މިއީ ގައުމަށްޓަކައި އެންމެން އެއްގަލަކަށް އަރަންވީ ވަގުތު - މައުމޫން
18 މެއި 2021 | އަންގާރަ 17:48ކޮވިޑްގެ ސަބަބުން އާއްމު ދިރިއުޅުމަށް ވަނީ އަސަރުކޮށްފައި
މައުމޫނު އަބްދުލްގައްޔޫމް
މިއީ އެންމެން ގައުމަށްޓަކައި އެއްގަލަކަށް އަރަންވީ ވަގުތުކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
ރައީސް މައުމޫން ވިދާޅުވީ، މިއީ އެެއްބަޔަކު އަނެއްބަޔަކަށް ބަހުގެ ހަމަލާ ދިނުން ހުއްޓާލަންވީ ވަގުތު ކަމަށާއި، މި ދަނޑިވަޅަކީ ކޮވިޑްގެ ބަލިމަޑުކަމުގެ ސަބަބުން ރައްޔިތުންގެ އާއްމު ހާލަތު ވަރަށް ގޯސްވެފައިވާ ދަނޑިވަޅެއްކަމަށެވެ.
ރައީސް މައުމޫން މި މޭރުމުން ޓްވީޓް ކުރައްވާފައިވާ މި ދަނޑިވަޅަކީ، މިމަހުގެ 6ވަނަ ދުވަހު މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާއި ގުޅިގެން، އެއްބަޔަކު އަނެއްބަޔަކަށް ބަހުގެ ހަމަލާތައް ދެމުން އަންނަ ދަނޑިވަޅެކެވެ.
ސިޔާސީ ގޮތުން އެއްބަޔަކު އަނެއްބަޔަކަށް ބަހުގެ ހަމަލާ ދެވެމުން އަންނަ އައުމަށް އިޝާރާތްކުރައްވައި ކުރީގެ ރައީސް މައުމޫނު ކުރެއްވި މި ޓުވީޓްގައި ވިދާޅުވީ، ރާއްޖޭގައި މިވަގުތު މިވަނީ ކޮވިޑްގެ ހާލަތު ވަރަށް ގޯސްވެފައިކަމަށެވެ. ރައްޔިތުންގެ އާންމު ދިރިއުޅުމަށް ވެސް ގިނަ ގޮންޖެހުންތަކެއް ކުރިމަތިވެފައިވާކަން ފާހަގަކުރައްވަމުން ރައީސް މައުމޫން ވިދާޅުވީ، މިއީ އެެއްބަޔަކު އަނެއްބަޔަކަށް ބަހުގެ ހަމަލާ ދިނުންހުއްޓާލާފައި އެންމެން ގައުމަށްޓަކައި އެއްގަލަކަށް އަރަންވީ ވަގުތުކަމަށް ދެކެވަޑައިގަންނަވާކަމަށެވެ.
ރައީސް މައުމޫން މިހެން ވިދާޅުވެފައިވާއިރު، ރާއްޖޭގައި ވަނީ ކޮވިޑްގެ ހާލަތު ވަރަށް ގޯސްވެފައެވެ. އެގޮތުން ބައްޔަށް ކޮންމެ ދުވަހަކުވެސް ޕޮޒިޓިވްވާ މީހުންގެ ޢަދަދު ހާހަކަށްވުރެ މައްޗަށް އަރާއިރު، ބަލީގައި މަރުވި މީހުންގެ އަދަދުވެސް ވަނީ 100 އިން މައްޗަށް އަރާފައެވެ.
