ކ. މާލެ
|
20 މެއި 2021 | ބުރާސްފަތި 03:05
ފްރެންޗް ކަޕުގެ ތައްޓާއެކު ޕީއެސްޖީ ޓީމު
ފްރެންޗް ކަޕުގެ ތައްޓާއެކު ޕީއެސްޖީ ޓީމު
ގެޓީ އިމޭޖަސް
ފްރެންޗް ކަޕް
ފްރެންޗް ކަޕުގެ ޗެމްޕިއަންކަން ޕީއެސްޖީއަށް
 
ފައިނަލް މެޗުން ޕީއެސްޖީ މޮޅުވީ 2-0 ގެ ނަތީޖާއަކުން
 
މިއީ ޕީއެސްޖީން މި މުބާރާތް ކާމިޔާބުކުރި 14 ވަނަ ފަހަރު

މޮނާކޯ ބަލިކޮށް ފްރެންޗް ކަޕުގެ ޗެމްޕިއަންކަން ޕީއެސްޖީން ހޯދައިފިއެވެ.

ބުދަ ދުވަހުގެރޭ ކުޅުނު ފައިނަލް މެޗުން ޕީއެސްޖީ މޮޅުވީ 2-0 ގެ ނަތީޖާއަކުންނެވެ.

މިއީ ފްރެންޗް ކަޕުގެ އެންމެ ކާމިޔާބު ޓީމު ކަމަށްވާ ޕީއެސްޖީން މި މުބާރާތް ކާމިޔާބުކުރި 14 ވަނަ ފަހަރެވެ. އަދި މިއީ އެ ޓީމުން މިދިޔަ ހަތް އަހަރު ތެރޭ މި މުބާރާތް ކާާމިޔާބުކުރި ހަވަނަ ފަހަރެވެ.

ބުދަ ދުވަހުގެރޭ ކުޅުނު މެޗުގައި ޕީއެސްޖީން މޮޅު ކުޅުމެއް ދެއްކިއިރު، މެޗުގެ 19 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މޮނާކޯ ފަހަތުން ހެދި ގޯހެއްގެ ފައިދާނަގައި މި ލަނޑު އެ ޓީމަށް ކާމިޔާބުކޮށްދިނީ މައުރޯ އިކާޑީއެވެ. މި މެޗުގައި މޮނާކޯއަށް ލަނޑު ޖަހާނެ މާ ގިނަ ފުރުސަތުތަކެއް ހޯދިފައިނުވާއިރު، ޕީއެސްޖީން ލީޑު ފުޅާކޮށްފައިވަނީ މެޗު ނިމެން ނުވަ މިނެޓަށް ވެފައި ވަނިކޮށެވެ. އެންހެލް ޑި މާރިއާ ދިން ބޯޅައަކުން މި ލަނޑު ޕީއެސްޖީއަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ކީލިއަން އެމްބާޕޭއެވެ.

މި މޮޅާއެކު މި ސީޒަނުގެ ފްރެންޗް ކަޕުގެ ޗެމްޕިއަންކަން ޕީއެސްޖީން ހޯދިއިރު، މިއީ މިދިޔަ ޖެނުއަރީ މަހު ޕީއެސްޖީގެ ކޯޗުގެ މަގާމާ ހަވާލުވި މައުރީސިއޯ ޕޮޗެޓީނޯގެ އިރުޝާދުގެ ދަށުން އެ ޓީމުން ހޯދި ދެވަނަ ކާމިޔާބީއެވެ. މީގެ ކުރިން ޖެނުއަރީ މަހު ޕީއެސްޖީން ވަނީ ފްރެންޗް ސުޕަ ކަޕުވެސް ކާމިޔާބުކޮށްފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް