ފަހާފައިވާ ތަންތަނުގެ ރޮދި ކޮށައި އިތުރު ފަރުވާއަށް ތައްޔާރުވަނީ
އާއިލާއިން ވަނީ މެއި 14 އަދި 15ގައި ސްކޭންތައް ހަދާފައިވާކަން ހާމަކޮށްފައި
ރައީސް މުހައްމަދު ނަޝީދު ޖަރުމަންވިލާތުގައި
ރައީސް ނަޝީދުގެ ހަށިކޮޅުގެ ފަހާފައިވާ ތަންތަނުގެ ރޮދި ކޮށައި އިތުރު ފަރުވާއަށް ތައްޔާރުވަމުންދާކަމަށް އެމަނިކުފާނުގެ އާއިލާއިން ބުނެފިއެވެ.
ރައީސް ނަޝީފދުގެ ހާލުކޮޅާއި ގުޅޭގޮތުން ރާއްޖެ އެމްވީއަށް މައުލޫމާތު ހިއްސާކުރައްވަމުން އެމަނިކުފާނުގެ ކޮއްކޯފުޅު ނާޒިމް ސައްތާރު ވަނީ ރައީސް ނަޝީދު ޖަރުމަނުވިލާތުގައި ފަރުވާ ހޯއްދަވާއިރު އެމަނިކުފާނުގެ ހާލުކޮޅު ރަނގަޅުކަމަށް ވިދާޅުވެފައެވެ. އެގޮތުން ރައީސް ނަޝީދުގެ އޮޕަރޭޝަންތަކުގައި ފަހާފައިވާ ތަންތަނުގެ ރޮދި ބުދަދުވަހު ކޮށާފައިވާކަމަށް ވިދާޅުވިއެވެ.
ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން ބޮޑެތި ޒަޚަމްތަކެއް އެމަނިކުފާނަށް ވަނީ ލިބިވަޑައިގެންފައެވެ. ރައީސް ނަޝީދުގެ ހަށިކޮޅަށް 10 ރޭޒާފުއް ވަދެ މުހިއްމު ގުނަވަންތައް ފޫއަޅުވާލާފައިވެއެވެ. އެތަކެތި ނެގުމަށް 16 ގަޑިއިރުގެ އޮޕަރޭޝަންތަކެއް ކުރިއެވެ. އޭޑީކޭގައި ފަރުވާ ހޯއްދެވުމަށްފަހު ޖަރުމަނުވިލާތަށް ފުރާވަޑައިގެންނެވީ ހުކުރު ދުވަހުގެ ހެނދުނުގެ ވަގުތެއްގައެވެ.
ރައީސް ނަޝީދުގެ ހާލުކޮޅާ ގުޅޭގޮތުން އެމަނިިކުފާނުގެ އާއިލާއިން ވަނީ މެއި 14 އަދި 15ގައި ސްކޭންތައް ހަދާފައިވާ ކަން ހާމަކޮށްފައެވެ. އަދި އިތުރު ފަރުވާ ފަށާނީ ސްކޭންތަކުގެ ނަތީޖާ ލިބުމުން ކަމަށް ވަނީ ބުނެފައެވެ. މިހާތަނަށް އައިރު މި ސްކޭތްކުގެ ނަތީޖާ ލިބިފައިނުވާއިރު، ފަރުވާއަށް ތައްޔާރުވަމުންދާކަމަށް އާއިލާއިން ވަނީ ބުނެފައެވެ.
ރައީސް ނަޝީދު އަވަހާރަކޮށްލަން އައިއީޑީއެއް ގޮއްވާލި ހަމަލާއަށްފަހު މިހާތަނަށް ތިން މީހަކު ހައްޔަރުކޮށް، އެ މީހުންގެ ބަންދަށް 15 ދުވަސް ޖަހާފައިވެއެވެ. މި ތިން މީހުން ވެސް މިނިވަން ތަހުގީގަކަށް ފަހު އިންސާފުގެ ކުރިމަށްޗަށް ގެނެވޭނެ ކަމަށް ރައީސް ސާލިހު ވަނީ ވިދާޅުވެފައެވެ. އަދި ހަމަލާގެ ފަހަތުގައި ތިބި އެހެން މީހުން ވެސް ހޯއްދަވާނެ ކަމަށް އެމަނިކުފާނު ވިދާޅުވިއެވެ.
