އައްޑޫގައި ކުރިއަށް ގެންދާ ޚާއްސަ އޮޕްރޭޝަން: ހައްޔަރުކުރި މީހުންގެ ބަންދުގެ މުއްދަތު ޖަހައިފި
ތިން މީހެއްގެ ބަންދަށް 15 ދުވަސް، ހަތަރު މީހެއްގެ ބަންދަށް 7 ދުވަސް ވަނީ ޖަހާފައި
އެމްއެންޑީއެފް އިން ކުރިއަށްގެންދިޔަ ޚާއްސަ އޮޕްރޭޝަނެއްގެ ތެރެއިން
ޓެރަރިޒަމާ ދެކޮޅަށް އައްޑޫ ސިޓީގައި ސިފައިންނާއި ފުލުހުން ކުރިއަށް ގެންދާ ޚާއްސަ އޮޕަރޭޝަނެއްގައި ހައްޔަރު ކުރި މީހުންގެ ބަގެ މުއްދަތު ޖަހައިފިއެވެ.
ހޮނިހިރު ދުވަހު ސިފައިން އަދި ފުލުހުން ގުޅިގެން އައްޑޫގައި ވަނީ ޚާއްސަ އޮޕަރޭޝަނެއް ފަށާފައެވެ. ނަމަވެސް މިއޮޕަރޭޝަނުގެ އިތުރު ތަފްސީލެއް ނުދެއެވެ.
މިއޮޕްރޭޝަންއާ ބެހޭ ގޮތުން ފުލުހުންގެ މީޑިއާ އޮފިސަރު ވިދާޅުވީ މިހާތަނަށް ހަތް މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އަދި ވިދާޅުވީ ތިން މީހެއްގެ ބަންދަށް 15 ދުވަސް، ހަތަރު މީހެއްގެ ބަންދަށް 7 ދުވަސް ޖަހާފައިވާ ކަމަށެވެ. މީގެ ކުރިން ވެސް އައްޑޫ ސިޓީގައި ހަރުކަށި ފިކުރާއި ޓެރަރިޒަމާއި ދެކޮޅަށް ޚާއްސަ އޮޕަރޭޝަންތަކެއް ކުރިއަށް ގެންގޮސްފައިވެއެވެ.
އައްޑޫ ސިޓީގައި ޚާއްސަ އޮޕަރޭޝަނެއް ފަށާފައިވާއިރު، ކުރީގެ ރައީސް، ރައްޔިތުން މަޖިލީހުގެ ރައީސް މުހައްމަދު ނަޝީދަށް އާމާޒުކޮށް މިމަހުގެ 6 ވަނަ ދުވަހުގެ ރޭ ދިން ޓެރަރިސްޓް ހަމަލާއާ ގުޅިގެން މާލޭސިޓީގައި ވެސް ވަނީ ޚާއްސަ އޮޕަރޭޝަނެއް ފަށާފައެވެ. މާލޭގެ މަގުތަކުގައި ހަތިޔާރު އެޅި ސިފައިން ހަރަކާތްތެރިވަމުންދާއިރު، ސަލާމާތީ ކަންކަން ވަނީ ވަރަށް ވަރުގަދަ ކޮށްފައެވެ.
ރައީސް ނަޝީދު ދިރިއުޅުއްވާ ކެނެރީގެ ކައިރީގައި އައިއީޑީއެއް ގޮއްވާލުމުގެ ހާދިސާގައި އެމަނިކުފާނުގެ ހަށިކޮޅަށް 10 ރޭޒާ ފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލާފައިވެއެވެ. އެތަކެތި ނެގުމަށް 16 ގަޑިއިރުގެ އޮޕަރޭޝަންތަކެއް ކުރިއެވެ.
ނަޝީދު އަވަހާރަކޮށްލަން އައިއީޑީ ގޮއްވާލި ހަމަލާއަށްފަހު މިހާތަނަށް ތިން މީހަކު ހައްޔަރުކޮށް، އެ މީހުންގެ ބަންދަށް 15 ދުވަސް ޖަހާފައިވެއެވެ. މި ތިން މީހުން ވެސް މިނިވަން ތަހުގީގަކަށް ފަހު އިންސާފުގެ ކުރިމައްޗަށް ގެނެވޭނެ ކަމަށް، ރައީސް އިބްރާހީމް މުހައްމަދު ސާލިހް ވަނީ ވިދާޅުވެފައެވެ. އަދި ހަމަލާގެ ފަހަތުގައި ތިބި އެހެން މީހުން ވެސް ހޯއްދަވާނެ ކަމަށް ރައީސް ސާލިހު ވިދާޅުވިއެވެ.
މާލޭގައި ދިން ޓެރަރިސްޓް ހަމަލާގައި ރައީސް ނަޝީދުގެ އިތުރުން، އަރިހުގައި އެވަގުތު ތިބި ސިފައިންނާއި އާންމުންނަށް ވެސް އެކި ވަރުގެ އަނިޔާ ލިބިފައިވެއެވެ.
