ. މުހައްމަދު އަލީ ވެސް ވަނީ މިހާރު ކުރަމުންދާ ވިއްސާރައާ ގުޅިގެން ސާފުތާހިރުކަން އިސްކުރުމަށް އިލްތިމާސްކޮށްފައެވެ.

އެގޮތުން ތަގައްޔަރުވެފައިވާ ފެންގަނޑުތަކުގެ ތެރޭގައި އުޅުމަށްފަހު ރަނގަޅަށް ސައިބޯނި ލައިގެން އަތާއި ފައި ދޮވުމާއި، ފެންބޮޑުވެފައިވާ މަގުތަކަށް ކުޑަކުދިން ގާތްވިޔަ ނުދިނުމާއި، ފެންބޮޑުވެފައިވާ މަގުތަކަށް ކުދިން ނުކުމެއްޖެ ނަމަ އެކުދިން ސާފުތާހިރު ކުރުވުމާއި، ހަކުރު ބަލި ހުންނަ މީހުން، ހަޑިވެފައިވާ ފެންގަނޑުތަކުގެ ތެރޭގައި އުޅުމަށްފަހު ސައިބޯނި ލައިގެން ފައި ރަނގަޅަށް ދޮވެ، ފައިގައި ހަލާކުވެފައި ތަނެއް ހުރިތޯ ބެލުން އަދި ހަމުގައި ހުރި ފާރުގަނޑެއް ތަގައްޔަރުވެފައިވާ ފެނުގައި ޖެހިއްޖެނަމަ ސާފުކުރުމަށް ފަހު ހިއްކައި، ބޭސް އެޅުމަށް ކްލިނިކަކަށް ދިއުމަށް ޑރ.މުހައްމަދު އަލީ އެދިފައިވެއެވެ.

ރާއްޖޭގައި އަބަދުވެސް ވިއްސާރަ މޫސުމުގައި އެކިއެކި ވައިރަލް ރޯގާތައް ވަރަށް ބޮޑަށް ފެތުރިގެން ދެއެވެ. އެހެންކަމުން އެޗްޕީއޭއިން ވަނީ ސިއްހީ ގޮތުން ރައްކާތެރި ފިޔަވަޅުތައް އެޅުމަށް އިލްތިމާސްކޮށްފައެވެ.