ހއ. ހޯރަފުށީ އާރްވީ ސްޕޯޓްސް އެކެޑަމީން އިންތިޒާމުކުރާ އީދު ހޯރަ ވޮލީ ލީގުގެ ކުޅުން ފަށައިފިއެވެ.
"ރާއްޖެ.އެމްވީ" އަށް މައުލޫމާތުދެއްވަމުން އާރްވީ ސްޕޯޓްސް އެކެޑަމީގެ މަސްއޫލުވެރިޔާ ހާމިދު އާދަމް ވިދާޅުވީ މިއީ އެ އެކެޑަމީން ކުރިއަށްގެންދާ ފުރަތަމަ މުބާރާތް ކަމަށާއި، ޒުވާނުންނަށް އަމާޒުކޮށްގެން ވޮލީބޯޅަ މުބާރާތެއް ބޭއްވުމުގެ މަގުސަދަކީ އީދުގެ އުފަލާއެކު އެކުވެރި މާހައުލެއްގައި ކުޅިވަރު ކުޅުމަށް ފުރުސަތު ދިނުން ކަމަށެވެ.
މި މުބާރާތުގައި ޖުމްލަ ހަތަރު ޓީމެއް ވާދަކުރެއެވެ. އެއީ ހޯރަ އެއާޕޯޓް، ހޯރަ ޔުނައިޓެޑް، ބަދަހި ސިކްސް އަދި ޓީމް ޓްރީޑީއެވެ. މި މުބާރާތް ކުރިއަށްދާނީ ލީގު އުސޫލުންނެވެ. މުބާރާތުގެ ފުރަތަމަ މެޗުގައި ހޯރަ ޔުނައިޓެޑުގެ މައްޗަށް ހޯރަ އެއާޕޯޓް ކުރި ހޯދީ 3-1 ސެޓުންނެވެ. އަދި ދެވަނަ މެޗުގައި ބަދަހި ސިކްސްގެ މައްޗަށް ޓީމް ތްރީޑީން ކުރި ހޯދީވެސް 3-1 ސެޓުންނެވެ.
މުބާރާތުގެ ކުޅުން ބުދަ ދުވަހު ފެށިއިރު، މުބާރާތުގެ ފައިނަލް މެޗު ކުޅޭނީ މި މަހުގެ 28 ވަނަ ދުވަހުއެވެ.
އާރްވީ ސްޕޯޓްސް އެކެޑަމީން ބުނީ ކުރިއަށް އޮތް ތަނުގައި މިފަދަ އެތައް މުބާރާތްތަކެއް އެ އެކެޑަމީގެ ފަރާތުން ބާއްވާނެ ކަމަށާއި، އެގޮތުން ކުރިއަށް އޮތް ތަނުގައި ފުޓްބޯޅަ، ވޮލީބޯޅަ އަދި ނެޓްބޯޅައިގެ އިތުރުން ކުޅިވަރުގެ އެކި ކަހަލަ ހަރަކާތްތައް ކުރިއަށްގެންދަން ރާވާފައިވާ ކަމަށެވެ. އަދި ހޯރަފުށީ ދަނޑުތަކުގެ މަސައްކަތް ނިމުމާއެކު، އެކެޑަމީން ކުދިން ތަމްރީނުކުރުމަށް ހުޅުވާލާނެ ކަމަށްވެސް މައުލޫމާތުދެއެވެ.
