އިތުރު 3 މީހަކު ކޮވިޑްގައި ނިޔާވެއްޖެ
ނިޔާވީ އައިޖީއެމްއެޗަށް ގެންދެވުނު 81 އަހަރުގެ މީހަކާއި ހުޅުމާލެ މެޑިކަލް ފެސިލިޓީގައި ފަރުވާދެމުން ދިޔަ 58 އަހަރުގެ މީހެއް
އާރްއާރްޓީ ޓީމް ހަރަކާތްތެރިވަނީ
ހުޅުމާލެ މެޑިކަލް ފެސިލިޓީގައި ކޮވިޑަށް ފަރުވާ ދެމުންދިޔަ 2 މީހަކާއި އައިޖީއެމްއެޗްގެ އެމަރޖެންސީ ރޫމަށް ރޭ ދަންވަރު ގެންދިޔަ މީހަކު ނިޔާވެފައިވާ ކަމަށް އެޗްޕީއޭއިން ބުނެފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ ނިޔާވެފައިވަނީ އުމުރުން 81 އަހަރުގެ މީހަކާއި 58 އަހަރުގެ މީހެއްގެ އިތުރުން 77 އަހަރުގެ މީހެއް ކަމަށެވެ. މީގެ ތެރެއިން 81 އަހަރުގެ މީހާއަކީ ފިރިހެނެއް ކަމަށާއި، އާދީއްތަ ދުވަހުގެރޭ ވަގުތެއްގައި އައިޖީއެމްއެޗްގެ އެމަރޖެންސީ ރޫމަށް އެމީހާ ގެންދެވުނު ފަހުން ދަންވަރު 2:02 ގައި ނިޔާވެފައިވާ ކަމަށެވެ. މިއީ މިބަލީގައި ރާއްޖެއިން ނިޔާވި 130 ވަނަ މީހާއެވެ.
މީގެ އިތުރުން 58 އަހަރުގެ މީހާއަކީ ވެސް ދިވެހި ފިރިހެނެއް ކަމަށާއި، އޭނާއަށް ފަރުވާ ދެމުން ދިޔައީ ހުޅުމާލެ މެޑިކަލް ފެސިލިޓީގައި ކަމަށް އެޗްޕީއޭއިން ބުނެއެވެ. އަދި މި މީހާ ނިޔާވެފައިވަނީ އާދީއްތަ ދުވަހުގެ ފަތިހު 4:25 ގައެވެ. މިއީ 131 ވަނަ މަރެވެ.
އެޗްޕީއޭއިން ބުނީ ރޭ ފަތިހު 3:18 ގައި ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ 77 އަހަރުގެ ދިވެހި ފިރިހެނެއް ނިޔާވެފައިވާ ކަމަށާއި މިއީ މި ބަލީގައި ނިޔާވި 132 ވަނަ މީހާ ކަމަށެވެ.
މިހާތަނަށް ކޮވިޑްގައި ރާއްޖެއިން 132 މީހުން ނިޔާވެފައިވާ އިރު، ފަހަކަށް އައިސް މި ބަލީގައި ނިޔާވެގެން ދުވާލެއްގެ މައްޗަށް ރިޕޯޓް ކުރެވޭ މީހުންގެ އަދަދު ވަނީ އިތުރުވެފައެވެ. އެގޮތުން މިދިޔަ ހަފްތާގެ ބުދަ ދުވަހަކީ އެންމެ ގިނަ އަދަދަކަށް މީހުން ނިޔާވި ދުވަހެވެ. އެދުވަހު 7 މީހަކު ނިޔާވެފައިވާ އިރު، އާދިއްތަ ދުވަހު އެކަނި ވެސް 6 މީހަކު ނިޔާވެގެން ރިޕޯޓްކޮށްފައިވެއެވެ.
މިދިޔަ އަހަރުގެ ތެރޭގައި ކޮވިޑްގެ 52 މަރު ރިޕޯޓް ކުރި އިރު، މި މަހުގެ ތެރޭގައި އެކަނި ވެސް 58 މީހަކު ވަނީ ނިޔާވެފައެވެ.
