ބޮޑު ޚިޔާނާތުގެ ތަހުގީގު ކޮމިޝަނުން ކުރިއަށްގެންދިޔަ ގޮތާމެދު ސުވާލު އުފެދޭ- މެމްބަރު ސަލީމް
ގެއްލިފައިވާ އެސެޓް ހޯދުމުގައި ގެންގުޅެނީ ޖިނާއީ އުސޫލުތޯ ނުވަތަ މަދަނީ އުސޫލުތޯ މިއީ ވެސް ބަހުސްކުރަން ޖެހޭ
އަހްމަދު ސަލީމް، ހޯރަފުށި ދާއިރާ - އެއްމެ ފުރަތަމަ ކުރި މަސައްކަތަކީ އެސެޓް ރިކަވަރީ ކޮމިޝަންގެ ގާނޫނީ އޮނިގަނޑު އެކުލަވާމުން ކަމަށާއި، 30 މަސް ވެގެންދިޔައިރު އެދެވޭ ނަތީޖާއެއް ނުލިބޭ
އެސެޓް ރިކަވަރީކޮމިޝަނުން ބޮޑު ޚިޔާނާތުގެ މައްސަލަ ތަހުގީގުކުރި ގޮތާމެދު ހޯރަފުށީ ދާއިރާގެ މެމްބަރު އަހްމަދު ސަލީމު ސުވާލު އުފައްދަވައިފިއެވެ.
ކޮމިޓީ ރިޕޯޓަށް ބަހުސް ކުރައްވަމުން މެމްބަރު ސަލީމު ވިދާޅުވީ، ކޮމިޝަނުން ތަހުގީގު ކުރިއަށް ގެންދެވީ ރަނގަޅަށް ކަމާމެދު ސުވާލު އުފެދޭ ކަމަށެވެ. 19 ވަނަ މަޖިލީސް އެކުލަވާލެވުމާއެކު އެންމެ ފުރަތަމަ ކުރި މަސައްކަތަކީ އެސެޓް ރިކަވަރީ ކޮމިޝަންގެ ގާނޫނީ އޮނިގަނޑު އެކުލަވާލުން ކަމަށާއި، 30 މަސް ވެގެންދިޔައިރު އެދެވޭ ނަތީޖާއެއް ނުލިބޭ ކަމަށެވެ.
ކޮމިޝަނުން މައިގަނޑު ގޮތެއްގައި ހާސިލުކުރަން މަސައްކަތްކުރީ ދެކަމެއްކަން ފާހަގަކުރައްވަމުން މެންބަރު ސަލީމު ވިދާޅުވީ، އެއީ އެސެޓް ރިކަވަރ ކުރުމާއި، ކޮރަޕްޝަން ތަހުގީގު ކުރުން ކަމަށެވެ. އެހެންނަމަވެސް ދެކަންތައް ވެސް ކޮމިޝަނަށް ނުކުރެވުނު ކަމަށެވެ. އެެސެޓް ރިކަވަރ ކުރުމަކީ މަޖިލިސް މެމްބަރެއްގެ ހައިސިއްޔަތުން ކުރަން ބޭނުންވާ ކަންތައް ކަމަށާއި، މިކަން ނުވެއްޖެނަމަ މި މަޖިލީހަކީ ފެއިލްވި މަޖިލީހެއް ކަމަށް ރައްޔިތުން ދެކޭނެކަމަށް ވިދާޅުވިއެވެ.
މެމްބަރު ސަލީމް ވިދާޅުވީ، ދިވެހިންގެ އެސެޓް ތަކަކީ، ފަރުތަކާއި ފަޅުތަކާއި، ރަށްތައް ކަމަށާއި، އެތަންތަން ނުއަގުގައި ބަޔަކު ވިއްކާ ގަނެ ހެދިއިރު އެކަން ބައެއްގެ ސަމާލުކަމަށް ނައި ހާލު، ދެން މި އެދެނީ އެ ގެއްލުނު ފައިސާ އާއި، އެސެޓް ހޯދައިދޭން ކަމަށެވެ. އެހެންނަމަވެސް އޭގެ ލޯ ލާރިއެއްވެސް އަދި ނުލިބޭކަމަށެވެ. އެހެންކަމުން ތަހުގީގާމެދު މިހާރު ސުވާލު އުފެދޭ ކަމަށެވެ.
މިއީ މިބާވަތުގެ ކޮރަޕްޝަންގެ އަމަލު ހިންގި ފުރަތަމަ ފަހަރެއް ނޫން ކަމަށާއި، ދުނިޔޭގެ ގައުމުތަކުގައި ހިންގާފައިވާ މިފަދަ އަމަލުތައް ތަހުގީގުކޮށް އެ ގައުމުތަކުން ގެއްލުނު ފައިސާ އަނބުރާ ހޯދާފައި ވެސް އެބަހުރި ކަމަށެވެ. މިފަދަ ކަންކަމުގައި އެހީވެދޭ އެކްސްޕާރޓް ޕެނަލްތައް ދުނިޔޭގައި ހުރި އިރު މިހާތަނަށް އެފަދަ ޕެނަލެއްގެ އެހީތެރިކަން ކޮމިޝަނުން ހޯދާފައިނުވަނީ ކީއްވެތޯ ވެސް މެމްބަރު ސުވާލު އުފެއްދެވިއެވެ. ސްޓޯލެން އެސެޓް ރިކަވަރީ އިނިޝިއޭޓިވް، މިއީ ވާރލްޑް ބޭންކާއި ޔޫއެންއޯޑީސީ ގުޅިގެން ހަދާފައިވާ ޕެނަލެއް ކަމަށާއި، މިއީވެސް ކޮމިޝަނަށް އެހީތެރިކަން ހޯދޭނެ ޕެނަލެއްކަން ފާހަގަކުރެއްވިއެވެ.
މެމްބަރު އިތުރަށް ވިދާޅުވީ، ގެއްލިފައިވާ އެސެޓް ހޯދުމުގައި ގެންގުޅެނީ ޖިނާއީ އުސޫލުތޯ ނުވަތަ މަދަނީ އުސޫލުތޯ މިއީ ވެސް ބަހުސްކުރަން ޖެހޭ ކަމެއް ކަމަަށެވެ. ސަބަބެއް ކަމުގައި ވިދާޅުވީ، ބޮޑު ޚިޔާނާތުގެ ލިސްޓުގައި ހިމެނޭ އެންމެންނަށް ޖިނާޢީ ތަހުގީގު ހިންގާ ކަމަށްވާނަމަ ގެއްލިފައިވާ ފައިސާ އަނބުރާ ދައުލަތަށް ލިބެން އެތައް ދުވަހެއް ނަގާނެ ކަމެވެ. ރާއްޖޭގައި ޖިނާޢީ މައްސަލަތަކުގައި ހުރިހާ ކޯޓު މަރުހަލާތައް ނިމިގެންދާއިރު 7 އަހަރު، 8 އަހަރު ވެފައި އޮންނަ ކަމަށާއި، މިހާ ދިގުލައިގެން ދަންޏާ މި ފައިސާ ލިބޭނެ ކަމުގެ ޔަގީންކަމެއް ވެސް ނެތް ކަމަށް ވިދާޅުވިއެވެ.
