ކޮވިޑް-19ގައި ނިޔާވި މީހުންގެ އަދަދު 100ށް
17 މެއި 2021 | ހޯމަ 03:31ނިޔާވެފައި ވަނީ އުމުރުން 56 އަހަރުގެ ދިވެހި އަންހެނެއް
ކޮވިޑަށް ފަރުވާހޯދަމުންދާ މީހުންގެ ތެރެއިން ނިޔާވާ މީހުންގެ އަދަދު ދަނީ އިތުރުވަމުން
ރާއްޖޭގައި ކޮވިޑް-19 ޖެހުނު އިތުރު މީހަކު ނިޔާވެ ޖުމްލަ އަދަދު 100ށް އަރައިފިއެވެ.
ހެލްތު ޕްރޮޓެކްޝަން އެޖެންސީން ބުނީ ނިޔާވެފައި ވަނީ ޑީއެޗް-11 ގައި ފަރުވާހޯދަމުންދިޔަ އުމުރުން 56 އަހަރުގެ ދިވެހި އަންހެނެއް ކަމަށެވެ. އަދި އޭނާ ނިޔާވެފައި ވަނީ ހޯމަ ދުވަހުގެ ފަތިހު 04:41 ގައި ކަމަށް އެޗްޕީއޭއިން ބުނެއެވެ.
ޑީއެޗް-11 ގައި ފަރުވާދެމުން ދިޔަ އުމުރުން 64 އަހަރުގެ ދިވެހި ފިރިހެނެއް 99 ވަނައަށް ނިޔާވެފައިވާއިރު، 98 ވަނަ މީހާ ނިޔާވެފައިވަނީ 16 ވަނަ ދުވަހުގެރޭ 10:44 ގައެވެ. އަދި 97 ވަނަ މީހާ ނިޔާވެފައި ވަނީ ހުޅުމާލޭ މެޑިކަލް ފެސިލިޓީގައި ފަރުވާދެމުން ދަނިކޮށް 16 ވަނަ ދުވަހުގެ ހަވީރު 03:10 ގައި އެވެ.
ހުޅުމާލޭ މެޑިކަލް ފެސިލިޓީގައި ފަރުވާދެމުން ދަނިކޮށް މެއި 15 ވަނަ ދުވަހުގެ ރޭ 02:38 ހާއިރު މިބަލީގައި 95 ވަނަ މީހާ ނިޔާވެފައިވާއިރު، 96 ވަނަ މީހާ ނިޔާވެފައި ވަނީ އެ ދުވަހުގެ ހެނދުނު 04:30 ހާއިރުއެވެ. އޭނާއަށް ވެސް ފަރުވާ ދެމުން ގޮސްފައި ވަނީ ހުޅުމާލޭ މެޑިކަލް ފެސިލިޓީގައެވެ.
ރާއްޖޭގައި ކޮވިޑަށް ފަރުވާ ދެމުންދާ މީހުންގެ އަދަދު 16،000 އާ ގާތްކޮށްފައިވާއިރު، 259 މީހުންނަށް ފަރުވާދެނީ ހޮސްޕިޓަލްގައި އެޑްމިޓް ކޮށްގެންނެވެ. ކޮވިޑަށް ފަރުވާހޯދަމުން ދަނިކޮށް ނިޔާވާ މީހުންގެ އަދަދު އިތުރުވެފައިވާ އިރު، މެއި 14 ވަނަ ދުވަހު އެކަނިވެސް ފަސް މީހުން ނިޔާވެފައިވެއެވެ.
