ޕޮޒިޓިވްވި މީހުންގެ އަދަދު އަނެއްކާވެސް އިތުރުވެއްޖެ
އެކްޓިވް ކޭހުގެ އަދަދު ވަނީ 16،000ށް ވުރެ އިތުރުވެފައި
ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ސަލާމަތީ ބާރުތަކުން ތަންފީޒު ކުރުމުގެ މަސައްކަތުގައި
ފާއިތުވި 24 ގަޑިއިރުގެ ތެރޭގައި ކޮވިޑް-19ށް ޕޮޒިޓިވްވި މީހުންގެ އަދަދު ކުރީ ދެ ދުވަހާ އަޅާ ބަލާއިރު އިތުރުވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން އާންމުކުރި ތަފާސްހިސާބުތައް ދައްކާ ގޮތުން ފާއިތުވި 24 ގަޑިއިރުގެ ތެރޭގައި ރާއްޖެއިން 4،480 މީހުން ވަނީ ކޮވިޑަށް ޓެސްޓު ކޮށްފައެވެ. އޭގެ ތެރެއިން 1،433 މީހުން ކޮވިޑަށް ޕޮޒިޓިވްވެފައިވާ ކަމަށް ތަފާސްހިސާބުތަކުން ދައްކައެވެ. އެއީ މާލެ ސަރަހައްދުން ޕޮޒިޓިވްވި 1،294 މީހުންނާއި، އަތޮޅުތެރެއިން ޕޮޒިޓިވްވި 134 މީހުންގެ އިތުރުން ރިސޯޓުތަކުން ޕޮޒިޓިވްވި 5 މީހުންނެވެ.
އިތުރު 1،433 މީހުން ކޮވިޑަށް ޕޮޒިޓިވްވުމާއިއެކު ރާއްޖެއިން ބައްޔަށް ޕޮޒިޓިވްވި މީހުންގެ ޖުމްލަ އަދަދު ވަނީ 45،956ށް އަރާފައެވެ. އެކްޓިވް ކޭހުގެ އަދަދު 16،997ށް ވަނީ އަރާފައެވެ. އޭގެތެރެއިން 268 މީހަކަށް ހޮސްޕިޓަލްގައި އެޑްމިޓްކޮށްގެން ފަރުވާދެމުންދެއެވެ. ރާއްޖެއިން މިހާތަނަށް 28،849 މީހުން ބަލިން ފަސޭހަވެފައިވާއިރު، 101 މީހުން ވަނީ ނިޔާވެފައެވެ.
މާލެ ސަރަހައްދުން ރިޕޯޓުކުރާ ކޭސްތަކުގެ އަދަދު އިންތިހާއަށް އިތުރުވެފައިވާތީ ރައްކާތެރިކަމުގެ ފިޔަވަޅުތައް ވަނީ އިތުރުކޮށްފައެވެ. މާލެ ސަރަހައްދުގައި ހަވީރު ހަތަރަކުން ފެށިގެން ފަތިހު ހަތަރަކަށް ކާފިއު އިއުލާންކޮށްފައިވާއިރު، ޕާކުތަކާއި މައިޒާންތަކުގެ އިތުރަށް ސްކޫލްތަކާއި އޮފީސްތައް ވެސް ވަނީ ބަންދުކޮށްފައެވެ. މީގެ އިތުރުން ކުޅިވަރު ކުޅުން މަނާކޮށްފައިވާއިރު، ކެފޭ ރެސްޓޯރެންޓުތަކުން ޓޭކްއަވޭ ޚިދުމަތް އެކަނި ދޭގޮތަށް ވަނީ ނިންމާފައެވެ.
