އަނެއްކާވެސް އިތުރު މަރެއް، ޖުމުލަ 97ށް
16 މެއި 2021 | އާދީއްތަ 12:38މި ބަލީގައި މަރުވާ މީހުންގެ އަދަދު ވަނީ ބޮޑުތަނުން އިތުރުވެފައި
ހުޅުމާލެ މެޑިކަލް ފެސިލިޓީ- އާދީއްތަ ދުވަހު ނިޔާވެފައިވާ 3 މީހުންނަށްވެސް ފަރުވާދެމުން ދިޔައީ ހުޅުމާލޭ މެޑިކަލް ފެސިލިޓީގައި
ރާއްޖެއިން ކޮވިޑް ޖެހުނު އިތުރު މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، ނިޔާވެފައިވަނީ އުމުރުން 83 އަހަރުގެ ދިވެހި ފިރިހެނެއް ކަމަށެވެ. އޭނާއަށް ފަރުވާދެމުން ގެންދިޔައީ ހުޅުމާލޭ މެޑިކަލް ފެސިލިޓީގައި ކަމަށް އެޗްޕީއޭއިން މައުލޫމާތު ދެއެވެ. އެއާއެކު، ރާއްޖެއިން މި ބަލީގައި ނިޔާވި މީހުންގެ އަދަދު މިވަނީ 97ށް އަރާފައެވެ.
ހޮނިހިރު ދުވަހުގެ ރޭ 02:38 ހާއިރު އުމުރުން 81 އަހަރުގެ ދިވެހި ފިރިހެނަކުވެސް މި ބަލީގައި ވަނީ ނިޔާވެފައެވެ. އޭރު އޭނާއަށް ފަރުވާދެމުން ދިޔައީ ހުޅުމާލޭ މެޑިކަލް ފެސިލިޓީގައިކަމަށް އެޗްޕީއޭއިން ވަނީ ބުނެފައެވެ. އެއީ ރާއްޖެއިން ކޮވިޑު ޖެހިގެން ނިޔާވި 95 ވަނަ މީހާއެވެ. ހޮނިިހިރު ދުވަހުގެ ހެނދުނު 04:30 ގައި އުމުރުން 30 އަހަރުގެ ދިވެހި އަންހެނެއްވެސް މި ބަލީގައި ނިޔާވެފައިވާއިރު، އޭނާއަށްވެސް ފަރުވާދެމުން ދިޔައީ ހުޅުމާލޭ މެޑިކަލް ފެސިލިޓީގައި ކަމަށް އެޗްޕީއޭއިން މައުލޫމާތު ދެއެވެ. އޭނާއަކީ ރާއްޖެއިން ކޮވިޑު ބަލީގައި ނިޔާވި 96 ވަނަ މީހާއެވެ.
ރާއްޖެއިން މިހާރަކަށް އައިސް ޕޮޒިޓިވްވަމުންދާ އަދަދުތައް އުޅެނީ ހާހަކުން މަތީގައެވެ. މި ބަލީގައި މަރުވާ މީހުންގެ އަދަދުވެސް ވަނީ ބޮޑުތަނުން އިތުރުވެފައެވެ. އެގޮތުން ހޮނިހިރު ދުވަހުވެސް 2 މީހަކު މި ބަލީގައި ނިޔާވެފައިވެއެވެ. އަދި ހުކުރު ދުވަހު އެކަނިވެސް 5 މީހަކު ވަނީ ނިޔާވެފައެވެ.
