ބާންލީ ބަލިކޮށް ލިވަޕޫލް ހަތަރުވަނައަށް

އިނގިރޭސި ޕްރިމިއާ ލީގުގައި ބުދަ ދުވަހުގެރޭ ބާންލީ ބަލިކޮށް ތާވަލުގެ ހަތަރުވަނައަށް ލިވަޕޫލް ޖެހިލައިފިއެވެ.

ރަށުން ބޭރުގައި ކުޅުނު މެޗުން ލިވަޕޫލް މޮޅުވީ 3-0 ގެ ނަތީޖާއަކުންނެވެ. މި މެޗުން މޮޅުވެ ގަދަ ހަތަރެއްގެ ޖާގައެއް ލިވަޕޫލުން ހޯދިއިރު، މިއީ މިދިޔަ ފެބްރުއަރީ މަހުގެ 14 ވަނަ ދުވަހުގެ ފަހުން ގަދަ ހަތަރެއްގެ ތެރޭގައި ލިވަޕޫލް ހިމެނުނު ފުރަތަމަ ފަހަރެވެ.

ބާންލީގެ ދަނޑުގައި ކުޅުނު މެޗުގެ ފުރަތަމަ ހާފުގައި ދެ ޓީމަށްވެސް ލީޑު ނަގަން ރަނގަޅު ފުރުސަތުތަކެއް ލިބިގެންދިޔައިރު، ލިވަޕޫލުގެ ސަޑިއޯ މާނޭ އާއި، ރޮބާޓޯ ފިރްމީނޯ އަދި ތިއާގޯ އަލްކަންޓާރާ ވަނީ ލިބުނު ރަނގަޅު ފުރުސަތުތަކެއް ބޭކާރުކޮށްލާފައެވެ. އަދި މި ހާފުގައި ބާންލީގެ ކްރިސް ވުޑްއަށް ހުސް ފުރުސަތެއް ލިބި ބޭކާރުވިއިރު، އެ ޓީމުގެ ޑްވައިޓް މެކްނީލް ފޮނުވާލި ނުރައްކާތެރި ހަމަލާއެއް ލިވަޕޫލުގެ ގޯލްކީޕަރު އެލިސަން ބެކާ ވަނީ މަތަކޮށްފައެވެ.

އެކަމަކު ފުރަތަމަ ހާފު ނިމުމުގެ ކުރިން ލިވަޕޫލުން ވަނީ ލީޑު ނަގާފައެވެ. މި ހާފު ނިމެން ދެ މިނެޓަށް ވެފައި ވަނިކޮށް އެންޑީ ރޮބަޓްސަން ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ފިރްމީނޯއެވެ. އަދި ދެވަނަ ހާފު ފަށައިގެން ހަތްވަނަ މިނެޓުގައި މާނޭ ހުރަސްކޮށްދިން ބޯޅައަކުން ނަތަނިއެލް ފިލިޕްސް ވަނީ ލިވަޕޫލަށް ލީޑު ފުޅާކޮށްދީފައެވެ. މިއީ ލިވަޕޫލުގެ ޖާޒީގައި ފިލިޕްސް ކާމިޔާބުކުރި ފުރަތަމަ ލަނޑެވެ.

އޭގެ ފަހުން މި މެޗުގައި ބާންލީން ކުޅުން ރަނގަޅުކުރިއިރު، މެޗުގެ 68 ވަނަ މިނެޓުގައި އެ ޓީމުގެ ކެޕްޓަން ބެން މީ ވަނީ ބޮލުން ނުރައްކާތެރި ހަމަލާއެއް އުފައްދާފައެވެ. އެކަމަކު ގޯލު ރޮނގުމަތިން އެ ބޯޅަ ސަލާމަތްކޮށްދިނީ މެޗުގައި މޮޅު ކުޅުމެއް ދެއްކި ލިވަޕޫލުގެ ޑިފެންޑަރު ފިލިޕްސްއެވެ. އެއާއެކު މެޗު ނިމެން ދެ މިނެޓަށް ވެފައި ވަނިކޮށް ލިވަޕޫލުން ވަނީ ތިންވަނަ ލަނޑެއް ޖަހާފައެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އެލެކްސް އޮކްސެލޭޑް-ޗެމްބަލެއިންއެވެ.

މި މޮޅާއެކު ތާވަލުގެ ހަތަރުވަނައަށް ލިވަޕޫލް ޖެހިލިއިރު، ލިވަޕޫލާއި ފަސްވަނައަށް ވެއްޓުނު ލެސްޓާ ސިޓީއަށް ވަނީ ކުޅުނު 37 މެޗުން 66 ޕޮއިންޓް ލިބިފައެވެ. ލިވަޕޫލް ކުރީގައި އޮތީ ހަތަރު ލަނޑުގެ ތަފާތަކުންނެވެ. އަދި ތާވަލުގެ ތިންވަނައިގައި އޮތް ޗެލްސީއަށް 37 މެޗުން ވަނީ 67 ޕޮއިންޓް ލިބިފައެވެ.

މީގެ އިތުރުން ލީގުގައި ބުދަ ދުވަހުގެރޭ ކުޅުނު އެހެން މެޗުތަކަށް ބަލާއިރު، އާސެނަލުން ވަނީ ރަށުން ބޭރުގައި ކްރިސްޓަލް ޕެލެސް އަތުން 3-1 ގެ ނަތީޖާއަކުން މޮޅުވެފައެވެ. އަދި އަމިއްލަ ދަނޑުގައި ކުޅުނު މެޗުން އެސްޓަން ވިލާ އަތުން 2-1 ގެ ނަތީޖާއަކުން ޓޮޓެންހަމް ހޮޓްސްޕާ ވަނީ ބަލިވެފައެވެ.