ބުދަ ދުވަހު މާލެ ސަރަހައްދުން 965 މީހުން ޕޮޒިޓިވް
ބުދަ ދުވަހު ކޮވިޑަށް ޕޮޒިޓިވްވެފައި ވަނީ 1،187 މީހުން
ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ސަލާމަތީ ބާރުތަކުން ތަންފީޒު ކުރުމުގެ މަސައްކަތުގައި
ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން 1،187 މީހުން ކޮވިޑް-19ށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން ނެރުނު ތަފާސްހިސާބުތަކުން ދައްކައިފިއެވެ.
އެޗްޕީއޭއިން އެންމެ ފަހުން ނެރުނު ހިސާބުތަކަށް ބަލާލާއިރު، ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން 3،771 މީހުން ކޮވިޑަށް ޓެސްޓު ކޮށްފައިވާއިރު، އޭގެ ތެރެއިިން ޕޮޒިޓިވްވެފައި ވަނީ 1،187 މީހުންނެވެ. އޭގެ ތެރެއިން 965 މީހުން މާލެ ސަރަހައްދުން ޕޮޒިޓިވްވެފައިވާއިރު، އަތޮޅު ތެރެއިން 214 މީހުން ވަނީ ޕޮޒިޓިވްވެފައެވެ. އަދި ރިސޯޓުތަކުން 6 މީހުން ޕޮޒިޓިވްވެފައިވެއެވެ.
އިތުރު 1،187 މީހުން ކޮވިޑަށް ޕޮޒިޓިވްވުމާއިއެކު ރާއްޖެއިން ކޮވިޑަށް ޕޮޒިޓްވި މީހުންގެ ޖުމްލަ އަދަދު ވަނީ 48،608ށް އަރައިފައެވެ. އަދި އެކްޓިވް ކޭހުގެ އަދަދު 18،843ށް އަރާފައިވާއިރު އޭގެ ތެރެއިން 274 މީހަކަށް ހޮސްޕިޓަލުގައި އެޑްމިޓްކޮށްގެން އަންނަނީ ފަރުވާ ދެމުންނެވެ. ރާއްޖެއިން މިހާތަނަށް 29،644 މީހުން ބަލިން ފަސޭހަވެފައިވާއިރު، ރާއްޖެއިން ބުދަ ދުވަހު އެކަނިވެސް 7 މީހަކު ވަނީ ނިޔާވެފައެވެ. އެއާއިއެކު ނިޔާވި މީހުންގެ އަދަދު ވަނީ 112ށް އަރާފައެވެ.
މާލެ ސަރަހައްދުން ރިޕޯޓުކުރާ ކޭސްތަކުގެ އަދަދު އިންތިހާއަށް އިތުރުވެފައިވާތީ ރައްކާތެރިކަމުގެ ފިޔަވަޅުތައް ވަނީ އިތުރުކޮށްފައެވެ. އެގޮތުން މާލެ ސަރަހައްދުގައި ހަވީރު ހަތަރަކުން ފެށިގެން ފަތިހު ހަތަރަކަށް ކާފިއު އިއުލާންކޮށްފައިވާއިރު، ޕާކުތަކާއި މައިޒާންތަކުގެ އިތުރަށް ސްކޫލްތަކާއި އޮފީސްތައް ވެސް ވަނީ ބަންދުކޮށްފައެވެ.
