"ރައީސް ނަޝީދަށް ދިން ހަމަލާގެ ތަހުގީގު ކުރިއަށްދަނީ ބޭރުގެ މާހިރުންގެ ލަފައާ އެއްގޮތަށް"
ފުލުހުންގެ ހޮޓްލައިން ނަންބަރު 9704000 އަށް މައުލޫމާތު ހިއްސާ ކުރެވޭނެ
ކޮމިޝަނަރ އޮފް ޕޮލިސް (ސީޕީ) މުޙައްމަދު ހަމީދު
ރައްޔިތުންގެ މަޖްލިސްގެ ރައީސް، ރައީސް މުހައްމަދު ނަޝީދަށް އަމާޒުކޮށް 6 މެއި ގައި ދެވުނު ޓެރަރިސްޓް ހަމަލާއާގުޅޭ ތަހުގީގު ބޭރުގެ މާހިރުންގެ ލަފައާ އެއްގޮތަށް ކުރިއަށްދާ ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
އެކަމާ ގުޅޭގޮތުން ސީޕީ ކުރެއްވި ޓްވީޓެއްގައި ވިދާޅުވީ، އެ މައްސަލައިގެ ތަހުގީގު ފުލުހުންގެ ޚިދުމަތުން ކުރިއަށް ގެންދަނީ ނުހަނު ބޮޑަށް އިންތިޒާމުވެގެން ކަމަށެވެ. އެގޮތުން ބޭރުގެ މާހިރުންގެ ފަންނީ ލަފައާ އެއްގޮތަށް ތަހުގީގުގެ ކަންކަން ކުރިއަށްދާކަން ފާހަގަ ކުރައްވައި ސީޕީ ވަނީ މިފަދަ މައްސަލައެއްގައި ހިމެނޭނެ ހުރިހާ ކަމެއް ފުލުހުން ބަލަމުންދާ ކަމަށެވެ.
ސީޕީ ވަނީ ހަމަލާއާގުޅޭ ކުޑަ މައުލޫމާތެއްވިޔަސް، އެއްވެސް ފަރާތަކަށް އެނގިވަޑައިގެންފައިވާނަމަ ފުލުހުންނާ ސީދާ ހިއްސާކޮށްދެއްވުމަށް އިލްތިމާސް ކުރައްވާފައެވެ. އަދި މިފަދަ މައްސަލައެއްގެ ތަހުގީގަށް ހުރަސްއެޅިދާނެފަދަ އަދި ތަހުގީގުގެ އިތުބާރަށް ބުރޫއަރާފަދަ އެއްވެސް ކަމެއް ނުކުރެއްވުމަށް ވެސް ސީޕީ ވަނީ އެދިވަޑައިގަންނަވާފައެވެ.
ރައީސް ނަޝީދަށް އަމާޒުކޮށް ދީފައިވާ ޙަމަލާގެ މައުލޫމާތުތައް އޮންލައިންކޮށް ވެސް ހިއްސާކުރުމުގެ ފުރުސަތު ވަނީ ހުޅުވާލާފައެވެ. އެގޮތުން އެ މައުލޫމާތު ހިއްސާކުރެއްވުމަށް ފުލުހުންގެ ހޮޓްލައިން ނަންބަރު 9704000 އަށް ގުޅުމަށް ފުލުހުން އެދެއެވެ. އަދި މައުލޫމާތާއި ފޮޓޯ ވެސް އެކަމަށް ޚާއްސަލިންކެއްމެދުވެރިކޮށް ހިއްސާކުރެވޭނެ ގޮތަށް ވަނީ ހަމަޖެހިފައެވެ.
ސީޕީ ވަނީ މިފަދަ ވަގުތުތަކުގައި ލިބެމުންދާ އެއްބާރުލުމާއި އެހީތެރިކަމަށް ވެސް ޝުކުރު އަދާކުރައްވާފައެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދީފައިވާ ޓެރަރިސްޓް ހަމަލާގެ ތަހުގީގު ގާތުން ބެއްލެވުމަށްޓަކައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ ރާއްޖެއިން ބޭރުގެ ޚާއްސަ މަންދޫބަކު ވެސް އައްޔަން ކުރައްވާފައެވެ. އެކަމާ ގުޅޭގޮތުން ރައީސް އޮފީހުން ބުނީ، 2021 ވަނަ އަހަރުގެ މޭ މަހުގެ 6 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ހަށިކޮޅަށް އަމާޒުކޮށްގެން ދީފައިވާ ޓެރަރިސްޓް ހަމަލާއާ ގުޅިގެން، ކުރިޔަށްދާ ތަހުގީގާއި އެންމެހައި ކޯޓު މަރުހަލާތައް ގާތުން ބެއްލެވުމަށްޓަކައި ރައީސުލްޖުމްހޫރިއްޔާގެ ޚާއްސަ މަންދޫބެއްގެ ގޮތުން އިނގިރޭސިވިލާތުގެ ރައްޔިތެއްކަމަށްވާ މިސްޓަރ އައްބާސް ފާއިޒް ހަމަޖައްސަވާފައިވާ ކަމަށެވެ.
