ކޮވިޑް ޖެހިގެން އިތުރު މީހަކު ނިޔާވެއްޖެ، މިއީ މި މަހު ނިޔާވި 32 ވަނަ މީހާ
ނިޔާވެފައިވަނީ 66 އަހަރުގެ ދިވެހި އަންހެނެއް
ކޮވިޑް ޖެހިގެން ނިޔާވެފައިވަނީ ހުޅުމާލެ މެޑިކަލް ފެސިލިޓީގައި ފަރުވާދެމުން ދިޔަ މީހެއް
ކޮވިޑް ޖެހިގެން މި މަހުގެ ތެރޭގައި 32 ވަނަ މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީން ބުނީ ހުޅުމާލެ މެޑިކަލް ފެސިލިޓީގައި ފަރުވާ ދެމުން ދަނިކޮށް ނިޔާވެފައިވަނީ 66 އަހަރުގެ ދިވެހި އަންހެނެއް ކަމަށެވެ. މިއީ ކޮވިޑްގައި ނިޔާވި 105 ވަނަ މީހާއެވެ. އަންގާރަ ދުވަހު އެކަނި ވެސް 3 މީހަކު ވަނީ މި ބަލީގައި ނިޔާވެފައެވެ.
މީގެ ތެރޭގައި ހިމެނެނީ އަންގާރަ ދުވަހުގެ މެންދުރު ނިޔާވި 73 އަހަރުގެ ދިވެހި އަންހެނަކާއި ހޯމަ ދުވަހުގެ ރޭ ނިޔާވެގެން ރިޕޯޓް ކުރި 79 އަހަރުގެ ދިވެހި އަންހެެނެކެވެ.
މި ބަލީގައި ރާއްޖެއިން މަރުވާ މީހުންގެ އަދަދު އިންތިހާއަށް އިތުރުވެފައިވާ އިރު މިދިޔަ 3 ދުވަސް ތެރޭގައި އެކަނި ވެސް މި ބަލީގައި 10 މަރު ރިޕޯޓުކޮށްފައިވެއެވެ. ކޮވިޑް ބަލީގައި އެންމެ ގިނައިން މީހުން މަރުވެފައި ވަނީ މި މަހު އެވެ. އެއީ 32 އެވެ. މިދިޔަ އަހަރުގެ މާޗް މަހުގެ 7 ވަނަ ދުވަހު ރާއްޖެއިން ފުރަތަމަ ކޭސް ފެނި މިދިޔަ އަހަރު ތެރޭގައި 52 މީހަކު މި ބަލީގައި ނިޔާވެފައިވާ އިރު މި އަހަރުގެ ތެރޭގައި އެކަނި ވެސް 52 މީހަކު ވަނީ ނިޔާވެފައެވެ.
ރާއްޖޭގައި ކޮވިޑް-19 ޖެހި ފަރުވާދެމުންދާ އެކްޓިވް ކޭސްތަކުގެ އަދަދު 17،000 އާއި ގާތްކޮށްފައި ވާއިރު، އޭގެ ތެރެއިން 268 މީހުންނަށް ފަރުވާދެމުން އަންނަނީ އެޑްމިޓްކޮށްގެންނެވެ. ޕޮޒިޓިވްވާ މީހުންގެ އަދަދުވެސް އިތުރުވަމުން އަންނައިރު، އެވްރެޖްކޮށް ރިޕޯޓުކުރާ ކޭސްތަކުގެ އަދަދު ވަނީ 1000ން މައްޗަށް އަރާފައެވެ.
