ލާމަރުކަޒީ ނިޒާމް ހަރުދަނާވެ، ފުރިހަމަވުމަށް އެންމެން އެކުގައި ގުޅިގެން މަސައްކަތްކުރުން މުހިއްމު: މިނިސްޓަރު އިމްރާން

ލާމަރުކަޒީ ނިޒާމް ހަރުދަނާވެ، ފުރިހަމަވުމަށްޓަކައި އެންމެން އެކުގައި ގުޅިގެން މަސައްކަތްކުރުން މުހިއްމު ކަމަށް ހޯމް މިނިސްޓަރު އަދި ލޯކަލް ގަވާމެންޓް އޮތޯރިޓީ (އެލްޖީއޭ) ގެ ރައީސް އިމްރާން އަބްދުﷲ ވިދާޅުވެއްޖެއެވެ.

އާދިއްތަ ދުވަހު ކައުންސިލަރުންނާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ މެމްބަރުން މަގާމަށް އަހުލުވެރި ކުރުމަށް ހިންގާ ޕްރޮގްރާމް އިފްތިތާހު ކޮށްދެއްވައި މިނިސްޓަރު އިމްރާން ވިދާޅުވީ ގާނޫނުތަކަށް އަހުލުވެރިވެ ރައްޔިތުންނާއި ގާތުން މަސައްކަތްކޮށް ސަރުކާރާ ގުޅިގެން ރައްޔިތުންނަށް ޚިދުމަތް ފޯރުކޮށްދިނުމަކީ ވަރަށް މުހިންމު ކަމެއް ކަމަށެވެ. އަދި ލާމަރުކަޒީ ނިޒާމު ހަރުދަނާވެ ފުރިހަމަވުމަށް އެންމެން އެކުގައި ގުޅިގެން މަސައްކަތް ކުރުން ވަރަށް މުހިންމު ކަމެއްގެ ގޮތުގައި މިނިސްޓަރު ފާހަގަކުރެއްވިއެވެ.

މިނިސްޓަރު އިމްރާން ވިދާޅުވީ ކައުންސިލްތަކުން ރައްޔިތުންނަށް ޚިދުމަތް ފޯރުކޮށްދޭއިރު، ލާމަރުކަޒީ ނިޒާމުގެ ފައިދާ އެންމެ އެކަށީގެންވާ ގޮތުގައި ރައްޔިތުންނަށް ލިބިގެންދާނީ ރައްޔިތުންނާއި ގާތުން މަސައްކަތްކޮށްގެން ކަމަށެވެ.

ލާމަރުކަޒީ ނިޒާމަށް އަލިއަޅުއްވާލައްވާ މިނިސްޓަރު އިމްރާން ވިދާޅުވީ މިސަރުކާރު އައީ 2008 ވަނަ އަހަރު ވުޖޫދު ކުރެވުނު ފެހި ގާނުނު އަސާސީން ކަނޑައަޅާދީފައިވާ ލާމަރުކަޒީ ނިޒާމު ވިއްސިވިހާލިވެ އަނަރޫފަވެ ނެތިވެދާން ކައިރިވެފައިވާ ވަގުތެއްގައި ކަމަށެވެ.

އެހެންކަމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަރަށް އިސްކަމެއް ދެއްވައިގެން ލާމަރުކަޒީ ގާނޫނަށް 8 ވަނަ އިސްލާހު ގެނެވިގެންދިޔަ ދިއުން މިއީ ލާމަރުކަޒީ ނިޒާމު ހަރުދަނާކޮށް ރައްޔިތުންނާއި ގާތުން ރައްޔިތުންނަށް ޚިދުމަތް ފޯރުކޮށްދިނުމަށް ސަރުކާރުން ކުރެއްވި ވަރަށް މުހިންމު ކަމެއްގެ ގޮތުގައި މިނިސްޓަރު އިމްރާން ފާހަގަކުރެއްވިއެވެ.

ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބު އޭޕްރީލް މަހުގެ 10 ވަނަ ދުވަހު ބާއްވާފައިވާ އިރު، މީގެ ކުރީގެ އިންތިޚާބުތަކާއި ހިލާފަށް އެމްޑީޕީއަށް މިފަހަރު ވަނީ ސުޕަރމެޖޯރިޓީ ގެއްލިފައެވެ. އެމްޑީޕީން 400 ގޮނޑި ކާމިޔާބު ކުރިއިރު، އިދިކޮޅު ޕީޕީއެމަށް ލިބުނީ 325 ގޮނޑިއެވެ.