10 އަހަރަށްފަހު ލީގު ޗެމްޕިއަންކަން ލިލްއަށް
23 މެއި 2021 | އާދީއްތަ 21:53މިއީ ލިލްއިން ލީގު ކާމިޔާބުކުރި ހަތަރުވަނަ ފަހަރު
އެންޖާސް އަތުން މޮޅުވި މެޗަށްފަހު ލިލްގެ ކުޅުންތެރިން އުފާފާޅުކުރަނިކޮށް
10 އަހަރަށްފަހު ފްރެންޗް ލީގުގެ ޗެމްޕިއަންކަން ލިލްއިން ހޯދައިފިއެވެ.
ލިލްއިން ލީގު ޗެމްޕިއަންކަން ކަށަވަރުކުރީ އާދީއްތަ ދުވަހުގެރޭ ރަށުން ބޭރުގައި ކުޅުނު މެޗުން އެންޖާސް އަތުން 2-1 ގެ ނަތީޖާއަކުން މޮޅުވެގެންނެވެ. މި މެޗުން ލިލް މޮޅުވިއިރު، ލީގު ޗެމްޕިއަންކަން ހޯދުމުގެ ފުރުސަތު އޮތް ޕީއެސްޖީވެސް ވަނީ ލީގުގެ ފަހު މެޗުން ރަށުން ބޭރުގައި ބްރެސްޓް އަތުން 2-0 ގެ ނަތީޖާއަކުން މޮޅުވެފައެވެ.
އެކަމަކު އާދީއްތަ ދުވަހުގެރޭ ކުޅުނު މެޗުން ލިލް މޮޅުވުމާއެކު، އެ ޓީމަށް ލީގު ޗެމްޕިއަންކަން ކަށަވަރުވީ އެއް ޕޮއިންޓުގެ ފަރަގަކުންނެވެ. އެގޮތުން ލިލްއަށް 83 ޕޮއިންޓް ލިބުނުއިރު، ޕީއެސްޖީއަށް ލިބުނީ 82 ޕޮއިންޓެވެ. އެއާއެކު ލިލްއިން ޗެމްޕިއަންކަން ހޯދިއިރު، މިއީ އެ ޓީމުން ލީގު ޗެމްޕިއަންކަން ހޯދި ހަތަރުވަނަ ފަހަރެވެ. 10 އަހަރަށްފަހު ލީގު ޗެމްޕިއަންކަން ލިލްއަށް ލިބުނުއިރު، މީގެ ކުރިން އެ ޓީމުން ލީގު ކާމިޔާބުކޮށްފައިވަނީ 2010-2011 ވަނަ އަހަރުގެ ސީޒަނުގައެވެ.
އެންޖާސްގެ ދަނޑުގައި ކުޅުނު މެޗުގެ ފުރަތަމަ ހާފުގައި ލިލްއިން މޮޅު ކުޅުމެއް ދެއްކިއިރު، މި ހާފުގައި އެ ޓީމުން ވަނީ ދެ ލަނޑު ޖަހާފައެވެ. މެޗު ފަށައިގެން 10 ވަނަ މިނެޓުގައި ޖޮނަތަން ޑޭވިޑް ލިލްއަށް ލީޑު ނަގައިދިންއިރު، ފުރަތަމަ ހާފުގެ އިތުރު ވަގުތުގައި ލިބުނު ޕެނަލްޓީއަކުން ބުރަކް ޔިލްމާޒް ވަނީ އެ ޓީމަށް ލީޑު ފުޅާކޮށްދީފައެވެ. އެކަމަކު ދެވަނަ ހާފުގައި އަންޖެލޯ ފުލްގިނީ ވަނީ ލަނޑެއް ޖަހައި، އެންޖާސްއަށް ފަރަގު ކުޑަކޮށްދީފައެވެ.
މި މޮޅާއެކު މި ސީޒަނުގެ ލީގު ޗެމްޕިއަންކަން ލިލްއިން ހޯދިއިރު، މިއީ ފާއިތުވި އަށް އަހަރު ތެރޭ ޕީއެސްޖީ ނޫން ޓީމަކުން ލީގު ކާމިޔާބުކުރި ދެވަނަ ފަހަރެވެ. އެގޮތުން ލިލް ފިޔަވައި ޕީއެސްޖީ ނޫން ޓީމަކަށް މިދިޔަ އަހަރުތަކުގައި ލީގު ހޯދުނީ 2017 ވަނަ އަހަރު މޮނާކޯއަށެވެ.
